Къалэу Владивосток щыщ хъулъфыгъэу тер­ро­ризмэм дезыгъаштэрэм иIоф хэплъагъэх.

Къыблэ шъолъыр дзэ хьыкумым (Ростов-на-Дону) къалэу Владивосток щыщ хъулъфыгъэу илъэс 44-рэ зыныбжьым иIоф зэхифыгъ. БзэджэшIагъэ зезыхьагъэхэм пшъэдэкIыжь ягъэхьыгъэнымкIэ Федеральнэ къулыкъум и ГъэIорышIапIэу АР-м щыIэм епхыгъэ хьапсэу N 2-м дэс Алексей Шаневыр Уголовнэ кодексым ия 205.2-рэ статья иапэрэ Iахь къы­щыдэлъытэгъэ бзэджэшIагъэр (террористическэ акт зэхэщэгъэным фэгъэчэфыгъэнхэм, терроризмэм дегъэштэгъэным епхыгъ) зэрихьагъэу агъэмысагъ.
ЩынэгъончъэнымкIэ Феде­ральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, А. Г. Шаневым хьапсэу N 2-м зэрэдэсэу, фашист еплъыкIэхэр зэриIэхэр къыхигъэщыщтыгъ, Урысые Федерацием икурс ыкIи ащ и УIэшыгъэ КIуачIэхэм хэушъхьафыкIыгъэ дзэ операциеу Украинэм щызэха­щагъэм зэрадыримыгъа­штэрэр, Белгородскэ хэкум зэрэтебэнагъэхэр игъоу зэрилъытэрэр шъхьэихыгъэу къыIощтыгъ, терроризмэм пылъхэм ашIэрэр зэ­рэшIотэрэзыр ыушъэфыщтыгъэп.
Къыблэ шъолъыр дзэ хьыкумыр А. Г. Шаневым иIоф зыхаплъэм, Урысыем и Уголовнэ кодекс ия 205.2-рэ статья иапэрэ Iахь къы­зэрэдэлъытагъэм тетэу, илъэситIу пшъэдэкIыжь режим пхъашэ зиIэ хьапсым щихьынэу тырилъхьагъ.
ЩынэгъончъэнымкIэ Федеральнэ къулыкъум
АР-мкIэ и ГъэIорышIапIэ ипресс-къулыкъу