Осым къыздихьыгъэ ошIэ-дэмышIэ Iофхэм ядэгъэзыжьын Адыгеим щызэшIуахы. Республикэм и ЛIышъхьэ пшъэрылъ къызэришIыгъэм тетэу муниципальнэ псэупIэхэм яобщественнэ чIыпIэхэр агъэкъэбзэжьых, осышхоу къесыгъагъэм зэхикIыкIэгъэ къутамэхэр, хэкIыр ащыIуахых.

ГущыIэм пае, Мыекъопэ районым къэбзэныгъэм иIофтхьабзэу бэмышIэу щыкIуагъэм волонтерхэр, ныбжьыкIэхэр, еджэпIэ гупчэхэм ачIэсхэр, партиеу «Единэ Россием» хэтхэр, районым ыкIи къоджэ псэупIэхэм яадминистрациехэм ялIыкIохэр, сатыушIхэр, районым щыпсэурэ цIыф къызэрыкIохэр хэлэжьагъэх.
— Тызэхэтэу урамхэр, общественнэ чIыпIэхэр, щагухэр дгъэкъэбзагъэх, мы илъэсым иапэрэ мазэ щыIэгъэ осышхом къыздихьыгъэ гумэкIыгъохэр дэдгъэзыжьыгъэх. Шъхьаджи мы Iофым иIахь къызэрэхилъхьагъэм мэхьанэшхо иI. Тызэгъусэу зэIэхакIо тыкъызыдэкIыкIэ, къэбзэныгъэм тызэрэдэлажьэрэм нэмыкIэу къэдгъэлъагъорэр — тыкъызщыхъу­гъэ чIыпIэм тызэрэфэсакъырэр ары, — къыхигъэщыгъ район пащэу Михаил Марьиным.

Теуцожь районми къутэмэшхоу къе­фэхыгъэхэр щызэпахых, дащых, федеральнэ мэхьанэ зиIэ гъогухэри щаукъэ­бзых.
Мы мазэм ом изытет джыри зыпкъ­итыныгъэ хэлъыщтэп, мэфэ ошIухэр къызыхъухэкIэ, муниципальнэ псэупIэ пстэуми, республикэм ипащэ къызэригъэнэфагъэу, шэмбэт шIыхьафхэмкIэ ячIыпIэхэр агъэкъэбзэнхэу рахъухьэ.