АдыгабзэкIэ къэгущыIагъэх

Мультфильмэу «Фиксики» зыфиIорэр адыгабзэкIэ зэрадзэкIыгъ. КIэлэцIыкIухэм якIэсэ персонажхэр джы тиныдэлъфыбзэкIэ къадэгущыIэщтых.

Адыгабзэмрэ тхыбзэмрэ я Мафэ мультфильмыр респуб­ликэм къыщагъэлъэгъуагъ.

Адыгэ Республикэм и ЛIышъхьэу КъумпIыл Мурат дэжь адыгабзэмкIэ Совет щызэха­щагъ. Республикэм ипащэ игукъэ­кIыкIэ ныдэлъфыбзэм изэгъэшIэн ыкIи ащ икъэухъумэн фэгъэ­зэгъэщт Проектнэ офис агъэпсыгъ. Гуманитар ушэтынхэмкIэ Адыгэ республикэ институтым ипащэу ЛIыIужъу Адам ащ пащэу фашIыгъ.

— Адыгабзэм имэхьанэ зыкъегъэIэтыгъэным, тхылъыкIэхэр, методическэ материалхэр гъэхьазырыгъэнхэм тынаIэ тедгъэтыным мэхьанэшхо иI, — къыIуагъ КъумпIыл Мурат.

Проектнэ офисым Iофэу ышIагъэхэм ащыщ къыткIэхъухьэрэ лIэужхэр абзэ рыгущыIэнхэм фэIорышIэщт серие 52-рэ хъурэ мультфильмэу «Фиксики» зыфиIоу адыгабзэкIэ зэрадзэкIы­гъэр.

СериитIу къагъэлъэгъоным фагъэхьазырыгъ, адрэхэр чэзыу-чэзыоу къыдагъэкIыщтых.

— ТIуагъэр тэгъэцэкIэжьы. Тисабыйхэм яныдэлъфыбзэ нахь куоу зэрагъэшIэным пае мультфильм пчъагъэ адыгабзэкIэ зэтэдзэкIыжьы. Апэрэ пычыгъор шъосэгъэлъэгъу! Бэ темышIэу шъуисабыйхэр къыкIэлъыкIорэ пычыгъохэми яплъынхэ алъэ­кIыщтых, — инстаграм нэкIубгъом цIыфхэм закъыщыфигъэ­загъ КъумпIыл Мурат.

Гуманитар ушэтынхэмкIэ Адыгэ республикэ институтым «Адыгские народные сказки», кIэлэцIыкIухэм ыкIи ны-тыхэм апае «Хэт анахь лъэш?» зыфиIорэ тхылъхэр къыдагъэкIыгъэх.

Ахэр Мыекъуапэ тхылъхэр зыщащэрэ тучанэу дэтхэм ате­лъых, ыпэкIэ зигугъу къэтшIыгъэ институтми чIэлъых. Аудио пшысэхэр къыдагъэкIынхэу агъэхьазырых. Гуманитар ушэтынхэмкIэ Адыгэ республикэ институтым иIофышIэу, филологие шIэныгъэхэмкIэ кандидатэу Биданэкъо Марзет ипроектэу «Адыгейский язык за 30 дней» зыфиIорэм игъэцэкIэн аухыгъ. Урысхэу адыгабзэр зэзыгъашIэ зышIоигъохэм ар атегъэпсы­хьагъ. Ащ фэдэхэм апае гуманитар ушэтынхэмкIэ Адыгэ рес­публикэ институтым курсхэр щызэхащэх. Ахэр мэлылъфэгъум и 2-м рагъэжьэщтых.

Гъонэжьыкъо Сэтэнай.