Адыгеим и ЛIышъхьэ федеральнэ форумым хэлэжьагъ

Адыгеим и ЛIышъхьэу КъумпIыл Мурат федеральнэ форумэу «Производительность 360» зыфиIорэм тыгъуасэ хэлэжьагъ. Лъэпкъ проектэу «Производительность труда и поддержка занятости» зыфиIорэм диштэу IофшIэным ишIуагъэ зыкъегъэIэтыгъэным епхыгъэхэ зигъо Iофыгъохэм мыщ щатегущыIагъэх.

Урысыем экономикэ хэхъоныгъэмкIэ и Министерствэрэ АНО-у «Федеральный центр компетенций в сфере производительности труда» зыфиIорэмрэ зэгъусэхэу ятIонэрэу мыщ фэдэ форумыр къалэу Нижний Новгород щызэхащагъ. Нижегород­скэ хэкум и Правительствэрэ къэралыгъо корпорациеу «Росатом» зыфиIорэмрэ ащкIэ IэпыIэгъу къафэхъугъэх. Нэбгырэ 600 фэдиз: федеральнэ структурэхэм яIэшъхьэтетхэр, министрэхэр, къэралыгъо корпорациехэм япащэхэр, губернаторхэр, предприятиешхохэм ядиректорхэр форумым хэлэжьагъэх.

Федеральнэ пащэхэр: Урысые Федерацием и Президент и Администрацие ипащэ иапэрэ гуадзэу Сергей Кириенкэр, Урысые Федераци­ем и Правительствэ и Тхьаматэ иапэрэ гуа­дзэу, Урысые Федерацием финансхэмкIэ иминистрэу Антон Силуановыр, Урысые Федерацием экономикэ хэхъоныгъэмкIэ иминистрэу Максим Орешкиныр, Урысые Федера­цием псауныгъэр къэухъумэгъэнымкIэ иминистрэу Вероника Скворцовар, къэралыгъо корпорациеу «Росатомым» игенеральнэ директорэу Алексей Лихачевыр, IофшIэным ипроизводительносткIэ компетенциехэм я Федеральнэ гупчэ игенеральнэ директорэу Николай Со­ломон зыхэлэжьэгъэ­хэ пленарнэ зэхэсыгъуи тыгъуасэ щыIагъ.

Лъэпкъ проектыр шъолъырхэм зэращыпхыращырэм, промышленностымкIэ, гъэсэныгъэмкIэ, псауныгъэм икъэухъумэнкIэ ыкIи нэмыкI лъэныкъохэмкIэ кIэу ашIэхэрэм форумым щатегущыIагъэх.

Форумым хэлэжьагъэхэр Нижний Новгород ипредприятиехэу зимылъку кIэзыугъуаехэрэм ащыIагъэх.