Транспорт зэфэшъхьафхэм бзэджашIэхэр янэцIыхэу бэрэ къыхэкIы. Ахэр зиехэм шъэфэу алъэплъэх, машинэхэр зыдагъэуцурэ чIыпIэхэри зэрагъашIэх. НахьыбэрэмкIэ рафыжьэхэрэр пкъырыпкъэу зэхахыхэшъ, нэмыкIхэм пыутэу аращэжьы.

Адыгэ Республикэм хэгъэгу кIоцI IофхэмкIэ и Министерствэ изэфэхьысыжьхэм къызэрагъэ­лъагъоу, мыщ фэдэ бзэджэшIа­гъэхэр зезыхьэхэрэм автомо­бильхэр зиехэм ягугъуемылIы­ныгъэрэ ямылъку икъу фэдизэу зэрэфэмысакъыхэрэмрэ ­къызфагъэфедэ.
ТIогъогогъо рафыжьагъэх
Мыщ фэдэ бзэджэшIагъэ бэмышIэу къалэу Мыекъуапэ ща­гъэунэфыгъ. Тхьаусыхэ тхылъ полицием къезыхьылIэгъэ хъулъфыгъэм къызэриIотагъэмкIэ, автомобилэу зэрысыгъэм ипчъэхэр мыгъэпытагъэхэу урам горэм къызытыренэм, ащ бзэджашIэр къекIугъ ыкIи рифыжьагъ. Ау ар чыжьэу нэсын ылъэкIыгъэп, метрэ шъэ заулэ нахь ымычъыгъэу аварием хэфагъ.
— Сыхьат заулэкIэ мы бзэджэшIагъэр зезыхьагъэр дгъэунэфыгъ ыкIи къэтыубытыгъ. Илъэс 20 зы­ныбжь кIалэу ыпэкIэ мызэу, мытIоу уголовнэ пшъэ­дэкIыжь зыхьыгъэу къалэу Мыекъуапэ щыпсэурэр арэу ар къычIэкIыгъ. А ышIагъэмкIэ зыкъыIо­тэ­жьыгъ, джы ащ нэмыкI бзэджэшIагъэхэр зэрихьа­гъэмэ тэуплъэкIу, — къаIотагъ Мыекъуапэ иполицие иоперативнэ IофышIэхэм.
Зэгуцафэхэу къаубытыгъэр хэбзэнчъэу зэрэзекIуагъэм къы­хэкIэу ащ ылъэныкъокIэ хэгъэгу кIоцI IофхэмкIэ Мыекъопэ отделым уголовнэ Iоф къызэIуихыгъ. Хабзэу щыIэм къызэрэдилъытэу, илъэситфым нэсэу хьапс ты­ралъхьан алъэкIыщт.
Мыщ ехьыщыр бзэджэшIагъэ бэмышIэу Тэхъутэмыкъое районым щагъэунэфыгъ. Ащ епхыгъэу мы чIыпIэм щыпсэурэ хъулъ­фыгъэу илъэс 39-рэ зыныбжьыр IэпыIэгъу полицием ирайон отдел къэкIуагъ.

Зэрар зэрахыгъэм хэбзэухъумакIохэм къызэрафиIотагъэмкIэ, IэкIыб къэрал къыща­шIыгъэ иавтомобиль ипчъэхэр ымыгъэпытэхэу урамым ­къызытыренэм, тыгъуакIом ар Iуи­фыгъ.
Уголовнэ лъыхъоным иIофы­шIэхэм джащ лъыпытэу ищыкIэгъэ Iофыгъохэр зэхащагъэх. Ахэм яшIуагъэкIэ районым ит псэупIэ горэм машинэр къыщагъоты­жьыгъ. Нэужым бзэджэшIагъэр зезыхьагъэри къыхагъэщыгъ. Ащ илъэс 29-рэ ыныбжь, мы район дэдэм щэпсэу, ыпэкIэ пчъагъэрэ уголовнэ пшъэдэкIыжь хьыкумым ригъэхьыгъ.
— Машинэр зырефыжьэ нэуж бзэджашIэм зигъэбы­лъыгъ. Ау ар зыдэщыIэр дгъэу­нэфыгъ. Тиотдел къызытэщэм, хъугъэр хъулъ­фыгъэм къыIотагъ. Урамым тетэу кIозэ машинэр ылъэ­гъугъ ыкIи бэрэ емыгупшысэу ар рифыжьагъ, — къыха­гъэщыгъ районым иполицие иIофышIэхэм.
Урысые Федерацием и Уголовнэ кодекс ия 166-рэ статьяу «Хэбзэнчъэу транспортыр зэрэрафыжьагъэр» зыфиIорэм къызэрэдилъытэу, уголовнэ Iоф къы­зэIуахыгъ.
ПшIэн фэе шапхъэхэр
АпэрапшIэу мэкъэшхо къэзыгъэIурэ пкъыгъор хэбгъэуцонэу щыт. Ащ гуадзэ фэпшIыми хъущт рулымрэ нэмыкI пкъыгъоу ыкIоцI итхэмрэ умыгъэфедэшъунхэ зы­шIырэ гъэпытапIэхэр.
А транспортым хэтхэу Iоф ашIэзэ, пчъэхэр къызэрэIукIыхэрэр мытэрэзэу гу лъыптагъэмэ, ахэм яIофшIэн зыгорэм къызэтыригъэуцонэу ыуж итынкIи мэхъу. Арышъ, джащ лъыпытэу ахэр псынкIэу зыгъэтэрэзыщт Iофы­шIэхэм зафэбгъэзэн фае.
Джащ фэдэу «шъэф» системэу зыгорэм иавтомобиль ипчъэхэр къыIупхынхэ е ар зэкIэбгъэнэн умылъэкIын зышIырэр агъэфедэ.
Амал щыIэмэ, спутникым епхыгъэ пкъыгъо хэбгъэуцоми хъущт, ащ транспортыр зыдэщыIэм ренэу улъигъэплъэн ылъэкIыщт.
Машинэм пае гараж щымыIэмэ, мэзахэм ар хэтынэу щытэп. Къэ­рэгъул зиIэ чIыпIэ гъэнэфагъэм дэбгъэуцожьымэ нахьышIу.
Тучанхэм ыкIи хъызмэтшIапIэхэр зычIэт унэхэм атет видео­камерэхэм уащыгугъыпэ хъущтэп, сыда пIомэ нахьыбэрэмкIэ ахэм къагъэлъагъорэр макIэ ыкIи чIэ­хьэгъу къодыер ары зыфэгъэ­загъэхэр.
Iофхэр уиIэхэу чIыпIэ горэм окIомэ, автомобилыр зэхэгъэ­нагъэу къэбгъэнэнэу щытэп, ащ IункIыбзэри къипхын фае. Ащ къыранэхэрэп уасэ зиIэ хьап-­щыпхэмрэ документ зэфэшъхьаф­хэмрэ.
Автомобилыр бзэджашIэхэм рафыжьагъэмэ, джащ лъыпытэу, уздэщыIэ чIыпIэм емылъытыгъэу, полицием телефонэу 02-мкIэ ма­къэ ебгъэIун фае е Адыгэ Рес­публикэм хэгъэгу кIоцI IофхэмкIэ и Министерствэ идежурнэ къулыкъу мы телефонхэмкIэ утео­ми хъущт: 8(8772) 52-57-27, 8(8772) 57-17-27.
Гъомлэшк Байзэт.