Амалэу IэкIэлъым хэхъощт

Адыгеим и ЛIышъхьэу КъумпIыл Мурат УФ-м ошIэ-дэмышIэ IофхэмкIэ и Министерствэ АР-мкIэ и ГъэIорышIапIэ ипа­щэу Александр Зыбкинымрэ граждан зыухъумэжьыным ыкIи ошIэ-дэмышIэ Iофыгъохэм афэгъэзэгъэ комитетым итхьаматэу Вячеслав Лотаковымрэ тыгъуасэ аIукIагъ.

Республикэм машIом зы­къыщимыштэным, ащ цIыфхэр щыухъумагъэхэ хъунхэм ащ щытегущыIагъэх.

Материальнэ-техническэ ба­зэр гъэпытэгъэным, къулыкъум Iоф щызышIэхэрэм яшIэны­гъэхэм ахагъэхъоным, пстэуми яIо зэхэлъэу япшъэрылъхэр агъэцэкIэнхэм, цIыфхэм ящынэгъончъагъэ къэухъумэгъэным мэхьанэшхо зэряIэр Адыгеим и ЛIышъхьэ къыхигъэщыгъ.

— МашIом зыкъимыштэным епхыгъэ Iофтхьабзэхэр зэхэтщэнхэм мэхьанэшхо зэриIэр УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым бэмышIэу зэхищэгъэ зэхэсыгъом къыщыхигъэщыгъ. Мыщ фэгъэзагъэу тиIофшIэн дгъэ­лъэшын фае. ЦIыфхэм ямылъку, япсауныгъэ ыкIи ящы­Iэныгъэ машIом ­щытыухъумэнхэр типшъэрылъ шъхьаIэхэм ащыщ, — къыIуагъ КъумпIыл Мурат.

Мыщ епхыгъэу Адыгеим и ЛIышъхьэ федеральнэ ведомст­вэм ипащэу Евгений Зиничевым мы илъэсым мэзаем Моск­ва зэIукIэгъу щыдыриIагъ. Ащ зэфэхьысыжь фэхъугъ шъолъырым щыIэхэ къулыкъушIэхэм япчъагъэ нэбгыри 124-кIэ на­хьыбэ шIыгъэныр.

ЦIыфхэр шIуагъэ къытэу къэ­ухъумэгъэнхэм изы лъэбэкъоу хъущт 2020 — 2023-рэ илъэсхэм Тэхъутэмыкъое, Красногвардейскэ, Кощхьэблэ ыкIи Мыекъопэ районхэм ащагъэпсыщт подразделении 6-р. АщкIэ гумэкIыгъоу щыIэхэр зэкIэ дэгъэзыжьыгъэхэ хъущтых.

Гъонэжьыкъо Сэтэнай.