АдыгеимкIэ апэрэу

Мыекъопэ гимназиеу N 22-м ия 8-рэ класс щеджэрэ Нэныжъ Пщымафэ хьисапымкIэ я IX-рэ олимпиадэу Леонард Эйлер ыцIэкIэ зэхащэрэм Ады­геимкIэ апэрэу хагъэунэ­фыкIырэ чIыпIэр щиубытыгъ, я III-рэ степень зиIэ диплом къыфа­гъэшъошагъ. КIалэр гимназием дакIоу республикэ-естественнэ хьисап еджа­пIэми дэгъоу щеджэ.

Олимпиадэу Л. Эйлер ыцIэ зыхьырэр я 8-рэ классхэм апае 2008-рэ илъэсым къыще­гъэ­жьа­гъэу зэхащэ. Ар кIэлэ­еджакIохэм хьиса­пымкIэ я Урысые олимпиадэу я 9 — 11-рэ классхэр зыхэлажьэхэрэм фагъадэ. Мыщ гъэцэкIэнэу къащаратыхэрэр къиных ыкIи дэгъу дэдэу хьисапым уфэхьазырын фае.

2016 — 2017-рэ илъэс еджэгъум я 9-рэ олимпиадэр Урысыем, Казахстан, Болгарием ыкIи Литвам ащыкIуа­гъэх. КIэух зэфэхьысыжьхэмкIэ I-рэ степень зиIэ дипломхэр нэбгыри 7-у задачи 7 нахь мымакIэу къэзышIы­гъэхэм ыкIи балл 56-м щыщэу 48-м нэсэу къэзыхьыгъэхэм аратыгъэх. Я II-рэ степень зиIэ дипломхэр кIэлэеджэ­кIо 13-у балл 37-м къыщегъэжьагъэу 44-м нэзыгъэсыгъэхэм афагъэшъоша­гъэх. Я III-рэ степень зиIэ диплом 12 балл 32-м къыщегъэжьагъэу 36-м нэс изыгъэкъугъэхэм аратыгъэх.

ТекIоныгъэр къыдэзыхыгъэхэмрэ призер хъугъэхэмрэ хьисапым фэгъэ­хьыгъэ тхылъхэр ращэфынхэу сертификатхэр къаратыгъэх ыкIи мэкъу­огъум ГъэсэпIэ гупчэу «Сириус» зы­фиIоу Шъачэ дэтым рагъэблэгъа­гъэх.

Сихъу Гощнагъу.