Лъэпкъхэм языкIыныгъэ и Илъэс фэгъэхьыгъэ Урысые Iофтхьабзэу «Зэкъошныгъэм икъашъу» зыфиIорэр АР-м и Къэралыгъо филармоние щыкIуагъ, ащкIэ лъэпкъ зыкIыныгъэм и Илъэс Адыгеим къыщызэIуахыгъ.

АР-м культурэмкIэ и Министерствэ Iофтхьабзэм кIэщакIо фэхъугъ. Респуб­ликэм ис лъэпкъ зэфэшъхьафхэм зэгурыIоныгъэу ыкIи зэкъошныгъэу азы­фагу илъыр гъэпытэгъэныр, къыткIэхъухьэрэ лIэужхэр культурэм хэщэгъэнхэр, яхэгъэгу цIыкIу рыгушхонхэм фэпIугъэнхэр Iофтхьабзэм пшъэрылъ шъхьаIэу иIагъ.
Зэкъошныгъэм икъашъо адыгэхэр, урысхэр, ермэлхэр, урымхэр, къэндзал­хэр хэлэжьагъэх. Лъэпкъ шъуашэхэр зыщыгъ ныбжьыкIэхэм удж хъурае къы­зэдашIыгъ.

— Унэгъо пытэр, зэдэIэпыIэжьыныгъэр, нахьыжъхэм шъхьэкIафэ афэшIыгъэныр, зыщыпсэухэрэ чIыгу гупсэм шIу­лъэгъу фыряIэныр ары зыкIыныгъэм ылъапсэр. Ахэр зэкIэ Адыгеим ис цIыф лъэпкъ зэфэшъхьафхэр илъэсипшI пчъагъэхэм зэкъозгъэуцохэрэ лъэпсэ пытэу, цыхьэшIэгъоу щытых, ти Урысыешхуи ахэр ары нахь пытэ зышIыхэрэр. АщкIэ непэрэ Iоф­тхьабзэм мэхьанэшхо иI, — къыIуагъ Мыекъопэ къэлэ администрацием культурэмкIэ игъэ­IорышIапIэ ипащэу Цэй Розэ.
Адыгеим иныбжьыкIэ къэшъокIо купхэр Iофтхьабзэм хэлэжьагъэх.
— Непэрэ удж хъураем лъэпкъхэм язэкъошныгъэ къыгъэлъэ- гъуагъ. Мыщ фэдэ зэхахьэхэм лъэпкъ пэпчъ ишэн-хабзэхэм нахь апэблагъэ ташIы, нахь пытэу тызэрапхы, — къыIуагъ ГъукIэлI Камиллэ.
— Ермэлхэм яшэн-хабзэхэр ти­унагъо щытэгъэлъапIэ. Лъэпкъ зэфэшъхьафэу Адыгеим щыпсэухэрэм якультурэ тшIодах, шъхьэкIэфэныгъэ афэтэшIы, — къыIуагъ Светлана Петросян.
Непэрэ Iофтхьабзэм лъэпкъ зэфэшъхьафмэ яискусствэ ыпэкIэ лъегъэкIуа­тэ, зыужьыжьыным ыкIи зэкъошныгъэм игъогу фещэх.
Лъэпшъыкъо Фатим.