Илъэс 28-рэ зыныбжь тичIыгогъоу, Агуй-Шапсыгъэ щыщэу Къоджэ Роман къэралыгъо бгъэхалъхьэкIэ къыхагъэщыгъ.

ТIопсэ шъолъырым ипащэу Сергей Бойкэм къэралыгъо бгъэхалъхьэхэр хэушъхьафыкIыгъэ дзэ операцием хэлажьэхэрэм яIахьылхэм аритыжьыгъэх. Хэгъэгум ыпашъхьэ гъэхъагъэхэр зэрэщыриIэхэм, лIы­хъужъныгъэ къыхафэзэ дзэ пшъэрылъхэр зэригъэцэкIагъэхэм, тикъэралыгъо псэемыблэжьэу къызэригъэгъунагъэм апае Жуковым имедаль Къоджэ Роман къыфагъэшъошагъ.
Роман Агуй-Шапсыгъэ игурыт еджапIэу N 15-р къыухыгъ. 2019-рэ илъэсым къыщыублагъэу «Урысыем и Почтэ» и ТIопсэ отделение щэлажьэ. 2022-рэ илъэсым иIоныгъо мазэ тичIыгогъур мобилизацием хэфагъ ыкIи фронтым Iухьагъ. Донецкэ Народнэ Рес­публикэм хэхьэрэ къалэхэу Бахмут ыкIи Марьинкэр шъхьафит зышIыжьыгъэхэм ахэтыгъ. 2024-рэ илъэсым итыгъэгъэзэ мазэ ядэжь къыгъэзэжьыгъ. Унагъо иI, сабыитIу епIу. Къулыкъум къызекIыжьым ыуж ар зыIутыгъэ IофшIапIэм Iухьажьыгъ, ащ щэлажьэ.
— СэркIэ мы бгъэхалъхьэр лъапIэу щыт, ау, шъып­къэр пIощтмэ, зыкIи сегупшысагъэп ыкIи сыкIэнэцIыгъэп къысфагъэшъошэнэу, — къыддэгуащэ Роман. — ЗэкIэ къыскъотыгъэхэм ыкIи къыздезыгъэштагъэхэм «тхьаегъэпсэу» ясэIо — сиунагъо, сигупсэхэм, синыбджэгъухэм, сикъоджэгъухэм, сиIофшIэгъухэм. Шъхьафэу къыхэзгъэщымэ сшIоигъу скIыгъугъэ дзэкIолIхэр, ахэм ащыщыбэ джы къызнэсыгъэм зэуа­пIэм Iутых, ти Хэгъэгу къаухъумэ, тызэжэрэ ТекIоныгъэр къытфагъэблагъэ.