АР-м и ЛIышъхьэу КъумпIыл Мурат пыим зэрарэу АдыгеякIэм рихыгъэм икIэуххэм ядэгъэзыжьын иIофыгъохэмкIэ зэIукIэ зэхищэгъагъ.

ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, ащ игуадзэу, финанс­хэмкIэ министрэу Виктор Орловыр, АР-м и ЛIышъхьэрэ иминистрэхэм я Кабинетрэ я Администрацие ипащэ игуадзэхэу Къонэ Зауррэ Хъоткъо Саниетрэ, Адыгеим псэолъэшIынымкIэ ипащэ иапэрэ гуадзэу Лафышъэ Рэмэзан, АР-м цIыфхэм якъэухъу­мэнкIэ ыкIи ошIэ-дэмышIагъэ зыхэлъ тхьамыкIагъохэм якIэ­уххэм ядэгъэзыжьынкIэ и Комитет итхьаматэу Вячеслав Лотаковыр, Тэхъу­тэмкъое районым ипащэу Шъэо Аскэр.
Шъугу къэтэгъэкIыжьы: ошIэ-дэмышIагъэ зыхэлъ тхьамыкIагъом ыпкъ къикIэу фэтэрыбэу зэхэт унэ 30-мэ ыкIи чIылъэ унэ заулэмэ зэрар ахьыгъ. Анахьэу зэщыкъуагъэр урамэу Бжыхьэкъуаем тет унэу N 15-р ары. Республикэм ипсэолъэшIхэм акIуачIэ зэхэлъэу унэхэр зэкIэ зыпкъ рагъэуцожьых. КъумпIыл Мурат пшъэрылъ зэрафишIыгъэм тетэу социальнэ лъэныкъомкIэ пшъэдэкIыжь зыхьырэ псэолъэшI компание заулэмэ акIуачIэ АдыгеякIэм фагъэзагъ.
Тэхъутэмыкъое районым ипащэу Шъэо Аскэр къызэриIуагъэмкIэ, гъэцэкIэжьын- зыпкъигъэуцожьын IофшIэнхэр лъэкIуа­тэх. График гъэнэфагъэм тетэу ахэр агъэцакIэх. Анахь лъэшэу зэщыкъогъэ унэу N 15-м ибалконхэм чырбыщыр ащызэтыралъхьэ, унашъхьэм игъэцэ­кIэжьын аухыгъ, пчъэхэр зэблахъугъэх. Унэу фыкъуагъэхэм зэкIэми IофшIэ­­- ны­шхо ащызэшIуахы. ТапэкIэ шъхьаны­гъуп­чъэ ыкIи пчъэ блыпкъхэр ашыгъагъэх, нэужым ахэр фабрикэм IэкIагъэ­хьагъэх. Шъхьаныгъупчъэхэм янахьыбэр хьазыр. Ахэр фэтэри 136-мэ ахагъэуцо­жьы­гъахэх. Мы тхьамафэм зэкIэ шъхьаныгъупчъэхэм яхэлъхьажьын аублэщт.
Пшъэрылъэу къэуцухэрэмрэ цIыфхэм ялъэIухэмрэ зэшIохыгъэнхэм пае а чIыпIэм оперативнэ штабым Iоф щешIэ, районым ыкIи псэупIэм яадминистрацие илIыкIохэм, «Единэ Россием» хэтхэм, гуфакIохэм Iофхэр зэрэкIохэрэм анаIэ атет. НепэкIэ фэтэр 1299-мэ язытет ауплъэкIугъ, гъэцэкIэжьын IофшIэнхэр фэтэр 1007-мэ ящыкIагъэх. Зэщыкъогъэ фэтэрхэр зэкIэ икъоу зыпкъ рагъэуцожьыщтых. Ащ дакIоу хэбзэухъумэкIо къулыкъухэм унэ заулэ зиунаехэм якъэ­гъотын лъагъэкIуатэ фэтэрхэм арыхьанхэм ыкIи зэрарэу ахэм ахьыгъэр зыфэдизыр агъэунэфыным пае.
Урысыем и Следственнэ комитет иследственнэ гъэIорышIапIэу Адыгеим щыIэм икъутамэ илIыкIохэмрэ экспертхэмрэ зэгъусэхэу зэрар зыхьыгъэ автомобильхэр къаплъыхьэх, актхэр зэхагъэуцох, ахэм атегъэпсыхьагъэу ахъщэ афалъэгъужьыщт. Шъугу къэтэгъэкIыжьы: транспортым щыщ Iахь горэхэр фыкъуа­гъэ хъумэ, ар зиунаем сомэ мин 500-м нэс фалъэгъужьыщт, зэрэпсаоу зэхэ­къута­гъэ е стыгъэ хъумэ — сомэ миллионым нэс. Республикэм ахъщэу ахэм аратыщтыр ежь ыпшъэ релъхьажьы. Адыгеим и ЛIышъхьэ зэIукIэм илъэхъан пшъэрылъ афишIыгъ транспортыр зи­ехэм IэпыIэгъу ятыгъэным ыкIи мылъкур къызхэкIыщтыр гъэнэфэгъэным апае икъоу анаIэ атетэу Iофыгъоу къэуцу­хэрэм адэлэжьэнхэу.
Джащ фэдэу КъумпIыл Мурат ынаIэ зытыригъэтыхэрэм ащыщ цIыфхэу фыкъуагъэхэм яIэзэгъэныр. Нэбгыри 9-у сымэджэщхэм ачIагъэгъолъхьэгъагъэхэм ащыщэу непэкIэ 3 къачIэнагъэр. Ахэм япсауныгъэ изытет уигъэрэзэнэу алъытэ. ПIэлъэ гъэнэфагъэкIэ къызэIуахыгъэгъэ пунктми иIофшIэн лъэкIуатэ. НепэкIэ нэбгырэ 22-мэ ар шъхьэегъэзыпIэ афэ­хъугъ, кIэлэцIыкIуи 4 ахэм ахэт. Анахь ящыкIагъэхэр икъоу аIэкIагъахьэх. Соци­альнэ ыкIи медицинэ IофышIэхэр, администрацием илIыкIохэр, зэкIэ IэпыIэгъу афэхъу зышIоигъохэр а чIыпIэм щыIэх ыкIи афэсакъых.
«Тэ типшъэрылъ цIыфхэм амал зэриIэкIэ нахь тэрэзэу тишIуагъэ ядгъэкIыныр, яунэхэр зыпкъ идгъэуцожьыхэ зыхъукIэ, яшIоигъоныгъэ­хэри ащ дакIоу къыдэтлъытэнхэ фае. ПсэолъэшI Iоф­шIэнхэм анэмыкIэу анахь ящыкIэгъэ пкъыгъохэр аIэкIэгъэхьэгъэнхэмкIэ цIыфхэм тишIуагъэ ядгъэкIыщт. МыщкIэ шIушIэ IэпыIэгъум мэхьанэшхо иI. Муниципалитет пстэуми IэпыIэ­гъур къарэкIы: «Единэ Россием», Народнэ фронтым, общественнэ зэхахьэхэм, предприятиехэм ыкIи цIыф къызэрыкIохэм ар къап­къы­рэкIы. АдыгеякIэм иIоф­хэм язытет тызэкъуигъэуцуагъ ыкIи къыгъэ­лъэ­гъуагъ фэныкъо пстэуми зыIэ афэзыщэин зылъэ­кIыщт ыкIи ар зышIоигъо цIыф гукIэгъухэр бэу рес­публикэм зэрисхэр», — къыхи­гъэщыгъ КъумпIыл Мурат.
Фэтэрхэр зыпкъ игъэуцожьыгъэнхэмкIэ Iофышхо зыплIэIу изылъхьэжьыгъэ псэолъэшIхэм ыкIи чIыпIэ зэжъу ифагъэхэм зишIуагъэ языгъэкIыгъэ гукIэгъу­шIэ­хэм зэрафэразэр респуб­ликэм ипа­щэ къыIуагъ.
АР-м и ЛIышъхьэ ипресс- къулыкъу къытырэ къэбархэмкIэ Тхьаркъохъо Сафыет.