Адыгеим гъомылапхъэу IуигъэкIырэр нахьыбэ ышIыщт

Адыгеим IэкIыб къэралхэм аIэкIигъэхьэрэ товархэм ахэхъо зэпыт.

Адыгэ Республикэм экономикэ хэхъоныгъэмкIэ ыкIи сатыумкIэ и Министерствэ къызэритыгъэмкIэ, 2018-рэ илъэсым доллар миллион 39,68-рэ фэдиз хъурэ товархэр IэкIыб къэралхэм ащ аIэкIигъэхьагъ. 2017-рэ илъэсым елъытыгъэмэ, ар зэрэхъурэр проценти 101,9-рэ.


2019-рэ илъэсым иапэрэ кIэлъэныкъо доллар миллион 14,37-рэ фэдиз зытефэрэ товарыр IуагъэкIыгъ. НахьыбэмкIэ ахэр гъомылапхъэх (процент 84-р). Республикэ проектэу «АПК-м ипродукцие IугъэкIыгъэныр» зыфиIорэм тегъэпсыхьагъэу 2024-рэ илъэсым ехъулIэу IэкIыб къэралхэм аIэкIагъахьэрэ продукциер США-м идоллар миллион 36,2-м нэсыщт. Тызхэт 2019-рэ илъэсым Адыгеим мурад ышIыгъ IуигъэкIырэр США-м идоллар миллион 28,7-м нигъэсынэу. Ащ пае тыгъэгъэзэ дагъэу, пынджэу, зернэу, адыгэ къуаеу нэмыкI чIыпIэхэм аIэкIигъахьэрэр на­хьыбэ ышIыщт.

Адыгэ Республикэм и ЛIы­шъхьэ ипресс-къулыкъу къызэ­ритыгъэмкIэ, продукцием идэ­гъугъэрэ ибагъэрэ нахь ахагъэ­хъоным пае Iофтхьэбзэ гъэнэфагъэхэр зэрахьащтых, къэралыгъом иIэпыIэгъуи ащкIэ игъэ­кIотыгъэу къызфагъэфедэщт. Мы аужырэ илъэсхэм мэкъумэщ продукциер къэзышIыхэрэм техникакIэр, джащ фэдэу былым лъэпкъышIухэр къызIэкIагъэхьагъэх, АПК-м ипредприятиехэр уахътэм диштэу зэтырагъэпсы­хьэх.

А пстэуми яшIуагъэкIэ рес­пуб­ликэм къыщыдагъэкIырэ продукциер нэмыкIхэм янэкъокъун ылъэкIынэу щыт, цIыфхэри нахь къыкIэупчIэх. Республикэм къыщыдагъэкIырэр зыIэкIагъахьэ­хэрэм япчъагъэ нахьыбэ ашIыгъ. Ащ нэмыкIэу хэгъэгум къыща­гъэхьазырырэ гъомылапхъэр на­хьыбэу ыкIи нахь чыжьэу IугъэкIыгъэнымкIэ амалыкIэхэр джыри щыIэх.

Адыгэ Республикэм
и ЛIышъхьэ
ипресс-къулыкъу