Адыгэ Республикэм иминистрэхэм я Кабинетрэ я Администрацие ипэщэщтыр агъэнэфагъ

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат мэкъуогъум и 15-м Адыгэ Республикэм иминистрэхэм я Кабинет хэтхэр Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипэщакIэ нэIуасэ фишIыгъэх. Администрацием ипащэ хъуагъэр ТхьакIущынэ Мыхьамэт.

Ар зэрагъэнафэрэм ехьылIэгъэ Указым Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэр мэкъуогъум и 15-м кIэтхэжьыгъ.

КъумпIыл Мурат Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипэщакIэ IофшIэным зэрэфытегъэпсыхьагъэр, пшъэдэкIыжьышхо зыпылъ IэнатIэм ТхьакIущынэ Мыхьамэт къытефэрэ пшъэрылъхэр зэрэщигъэцэкIэщтхэм ицыхьэ зэрэтелъыр хигъэунэфыкIыгъ.

ТхьакIущынэ Мыхьамэт Аслъан ыкъор 1973-рэ илъэсым мэзаем и 8-м къэхъугъ. Апшъэрэ гъэсэныгъитIу — экономикэ, юридическэ гъэсэныгъэ иI, юридическэ шIэныгъэхэмкIэ доктор. Мыекъопэ районым ипрокурор иIэпыIэгъоу ригъажьи, прокуратурэм икъулыкъухэм илъэс 20 ащылэжьагъ. ЫпэкIэ Тэхъутэмыкъое районым ипрокуратурэ ипэщагъ, ведомствэ тынхэр иIэх.