«Адыифыр» иешIакIэ лъэхъу

«АГУ-Адыиф» Мыекъуапэ — «Ростов-Дон» Ростов-на-Дону — 20:39 (12:18).
Щылэ мазэм и 9-м спорт Унэшхоу Кобл Якъубэ ыцIэ зыхьырэм щызэдешIагъэх.

Зезыщагъэхэр: И. Власов, Н. Чуркин.

«АГУ-Адыиф»: къэлэпчъэIутхэр: Кожубекова, Баскакова, Силантьева; ешIакIохэр: Ефимкина — 1, Клименко — 1, Серадская — 1, Краснокутская, Морозова — 1, Дворцевая, Никулина – 2, Зубова, Куцевалова, Кириллова — 1, Загайко — 1, Дьяченко — 6, Кобл — 5.

«Ростов-Доным» къыхэщы­гъэхэр: Бобровникова — 7, Кузнецова — 5, Бенке — 5, Маслова — 6, Судакова — 4, Сень — 4, Вяхирева — 2, Манагарова — 2, Кожокарь — 3.
Хэгъэгум изэнэкъокъу апэрэ чIыпIэр щызыIыгъ «Ростов-Доным» ешIэгъу 13 иIагъ, зэкIэми текIоныгъэр къащыдихыгъ. «Адыифым» очкоуи 3 къыхьыгъ, я 10-рэ чIыпIэм щыI. Урысыем и Кубок шъхьаIэ 2015 — 2019-рэ илъэсхэм «Ростов-Доным» къыфагъэшъошагъ. Дунаим щыцIэ­рыIохэ ешIакIохэу Анна Вяхи­ревар, Анна Сень, Майя Петровар, Юлия Манагаровар, Марина Судаковар, нэмыкIхэри «Рос­тов-Доным» хэтых. Ащ фэдэ командэ лъэшым «Адыифыр» текIоным непэ фэхьазырэп.

ЗэIукIэгъур заублэм пчъагъэр зэрэлъыкIотэрэ шIыкIэм тигъэгумэкIыщтыгъэп: 0:1, 1:1, 2:4, 4:5, 7:7. «Ростов-Доным» нахь псынкIэу ешIэу зырегъажьэм, «Адыифым» имэхапIэхэр нахь къэ­лъэгъуагъэх. А. Сень, М. Судаковам, В. Бобровниковам, П. Кузнецовам, нэмыкIхэм ти­къэлапчъэ Iэгуаор къызэрэда­дзэрэм ешIэгъур къыгъэдахэ­щтыгъ. ХьакIэхэм текIоныгъэр къызэрэдахыщтыр зэнэкъокъум къыщылъэгъуагъ.

Ксения Дьяченкэр, Кобл Зарет тикомандэ къыхэщыщтыгъэх. Къэлапчъэм Iэгуаор зэрэдадзэ­рэм дакIоу зэхэщэн Iофыгъохэр дэгъоу агъэцакIэщтыгъэх. К. Дья­ченкэм лъэшэу ыдзырэ Iэгуаор къэлэпчъэIут цIэрыIоу Анна Се­дойкинам къыубытын е къызэ­кIидзэжьын ылъэкIыщтыгъэп.

З. Коблым лъхъанчэу IапшъэкIэ Iэгуаор хъагъэм зэрэридзэрэр гандболым ишэпхъэ лъагэхэм адиштэу тлъытэщтыгъ. К. Дьяченкэмрэ З. Коблымрэ зэгурыIоныгъэ ахэлъэу Iэгуаор зэфадзызэ «Ростов-Доным» иухъумакIо­хэм аIэкIэкIыщтыгъэх, хъагъэм Iэгуаор радзэщтыгъ. Ащ фэдэ ешIакIэм тигъэгушIощтыгъ, ау те­кIоныгъэр нэбгыри 2-мэ къыдахын зэрамылъэкIыщтыр пшIэнэу щытыгъ.

Анна Вяхиревам иIэпэIэсэныгъэ тегъэгушхо. ЕшIэгъур зэ­рэ­кIо­рэ шIыкIэм ар псынкIэу «къе­джэ», хэкIыпIэхэр IэшIэхэу къегъотых. ЗэIукIэгъур заухым, А. Вя­хиревам, М. Петровам, М. Судаковам, Г. Габисовам, нэ­мыкIхэм гущыIэгъу тафэхъугъ. «Ростов-Доныр» дышъэм фэбанэ. Пшъашъэхэм къызэрэтаIуагъэу, Урысыем ихэшыпыкIыгъэ командэ хэтхэу Олимпиадэ джэгунхэу Токио щыкIощтхэм ахэлэжьэнхэу загъэхьазыры.

Пресс-зэIукIэр

«Ростов-Доным» ипащэхэр, ешIакIохэр зэнэкъокъум икIэух ыгъэрэзагъэх. «Адыифым» итренер шъхьаIэу Никита Голуб къытиIуагъ тикомандэ иешIакIэ къыгъотыным зэрэлъыхъурэр. IэпэIа­сэхэр «Адыифым» хэтых ­шъхьае, зэдырагъаштэзэ ешIэнхэм фэхьазырхэп. «Уфа-Алисэм» дэгъоу дешIэщтхэу типшъашъэхэм та­гъэ­гугъэ.

Щылэ мазэм и 13-м «Адыифыр» «Уфа-Алисэм» Мыекъуапэ щыIукIэщт, ешIэгъур пчыхьэм сы­хьатыр 6-м аублэщт.

«Адыифыр» «Ростов-Доным» зыIокIэм, анахь дэгъоу ешIагъэу тикомандэ къыхахыгъэ Кобл Зарет фэгушIуагъэх, шIухьафтынхэр ратыжьыгъэх.

Сурэтхэм арытхэр: Кобл Зарет сэмэгумкIэ щыт; «Адыифыр» «Ростов-Доным» дешIэ.