Адыгэ Республикэм и Къэралыгъо программэу «IэкIыб къэралхэм ащыпсэурэ тихэгъэгогъухэу Адыгэ Республикэм къэкощыжь зышIоигъохэм IэпыIэгъу ятыгъэныр» зыфиIоу 2019 — 2021-рэ илъэсхэм ателъытагъэм ехьылIагъ ­

Адыгэ Республикэм иминистрэхэм я Кабинет иунашъоу N 61-р зытетэу 2019-рэ илъэсым гъэтхапэм и 12-м къыдэкIыгъэмкIэ ухэсыгъэ хъугъэ Къэралыгъо программэу «IэкIыб къэралхэм ащыпсэурэ тихэгъэгогъухэу Адыгэ Республикэм къэкощыжь зышIоигъохэм IэпыIэгъу ятыгъэныр» зыфиIоу 2019 — 2021-рэ илъэсхэм ателъытагъэр (нэужым ПрограммэкIэ дгъэкIощт).

Программэр зыфытегъэпсыхьагъэр IэкIыб къэралхэм ащыпсэурэ тихэгъэгогъухэм ащыщ IофышIэ IэпэIасэхэу, адыгэ лъэпкъым къыхэкIыгъэхэри зэрахэтхэу, Адыгэ Республикэм исоциальнэ-экономикэ хэхъоныгъэ хэлэжьэнхэм пае къэкощыжь зышIоигъохэм IэпыIэгъу ятыгъэныр ары.

Урысыем имызакъоу, Урысые Федерацием къыхимыубытэрэ нэмыкI чIыпIэхэми Къэралыгъо программэм зэрэ­хэлажьэхэрэр къэзыушыхьатырэ тхы-лъыр ахэм къащаIахын алъэкIыщт.

Тихэгъэгогъухэу IэкIыб къэралхэм ащыпсэухэрэм Къэралыгъо программэм зэрэхэлажьэхэрэр къэзыушыхьатырэ тхылъыр агъэпсыным пае ежьхэр ренэу зыщыпсэухэрэ къэралыгъом иуполномоченнэ къулыкъухэу IэкIыбым щыIэхэм зафагъэзэн фае.

Тихэгъэгогъухэу Къэралыгъо программэм диштэу Урысые Федерацием къэкощыжь зышIоигъохэм зызфагъэзэн фэе уполномоченнэ къулыкъухэр мыхэр ары:

Урысыем и МВД илIыкIохэм яIофшIапIэхэу IэкIыб къэралхэм ащыIэхэр; Урысые Федерацием идипломатическэ представительствэхэу IэкIыб къэралхэм ащыIэхэр (урысые посольствэхэм яконсул отделхэр) ыкIи Урысые Федерацием иконсул учреждениехэу IэкIыб къэралхэм ащыIэхэр (Къэралыгъо программэм игъэцэкIэнкIэ пIэлъэ гъэнэ­фагъэм тегъэпсыхьэгъэ купхэр зыщы­зэ­хащэнхэ ыкIи ахэм Iоф зыщашIэн алъэкIыщтхэр).

Тихэгъэгогъухэу хабзэу щыIэм диштэу Урысые Федерацием ренэу е пIэ­лъэ гъэнэфагъэкIэ щыпсэухэрэм зызфагъэзэнэу щытыр Адыгэ Республикэм и МВД кощын IофхэмкIэ и ГъэIорышIапI ары.

Къэралыгъо программэм хэлэжьэщтым итхын изыфэгъэхьазырын

IэкIыб къэралым щыпсэурэ тихэгъэгогъум Къэралыгъо программэм игъэцэкIэнкIэ ренэу зыщыпсэурэ хэгъэгум щыIэ уполномоченнэ къулыкъум ышъхьэ­кIэ зыфигъэзэн ыкIи Къэралыгъо программэм хэлэжьэнэу зэрэфаер къэзыушыхьатырэ тхылъыр шъошэ гъэнэфагъэу щыIэм диштэу ритын фае.

Тихэгъэгогъоу Урысые Федерацием щыпсэурэм Къэралыгъо программэм хэлэжьэнымкIэ лъэIу тхылъыр ариты зыхъукIэ, документ гъэнэфагъэхэр ­Адыгэ Республикэм и МВД кощын Iоф­хэмкIэ и ГъэIорышIапIэ IэкIегъахьэх.

Къэралыгъо программэм хэлажьэ зэрэшIоигъор къэзыушыхьатырэ лъэIу тхылъыр заштэрэ нэужым мы къыкIэлъыкIохэрэм язэгъынхэ фае:

кощын IофхэмкIэ шъолъыр программэр гъэцэкIэгъэнымкIэ пшъэдэкIыжь зыхьырэ уполномоченнэ къулыкъум (тихэгъэ­гогъур кощын IофхэмкIэ шъолъыр программэм дештэмэ е демыштэмэ);

мы Iофым фэгъэзэгъэ урысые къэралыгъо къулыкъухэм IэкIыб къэралым игражданин Урысые Федерацием къи­хьанымкIэ пэрыохъу хъун зылъэкIыщт горэхэр щыIэхэмэ, е Урысые Федерацием пIэлъэ гъэнэфагъэкIэ щыпсэунымкIэ, е «вид на жительство» зыфаIорэр къыратынымкIэ Iизынэу иIэр щыгъэзыегъэнымкIэ лъапсэ щымыIэмэ.

ЛъэIу тхылъым зыхэплъэхэрэ нэужым Адыгэ Республикэм и МВД кощын Iоф­хэмкIэ и ГъэIорышIапIэ а цIыфыр Къэралыгъо программэм зэрэхэлажьэрэр къэзыушыхьатырэ тхылъыр етыгъэным е ратынэу зыкIамыдагъэм ехьылIэгъэ унашъо ешIы. ЛъэIу тхылъыр къэзытыгъэм унашъоу ашIыгъэмкIэ етIанэ макъэ рагъэIужьы.

Къэралыгъо программэм хэлэжьэн зэрэфитыр къэзыушыхьатырэ тхы­лъыр зэраратырэр, зэрарамытырэр, аратыгъэм кIуачIэ имыIэжь ­зэрэхъурэр

Къэралыгъо программэм хэлэжьэн зэрэфитыр къэзыушыхьатырэ тхылъыр зэраратырэм, зэрарамытырэм, аратыгъэм кIуачIэ имыIэжь зэрэхъурэм яхьы­лIагъэу Адыгэ Республикэм кощын Iоф­хэмкIэ и ГъэIорышIапIэ унашъо ешIы. Мыщ дэжьым къыдалъытэ кощын Iоф­хэмкIэ шъолъыр программэр пхырыщыгъэнымкIэ пшъэдэкIыжь зыхьырэ уполномоченнэ къулыкъум иунашъо.

Къэралыгъо программэм зэрэхэла­жьэрэр къэзыушыхьатырэ тхылъыр къы­ратырэп, ыпэкIэ къыратыгъэгъэ тхы­лъым кIуачIэ имыIэжь мэхъу, джащ фэдэу иунагъо щыщэу Къэралыгъо программэм хэлэжьэнымкIэ лъэIу тхылъым ритха­гъэм истатус кIуачIэ иIэжьырэп мыщ фэдэу зыхъукIэ:

Урысые Федерацием иконституционнэ гъэпсыкIэ ылъапсэхэр зэхъокIыгъэнхэм ар къыфаджэмэ, Урысые Федерацием е Урысые Федерацием ис цIыфхэм ящынэгъончъагъэ зэрар къыфэзыхьын зылъэкIыщт зекIуакIэхэр къыхафэхэмэ;

террористическэ (экстремист) актхэм мылъку апэIуигъахьэ, рихъухьэхэ хъумэ, ащ фэдэ актхэм язехьанкIэ ишIуагъэ аригъэкIымэ е нэмыкI шIыкIэхэмкIэ IэпыIэгъу афэхъумэ;

Къэралыгъо программэм хэлэжьэнымкIэ лъэIу тхылъыр ытыным ыпэкIэ илъэситфым къыкIоцI Урысые Федерацием къырафыгъагъэу щытмэ;

документ нэпцIхэр къытыгъэхэмэ е ышъхьэ фэгъэхьыгъэу къэбар мышъыпкъэ алъигъэIэсыгъэмэ;

бзэджэшIэгъэ хьылъэ е хьылъэ дэдэ зэрэзэрихьагъэм пае Урысые Федерацием ихьыкум ышIыгъэ унашъоу кIуачIэ зиIэ хъугъэмкIэ иIоф аIуагъэу щытмэ;

Урысые Федерацием е ащ къыхимыубытэрэ чIыпIэхэм бзэджэшIэгъэ хьылъэ е хьылъэ дэдэ ащызэрихьагъэу зэрэщытым пае тыралъхьэгъэ пIалъэр ымыухыгъэу е тырамыхыжьыгъэу щытмэ;

IэкIыб къэралхэм къарыкIыгъэ цIыфхэу Урысые Федерацием щыпсэухэрэм афэгъэхьыгъэ хэбзэгъэуцугъэу Урысые Федерацием кIуачIэ щызиIэр ыукъуа­гъэу, е наркотикхэр, психотропнэ веществохэр, къэкIыхэрэм ащыщхэу наркотик зыхэлъ­хэм ящэн-щэфын хэщагъэу, е ахэр ыгъэфедагъэхэу къычIагъэщи, зы илъэсым къыкIоцI мызэу-мытIоу административнэ пшъэдэкIыжь рагъэхьыгъэу щытмэ;

Урысые Федерацием икIи, ренэу щыпсэунэу нэмыкI къэралыгъо горэм кIуагъэмэ;
Адыгэ Республикэм и МВД кощын IофхэмкIэ и ГъэIорышIапIэ иучет зыхагъэуцуагъэм ыуж мэзихым ехъугъэу Урысые Федерацием къыхимыубытэрэ чIыпIэ горэм щэпсэумэ.

Мы къэтпчъыгъэхэм анэмыкIэу Къэралыгъо программэм зэрэхэлажьэрэр къэзыушыхьатырэ тхылъыр рамытэу, ыпэкIэ ратыгъагъэм кIуачIэ имыIэжьэу, джащ фэдэу иунагъо щыщэу лъэIу тхы­лъым ритхагъэм унагъом зэрэщыщымкIэ истатуси кIуачIэ имыIэжь зыхъурэр мыщ фэдэ лъэныкъохэм япхыгъэ унашъохэр заштэхэкIэ ары:

IэкIыб къэралым ицIыф Урысые Федерацием къэкIоныр (щыпсэуныр) зэра­шIомыигъом;

IэкIыб къэралым ицIыф хабзэм къызэрэдилъытэрэм тетэу Урысые Федерацием игъэкIыжьыгъэным;

IэкIыб къэралым ицIыф Урысые Федерацием къихьанымкIэ Iизын емытыгъэным;
кощын IофхэмкIэ шъолъыр программэм къыдилъытэхэрэм зэрадимыштэрэм.

Къэралыгъо программэм зэрэхэла­жьэрэр къэзыушыхьатырэ тхылъыр зэраратырэр

Къэралыгъо программэм зэрэхэла­жьэрэр къэзыушыхьатырэ тхылъыр ра­мытынымкIэ ушъхьагъу щымыIэ хъумэ, Урысыем и МВД ичIыпIэ къулыкъу унашъо ешIы Къэралыгъо программэм зэрэхэлажьэрэмкIэ тхылъыр ратынэу, ащ нэужым тихэгъэгогъур рагъэблагъэ Къэралыгъо программэм зэрэхэлажьэрэр къэзыушыхьатырэ тхылъыр ратыжьынэу. Арэущтэу зыхъукIэ, Къэралыгъо программэм хэлажьэ зэрэшIоигъомкIэ ти­хэгъэгогъум лъэIу тхылъыр, ащ игъусэ нэмыкI документхэр къызитыгъэхэм ыуж мэфэ 60-м шIомыкIэу Къэралыгъо программэм хэлажьэ зэрэхъугъэмкIэ тхы­лъыр ратыжьы.

Тхылъым ыIапэ кIедзэжьы Къэралыгъо программэм игъэцэкIэнкIэ IэкIыб къэралым иуполномоченнэ къулыкъу (Урысые Федерацием къыхимыубытэрэ чIыпIэхэм документхэр ащигъэхьазырхэ зыхъукIэ) ипащэ, е Адыгэ Республикэм и МВД кощын IофхэмкIэ и ГъэIорышIапIэ иIэшъхьэтет, е ащ игуадзэ (Урысые Федерацием и Къэралыгъо программэ зэрэхэлажьэрэр къэзыушыхьатырэ тхылъыр агъэпсы зыхъукIэ), етIанэ ежь ышъхьэкIэ а цIыфыр къызыкIокIэ тхы­лъыр ратыжьы.
IэкIыб къэралым ицIыф (гражданствэ зимыIэ цIыфым) Урысыем къыхимыубытэрэ чIыпIэм Къэралыгъо программэм зэрэхэлажьэрэмкIэ тхылъыр къыщыратыжьы зыхъукIэ, IэкIыб къэралым къи­кIыгъэм Урысые Федерацием правовой лъэныкъомкIэ чIыпIэу щиубытырэм фэгъэхьыгъэу Урысые Федерацием ихэ­бзэгъэуцугъэ къыриIотыкIыхэрэр, Урысые Федерацием узэрикIыщт ыкIи укъызэрихьащт шIыкIэр къыфызэхафых.

ИщыкIагъэу зыщыхъурэм Къэралыгъо программэм хэлажьэрэмрэ ащ иунагъо исхэмрэ Урысые Федерацием къэкощыжьынхэм пае документхэр афагъэ­псых, мыщ къыхеубытэ визэри (ищыкIагъэ хъумэ).

(Джыри къыкIэлъыкIощт).