Адыгеим и ЛIышъхьэ хэлэжьагъ

Урысые Федерацием и Президентэу Вла­димир Путиным ипшъэрылъкIэ УФ-м и Пре­зидент и Полномочнэ лIыкIоу Къыблэ федеральнэ шъолъырым щыIэ Владимир Устиновым видеоселектор шIыкIэм тетэу ты­гъуасэ цIыфхэр ригъэблэгъагъэх. Шъолъырым хэхьэрэ субъектхэм япащэхэр Iоф­тхьа­бзэм хэлэжьагъэх.

Теуцожь районым ит къуа­джэу Нэшъукъуае дэс бзылъфыгъэ ныбжьыкIэу зянэ-зятэ зимыIэжьхэм ыкIи ахэр зышъхьащымытхэм якуп хахьэрэм псэупIэ зэригъэгъотынымкIэ IэпыIэгъу къыфэхъунхэу пащэхэм зафигъэзагъ.

— Мы Iофыгъор зэхэфыгъэ хъуным тынаIэ тет. Джырэ уахътэ бзылъфыгъэр зыщыпсэурэ ыкIи зыдэтхэгъэ Тэхъутэмыкъое районым иадминистрациерэ гъэцэкIэкIо хэбзэ уполномоченнэ къулыкъухэмрэ Iофыр зэхафыгъ. 2020-рэ илъэсым иапэрэ мэзих ащ псэупIэ иIэ хъущт, — къыIуагъ Адыгеим и ЛIышъхьэу КъумпIыл Мурат.

Зянэ-зятэ зимыIэжьхэм ыкIи ахэр зышъхьащымытхэм псэупIэ ягъэгъотыгъэным иIофыгъо республикэм игъэцэкIэкIо хэбзэ къулыкъухэм мэхьанэшхо раты. Мы пшъэрылъым изэшIохын илъэс къэс сомэ миллиони 150-рэ шъолъырым щыпэIуагъахьэ. Непэрэ мафэм ехъулIэу псэупIэ къаратынымкIэ фитыныгъэ зиIэхэм ащыщэу 93-мэ ар арагъэгъотыгъ.

ТХЬАРКЪОХЪО Адам.