Адыгэ быракъым и Мафэ ипэгъокI

Дунаим щагъэбыбатэ

Адыгэ быракъыр Темыр Америкэм, Африкэм, Мыекъуапэ тыгъуасэ ащаIэтыгъ. Iофтхьабзэхэм ахэлэжьагъэхэр телефонкIэ зэфытеуагъэх.

Африкэм икъушъхьэ анахь лъагэу Килиманджаро Дунэе зекIоным хэлажьэхэрэм адыгэ быракъыр щаIэтыгъ. Купым хэтых Великобританием, США-м, Марок­ко, Кением, Танзанием, Адыгеим къарыкIыгъэхэр. Республикэм илIыкIохэм Максим Богатыревыр япащ. Ащ игъусэх ЛIышэ Айдэмыр, Александр Бородиныр, адыгэ пшъашъэу Айдин Аннэ.

Темыр Америкэм адыгэ быракъыр щызыIэтыгъэр Константин Шинкевичыр ары, вулканэу Орисабэ ышыгу тилъэпкъ быракъ щигъэIагъ.

Республикэ общественнэ движениеу «Адыгэ Хасэм» хэтхэм адыгэ быракъыр Мыекъуапэ щаIэтыгъ.

— ЗекIо ежьэнхэм ыпэкIэ Адыгэ Хасэм зэIукIэ щыкIуагъ. Адыгэ быракъым и Мафэ фэ­гъэхьыгъэу Темыр Америкэм, Африкэм, Адыгеим мэлылъфэ-гъум и 5-м лъэпкъ быракъыр ащаIэтынэу мурад зэдашIыгъ, — къытиIуагъ Адыгэ Хасэм игъэ­цэкIэкIо куп хэтэу Къуижъ Къэплъан. — Адыгэ быракъхэр, гъэ­зетэу «Адыгэ макъэм» иномерхэм ащыщхэр, нэмыкI нэпэеплъ пкъыгъохэр зыдаштагъэх.

— Адыгэ быракъым дунаим тет тилъэпкъэгъухэр зэфещэх, — республикэм ис лъэпкъхэм язэфыщытыкIэхэр егъэпытэх. Быракъ уцышъоу жъогъо 12-р, щэбзищыр къызыхэлыдыкIырэр дунаим ичIыпIэ анахь лъагэхэм ащаIэтыгъэу зэращыбыба­тэрэм тегъэгушхо, — къытиIуагъ Адыгэ Хасэм итхьаматэу ЛIы­мыщэкъо Рэмэзан.

Сурэтым итхэр: адыгэ быракъыр Килиманджаро щаIэтыгъ.

ЕМТIЫЛЪ Нурбый.