Адыгеир зэIукIэпIэшIу афэхъу

Урысые Федерацием кушъхьэфэчъэ спортымкIэ изэнэкъокъу Адыгэ Республикэм игъогухэм ащэ­кIо. Хэгъэгум ишъолъыр 40-м нахьыбэмэ къары­кIыгъэ бзылъфыгъэхэр зэIукIэгъухэм ахэлажьэх.

Зэнэкъокъур зэрэрагъажьэ­рэм фэгъэхьыгъэ зэхахьэу Мые­къуапэ изыгъэпсэфыпIэ парк дэхьэгъум щызэхаща­гъэм нэбгырабэ щызэIукIагъ. Зэнэ­къокъухэм япащэу Анатолий Лелюк ипэублэ гущыIэ къыщы­хигъэщыгъ Урысыем щыцIэрыIо спортсменкэхэр Мыекъуапэ зэрэщызэIукIагъэхэр.

Адыгэ Республикэм физ­куль­турэмкIэ ыкIи спортымкIэ и Ко­митет итхьаматэ игуадзэу Андрей Бородиным зэрэхигъэу­нэфыкIыгъэу, тиреспубликэ и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат, Правительст­вэм яшIуагъэкIэ кушъхьэфэчъэ спортымкIэ зэнэкъокъухэр дэ­гъоу Адыгеим щызэхащагъэх. Урысыем ишъолъыр 40-м ехъу­мэ къарыкIыгъэхэу спортсменки 120-рэ тиреспубликэ игъо­гухэм ­ащызэнэкъокъух.

Апэрэ мафэм зэIукIэгъухэр «Мыекъуапэ — Джаджэ — Мыекъуапэ» зыфиIорэ гъогум гъэшIэгъонэу щыкIуагъэх. Санкт-Петербург щыщэу Анастасия Яковенкэм апэрэ чIыпIэр къыдихыгъ. Адыгэ Республикэм икомандэ хэтэу Светлана Кузнецовам ятIонэрэ чIыпIэр къыфагъэшъошагъ.

Мыекъуапэ икIыхи Апшеронскэ екIурэ гъогум спортсменкэхэр щызэнэкъокъугъэх. Кило­метрэ 87-рэ къызакIум Адыге­им щыщэу Елизавета Ошурко­вам тыжьын медалыр къыдихыгъ.

Километри 10 хъурэ гъогум тыгъуасэ щызэнэкъокъугъэх, Анастасия Яковенкэм апэрэ чIыпIэр ыхьыгъ, Светлана Куз­нецовар ятIонэрэ хъугъэ. Елизавета Ошурковар я 6-рэ чIы­пIэм щыI.

— Урысыем изэнэкъокъу гъубдж мафэм тыухыщт, — къытиIуагъ Анатолий Лелюк. Мыекъопэ районым игъогухэм зэIукIэгъухэр ащыкIощтых.