Адыгеим сомэ миллиони 3-м ехъу къыфыхагъэкIыщт

Ушэтынхэр зыщатыщт чIыпIэхэмрэ къэбархэр ­зыщызэфахьысыжьырэ республикэ гупчэмрэ нахь зэтегъэпсыхьэгъэнхэм пае 2017-рэ илъэсым Адыгеим сомэ миллиони 3-рэ мин 228-рэ къыфы­хагъэкIыщт.

Ащ щыщэу сомэ миллиони 2-рэ мин 778-р къэралыгъо субсидиех, сомэ мин 450-р рес­публикэ бюджетым имылъку.

Адыгэ Республикэм гъэсэны­гъэмрэ шIэныгъэмрэкIэ и Министерствэ зэрэщыхагъэунэ­фыкIыгъэмкIэ, гъэсэныгъэм хэ­хъоныгъэ зэрэрагъэшIыщт федеральнэ программэу 2016 — 2020-рэ илъэсхэм ателъытагъэм республикэр зэрэхэлажьэрэм ар къыкIэкIуагъ.

Шъугу къэтэгъэкIыжьы, мы илъэсым игъэтхапэ Адыгэ Рес­публикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл ­Мурат Рособрнадзорым ипащэу Сергей Кравцовым зэрэ­IукIэгъагъэр, къэралыгъо ушэтын зыкIхэр Адыгеим дэгъоу щызэхащэхэу ащ зэрэхигъэу­нэфыкIыгъагъэр. ГъэрекIо къэралыгъо кIэух аттестациер дэ­гъоу зыщыкIогъэ шъолъырхэм тиреспубликэ ахалъытэгъагъ. Джащ фэдэу КъумпIыл Мурат Урысые Федерацием гъэсэны­гъэмрэ шIэныгъэмрэкIэ и Министерствэ ипащэ бэмышIэу Москва зыщыIокIэм, гъэсэны­гъэм Адыгеим хэхъоныгъэ ще­гъэшIыгъэным иIофыгъохэм атегущыIэгъагъэх. ЗэдэгущыIэ­гъум икIэуххэм атетэу Къум­пIыл Мурат республикэ къулы­къухэм япащэхэм пшъэрылъ афишIыгъ федеральнэ проект­хэмрэ программэхэмрэ чанэу ахэлэжьэнхэу.

Гъэсэныгъэм хэхъоныгъэ егъэшIыгъэнымкIэ гухэлъ гъэнэ­фагъэ зиIэ федеральнэ программэу 2016 — 2020-рэ илъэс­хэм ателъытагъэм зэрэхэлажьэрэм ишIуагъэкIэ гъэсэны­гъэм изытет шъыпкъэ уасэ ра­тыным, кIэлэегъаджэхэм яIэ­пэ­Iэсэныгъэ зыкъырагъэIэтыным тегъэпсыхьэгъэ програм­макIэхэр къыхахын алъэкIыщт, — хигъэунэфыкIыгъ Адыгэ Республикэм гъэсэныгъэмрэ шIэ­ныгъэмрэкIэ иминистрэу КIэ­рэщэ Андзаур.

Министрэм зэрэхигъэунэ­фыкIыгъэмкIэ, я 11-рэ классхэм арысхэм ушэтынхэр чIы­пIэ шъхьаIи 10-мэ, я 9-рэ классхэм арысхэм чIыпIэ шъхьаIэ 17-мэ ащатын алъэ­кIыщт.

Джащ фэдэу шIыкIакIэхэм ягъэфедэн, я 7 — 8-рэ классхэм арысхэм адыгабзэмкIэ ыкIи литературэмкIэ яшIэны­гъэ­хэм уасэ ятыгъэным те­гъэ­псы­хьэгъэ Iофтхьабзэхэм ­язэ­хэщэн, гъэсэныгъэм фэ­гъэзэгъэ IофышIэхэм яIэпэIэсэ­ныгъэ зыкъегъэIэтыгъэным те­гъэ­псыхьэгъэ программэхэм якъы­хэхын пае сомэ мин 740-рэ республикэ бюджетым къыха­гъэкIыщт. КIэлэегъэджэ 500-м ехъу мэзаем рагъэджэ­гъах.