Адэмые дэт унэ-интернатыр мы илъэсым ыкIэм нэс зэтырагъэпсыхьажьыщт

Адыгеим и ЛIышъхьэу КъумпIыл Мурат Адэмые психоневрологическэ унэ-интернатым щыIагъ.

Унэм изэтегъэпсыхьан къыдилъытэу кIэлэцIыкIу сэкъатхэм апае унакIэм ишIын падзэжьыгъ. МазэкIэ узэкIэIэбэжьмэ псэолъэшIхэр а IофшIэным фежьагъэх ыкIи мы илъэсым ыкIэм ехъулIэу псэуалъэр атын фае.

Республикэм и ЛIышъхьэ Iофхэр зэрэкIохэрэм зыщигъэгъозагъ, социальнэ учреждением ипащэу Ягъумэ Мариетрэ Адыгэ Республикэм икъэралыгъо учреждениеу «Стройзаказчикым» ипащэу Абрэдж Аслъанрэ гущыIэгъу афэхъугъ.

КъумпIыл Мурат къызэрэхигъэщыгъэмкIэ, ахъщэу къыхагъэкIырэр шIогъэ ин хэлъэу агъэфедэн фае. ХэушъхьафыкIыгъэу къыIуагъ а чIыпIэр зэтегъэпсыхьэгъэн, чъыгхэр, къэгъагъэхэр щыгъэтIысыгъэнхэ зэрэфаер. Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч пшъэрылъ фишIыгъ тхьамафэ къэс псэолъэшI IофшIэнхэр зэрэкIохэрэр ыгъэунэфынэу.

Шъугу къэтэгъэкIыжьы: Урысые Федерацием и Правительствэ и Тхьаматэу Дмитрий Медведевым иунашъокIэ республикэм сомэ миллион 35,5-рэ къыIэкIэхьагъ къэралыгъо учреждениеу «Адэмые психоневрологическэ унэ-интернатыр» зыфиIорэм изэтегъэпсыхьажьын пэIуагъэхьанэу. Ащ нэфэшъхьафэу республикэ бюджетым сомэ миллион 15-м ехъу къыхагъэкIыгъ. Сэкъатныгъэ зиIэ кIэлэцIыкIухэм апае нэбгырэ 40-м телъытэгъэ унэм ишIын а ахъщэмкIэ аухыжьыщт. ДжырэкIэ къызфагъэфедэрэ унэм кIэлэцIыкIухэри зыныбжь хэкIотагъэхэри щаIыгъых, ар шапхъэхэм адиштэрэп. ПстэумкIи нэбгыри 130-рэ мыщ щэпсэу, ахэм ащыщэу кIэлэцIыкIухэр 16 зэрэхъухэрэр. УнакIэм амал къытыщт нахьышIоу мыщ щаIыгъынхэу, ащ фэдэ учреждениехэм ащаIыгъынхэм пае чэзыур щымыIэжьынэуи амал къытыщт.

Унэм зызэрэрагъэушъомбгъущтым нэмыкIэу нахьышIум ылъэныкъокIи зэхъокIыныгъэ гъэнэфагъэхэр фашIыщтых. ГущыIэм пае, Адыгеим ибюджет къыхагъэкIи, гыкIапIэр зычIэт унэм игъэцэкIэжьын рагъэжьагъ, ащ сомэ миллиони 3,7-рэ пэIухьащт. Джащ фэдэу унэ-интернатым иахъщэу кIаугъоягъэмрэ бюджетым къыхэмыкIыгъэ ахъщэмрэ яшIуагъэкIэ котельнэр зэрэпсаоу уахътэм диштэу зэтырагъэпсыхьажьыгъ, IофшIэнхэмрэ оборудованиемрэ сомэ миллиони 3,4-рэ фэдиз апэIухьагъ.

Адыгэ Республикэм и ЛIышъхьэ ипресс-къулыкъу