Лъэпкъ гвардием и Федеральнэ къулыкъу и ГъэIорышIапIэу АР-м щыIэм 2025-рэ илъэсым Iофэу ышIагъэр мы мафэхэм зэфахьысыжьыгъ.

Ащ фэгъэхьыгъэ Iофтхьабзэм хэлэжьагъэх ГъэIорышIапIэм ипащэу, полицием иполковникэу Дмитрий Зима, вневедомственнэ ухъумэнымкIэ отделым ипащэ иIэнатIэ охътэ гъэнэфагъэкIэ зы­гъэцэкIэрэ Алексей Пешковыр, лицензие-Iизын IофшIэнымкIэ гъэIорышIапIэм игупчэ ипащэ иIэнатIэ охътэ гъэнэфагъэкIэ зыгъэцэкIэрэ Павел Никифо­ровыр.
ГъэIорышIапIэм ипащэ пэублэм къызэрэщиIуагъэмкIэ, 2016-рэ илъэсым шэкIогъум къы­щыублагъэу Лъэпкъ гвардием и Федеральнэ къулыкъу иотдел Адыгэ Республикэм щызэхащагъ. Нэужым мыщ къулыкъу щызы­хьыхэрэм япчъагъэ зэрэхагъэ­хъуа­гъэм къыхэкIэу, 2018-рэ илъэ­сым отделыр ГъэIорышIапIэ ашIыжьыгъ.
— Лъэпкъ гвардиер дзэ организациеу щыт, къэралыгъо ыкIи общественнэ щы­нэгъончъэныр, цIыфхэм яфитыныгъэхэр ыкIи яшъхьа­фитыныгъэ къэухъумэгъэнхэм ар афэгъэзагъ. Дзэм ихабзэхэр къызэтегъэнэжьы­гъэнхэм ыкIи къулыкъум имэ­хьанэ зыкъегъэIэтыгъэным лъэпкъ гвардиер фэIорышIэ. Ащ иотдел хэхьагъэх подразделениехэу ОМОН-р, СОБР-р, авиаотрядыр, вневедомст­веннэ къулыкъур, нэмыкIхэри. Отделым ипшъэрылъ ­шъхьаIэхэм ащыщ общест­веннэ рэхьатныгъэр, къэралыгъо псэолъэ шъхьаIэхэр ыкIи цIыфхэм япсэупIэхэр къэухъумэгъэнхэр, экстремизмэм ыкIи терроризмэм апэуцужьыгъэныр, нэмыкI­хэри, — къыIуагъ ГъэIоры­шIапIэм ипащэ.
2025-рэ илъэсым лъэныкъо зэфэшъхьафхэмкIэ тиреспубликэ щыкIогъэ Iофтхьэбзэ 69-мэ Гъэ­IорышIапIэм икъулыкъушIэхэр ахэлэжьагъэх.

ХэушъхьафыкIыгъэ подразделениехэу ОМОН-м ыкIи СОБР-м якъулыкъушIэхэм ыпшъэкIэ зи­гугъу къэтшIыгъэ ведомствэхэр ягъусэхэу бзэджэшIагъэ зезыхьагъэу зэгуцэфэхэрэ нэбгыри 182-рэ къаубытыгъэх, ахэм ащыщэу 92-мэ Уголовнэ кодексым истатья къыриубытэрэ бзэджэшIагъэ ыкIи нэбгыри 90-мэ административнэ хэукъоныгъэ зэрахьагъ.
Iашэр гъогогъу 13-рэ, наркотик зыхэлъ пкъыгъо зэ гъэфедэгъуи 100-м ехъу, сомэ миллионрэ ныкъорэм ехъу къапкъырахыгъ, автомобилитIу ыкIи къэорэ пкъы­гъо 666-рэ фэдиз къаIахыгъ. ОМОН-м ихэушъхьафыкIыгъэ купым хэтхэм къэорэ пкъыгъо 19-м ехъу АР-м щагъэкIодыгъ.
«Лъэпкъ гвардием вневедомственнэ ухъумэнымкIэ икъулыкъу республикэм ит псэолъэ 1507-рэ ыкIи цIыфхэм яунэе псэолъэ 2367-м ехъу къегъэгъунэ. 2025-рэ илъэсым общественнэ рэ­хьатныгъэр къэухъумэгъэным, щынэгъончъэныр гъэ­лъэшыгъэным афэшI ГъэIорышIапIэм иподразделение дэкIыгъо 1897-рэ фэдиз иIагъ, хэбзэукъоныгъи 79-рэ щагъэзыягъ», — къыIуагъ Алексей Пешковым.
Нэбгырэ 213-мэ 2025-рэ илъэ­сым хэбзэукъоныгъэ зэрахьагъэу хэгъэгу кIоцI къулыкъум иот­дел IэкIагъэхьагъ. Ахэм ащыщэу нэбгыри 7-мэ алъыхъущтыгъэх, нэбгырэ 33-мэ бзэджэ­шIагъэ, 179-мэ административнэ хэукъоныгъэ зэрахьагъ. Вневедомственнэ ухъумэнымкIэ отделым псэуалъэхэм анэмыкIэу юри­дическэ цIыфхэм яавтомобили 107-рэ ыкIи цIыфхэм яавтомобили 6-рэ къаухъумэх.
Мы мафэм ехъулIэу Адыгэ Республикэм гъэсэныгъэ зыщы­зэрагъэгъотырэ псэолъэ 320-рэ ит. Ахэм зэкIэми ошIэ-дэмышIагъэ къэхъумэ макъэ къэзыгъэ­Iущт пкъыгъохэр ащагъэуцугъэх.
Iашэр къызэрэрагъэкIокIырэм, ащ зэрэлъыплъэхэрэм, ахэм япхыгъэ пшъэрылъхэр зэрагъэцакIэхэрэм ягугъу къышIыгъ лицензионнэ-Iизын гупчэм ипащэ иIэнатIэ зыгъэцэкIэрэ Павел Ни­кифоровым. Ащ къызэриIуа­гъэмкIэ, 2025-рэ илъэсым Рос­гвардием республикэмкIэ икъутамэ иIофышIэхэм Iэшэ мин 23,5-м ехъу зыгъэфедэрэ нэб­гырэ 11700-м ехъумэ гъунэ алъа­фыгъ. Ащ епхыгъэу уплъэкIун 3721-рэ къулыкъушIэхэм рагъэ­кIокIыгъ, Iашэм пылъ шапхъэхэр аукъуагъэу хэукъоныгъэ 406-рэ къыхагъэщыгъ, ахэм административнэ пшъэдэкIыжьхэр арагъэ­хьыгъэх, Iэшэ 364-рэ къаIахыгъ, цIыфхэм ежь яшIоигъоныгъэкIэ 470-рэ къатыжьыгъ.
Росгвардием и ГъэIорышIапIэу Адыгэ Республикэм щыIэм цIыф­хэм зафегъазэ шIоигъоныгъэ зи­Iэхэм Iашэу аIэкIэлъыр хэу­шъхьафыкIыгъэ дзэ операцием хэлажьэхэрэм апае къатынэу.
Павел Никифоровым къызэриIуагъэмкIэ, 2024-рэ илъэсым шышъхьэIум къыщегъэжьагъэу УФ-м ицIыфхэм фитыныгъэ яI хэбзэ унашъом тетэу яIэ хъугъэ Iашэр къэралыгъо дзэ органи­зациехэм аратынхэу (аращэнхэу), нэмыкIэу къэпIон хъумэ, хэушъхьафыкIыгъэ дзэ операцием хэлажьэхэрэм апае Рос­гвардием ыкIи зыкъэухъумэжьынымкIэ Министерствэм аIэкIа­гъэхьанхэу.
ЗиIашэрэ ащ игъусэ патронхэмрэ зыты зышIоигъохэм зэзэгъыныгъэ адашIы. А лъэныкъомкIэ зи къиныгъо щыIэп. Минис­терствэм идзэкъулыкъушIэхэм ыкIи лъэпкъ гвардием идзэхэу хэушъхьафыкIыгъэ дзэ операцием хэлажьэхэрэм ащ тетэу аде­Iэщтых.
Ащ фэгъэхьыгъэу лъэIу тхылъ шъутхыным пае Росгвардием исайт ихэушъхьафыкIыгъэ едзы-
гъо шъуихьан е QR-кодыр жъугъэфедэн шъулъэкIыщт.
Журналистхэм яупчIэхэм джэуап­хэр къыритыжьызэ ГъэIорышIапIэм ипащэ къыIуагъ подразделением икъулыкъушIэхэр хэушъхьафыкIыгъэ дзэ операцием чанэу зэрэхэлажьэхэрэр. Республикэм ищыIэкIэ-псэукIэ нахьышIоу гъэпсыгъэнымкIэ ­лъэпкъ гвардием мэхьанэшхо зэриIэм щэч хэлъэп. Арышъ, къулыкъум шIуагъэ къытэу иIоф­шIэн зэхищэным, цIыфхэм Iэпы­Iэгъу афэхъуным, ахэр къыухъу­мэнхэм тапэкIи анаIэ зэрэты­рагъэтыщтыр ГъэIорышIапIэм ипащэ къыIуагъ.
КIАРЭ Фатим.