Къэбэртэе-Бэлъкъар Республикэм щыщ хъулъ­фыгъэу шъон пытэхэмрэ спирт зыхэт продукцие­хэм­рэ хэбзэнчъэу Адыгеим щыIузгъэкIыщтыгъэм иIоф зэхафыгъ.

АР-м и Кощхьэблэ район хьыкум илъэс 50 зыныбжь хъулъфыгъэу Къэбэртэе-Бэлъкъар Рес­публикэм щыщым иIоф хэ­плъагъ. Къэгъотыжь Замир Урысыем и Уголовнэ кодекс ия 171.3-рэ статья ия 2-рэ Iахь къыщыдэлъы­тэгъэ бзэджэшIагъэр (этиловэ спиртыр, шъон пытэхэр ыкIи спирт зыхэт продукциер фитыныгъэ имыIэу къыдэгъэкIыгъэным, Iугъэ­кIыгъэным епхыгъ) зэрихьагъэу агъэмысагъ.
ЩынэгъончъэнымкIэ Феде­ральнэ къулыкъум АР-мкIэ и ГъэIорышIапIэ иIофышIэхэм З. М. Къэгъотыжьым фитыныгъэ имыIэу, исатыу аримыгъэтхыгъэу этиловэ спирт къызIэкIигъахьи, Адыгэ Республикэм и Кощхьэблэ район ит базэм къыщагъэу къау­бытыгъ.
ЧIыпIэр къызаплъыхьэм автомобиль цистернэр, литритф зэ­рыфэрэ бэшэрэб 400-м ехъоу спирт зыхэт псыр зэрытхэр, ар пстэумкIи литрэ мин 24-рэ фэдиз мэхъу, къагъотыгъэх. Спе­циалистхэм къызэраIорэмкIэ, а зэпстэум сомэ миллионрэ мин 700-м ехъу ауас.
Кощхьэблэ район хьыкумым З. М. Къэгъотыжьыр мысэу ылъы­тагъ ыкIи Урысыем и Уголовнэ кодекс ия 171.3-рэ статья ия 2-рэ Iахь къызэрэдэлъытагъэм тетэу, илъэситIу пшъэдэкIыжь условнэ шIыкIэм тетэу ыхьынэу тырилъхьагъ.
Хьыкумым рихъухьагъэм кIуа­чIэ иIэ хъугъэ.