УФ-м и Президентэу Владимир Путиным пшъэрылъ къызэрэфи­шIыгъэм тетэу Адыгеим и ЛIышъхьэу КъумпIыл Мурат цIыфхэр щыригъэблэгъагъэх ­Урысыем и Президент иприемнэу Адыгэ ­Республикэм щыIэм.

Ащ хэлэжьагъэх Урысые Федерацием и Президент иприемнэу АР-м щыIэм ипащэу Сергей Дрокиныр, АР-м ипрокурорэу Игорь Шевченкэр, министрэхэм я Кабинет и Тхьаматэ игуа­дзэу финансхэмкIэ министрэу Вик­тор Орловыр.
ЛIышъхьэм зыкъыфагъэ­загъ Адыгэкъалэ, Мыекъуапэ, Кощхьэблэ ыкIи Тэхъутэмыкъое районхэм ащыпсэухэ­рэм. Ахэм къаIэтыгъэ Iофыгъохэр япхыгъагъэх со­ци­альнэ мэхьанэ зиIэ псэуа­лъэ­хэр шIыгъэнхэм ыкIи гъэ­­­цэкIэжьыгъэнхэр, джащ фэдэу гъогу инфраструктурэр зэтегъэпсыхьэгъэным.
Адыгэкъалэ щыщ Елена Бобуровам къыIэтыгъэ Iофыгъор зэпхыгъэр кIэлэцIыкIу IыгъыпIэу N 4-м, кIэлэцIыкIуи 130-м ехъу зыдакIорэм, гъэцэкIэжьын IофшIэнхэр ешIы­лIэгъэнхэр ары. Адыгэкъалэ имэрэу Хьачмамыкъо Азэмат къызэриIуагъэмкIэ, унэм иигъэкIотыгъэ гъэцэкIэжьынкIэ непэ ехъулIэу ищыкIэгъэ тхылъхэр зэкIэ хьазырых. 2027-рэ илъэсым IофшIэнхэр агъэцэкIэнхэу ары.
Республикэм и ЛIышъхьэ пшъэрылъ афишIыгъ 2026-рэ илъэсым иятIонэрэ кIэлъэныкъо IофшIэнхэр рагъэжьэнхэу ыкIи 2027-рэ илъэсым Iоныгъом нэс IофшIэнхэр ­аухынхэу.
Мыекъуапэ щыщ Людмила Киселевар къызкIэ­лъэIугъэр урамэу Госпитальнэм изы гъогу Iахь (урамэу Крыловым ыцIэкIэ щытым къыщегъэжьагъэу урамэу Пушки­ным ыцIэкIэ щытым нэс) агъэцэ­кIэжьынэу ары. Мыекъуапэ имэр игуадзэу Александр Ле­бе­девым къызэриIуагъэмкIэ, проект-сметэ тхылъэу а гъогу Iахьым телъытагъэр зэхагъэуцогъах. Пшэхъо-мыжъо зэхэлъ гъогур асфальт ашIыщт, къэзгъэнэфыщтхэри тырагъэуцощтых. 2026-рэ илъэсым Iоныгъом и 30-м нэс IофшIэнхэр ыкIэм нагъэсыщтых.
КъумпIыл Мурат пшъэрылъ къафишIыгъ гъогухэм анэмыкIэу коммуникациехэри нахьышIу шIыгъэнхэм дэлэжьэнхэу.
Тэхъутэмыкъое районым щыщ Козын Ибрахьимэ зыгъэгумэкIырэр къуаджэу АдыгеякIэм зыщесыщтхэ бассейнэ щышIыгъэным иамал ары. Муниципалитетым ипащэу Шъэо Аскэр къызэриIуагъэмкIэ, а спорт псэуалъэм фэгъэхьыгъэ проект-сметэ тхылъхэм Iоф адашIэ. Республикэ бюджетым къыхагъэкIызэ илъэсэу къихьащтым ащ ишIын аухынэу рахъухьагъ.
Адыгеим и ЛIышъхьэ агу къыгъэкIыжьыгъ аужырэ илъэсым физкультурэмрэ псауны­гъэм игъэпытэнрэ афытегъэ­псыхьэгъэ псэолъи 2 районым зэрэщатыгъэр, ащ нэмыкIэу джыри зы шIыгъэным иIоф хэплъэх. ЧIыпIэм хэхъоныгъэ ин зэришIырэм къыпкъырыкIызэ, социальнэ инфраструктурэ дэгъу мы чIыпIэм щызэхэщэгъэным ыкIи коммуникациехэр гъэкIэ­жьыгъэнхэм ренэу ащ ынаIэ тырегъэты.
Кощхьэблэ районым щыщ Хъымыщ Зарет Iофыгъэу къыIэтыгъэр зэпхыгъэр муниципальнэ образованиеу «Кощхьэблэ районым» лъэпкъ культурэм и Гупчэу дэтыр гъэцэкIэжьыгъэныр ары. А учреждением кIэлэцIыкIу 260-м ехъу екIуалIэ, творческэ куп 17 щызэхащагъ. Районым ипащэу Хьамырзэ Заур къызэриIуагъэмкIэ, къэралыгъо программэу «Къуаджэхэм хэхъоныгъэ ягъэшIыгъэныр» зы­фиIорэм диштэу проектхэм якъыхэхын лъэпкъ культурэм
и Гупчэ хагъэхьагъ. ЛъэIу тхы­лъым къызыдырагъаштэкIэ, 2026-рэ илъэсым шIомыкIэу ар агъэцэкIэжьыщт.
«ЦIыфхэм адытиIэрэ зэ­IукIэгъухэм мэхьанэшхо яI, ахэр зыгъэгумэкIырэ Iофыгъо гъэнэфагъэхэм тащы­гъозэнымкIэ, муниципали­тетым зэрэпсаоу иIофхэм язытет зыфэдэр тшIэнымкIэ яшIогъэшхо къэкIо. Iофыгъоу къаIэтыхэрэм яна­хьыбэр чIыпIэхэм яхэбзэ къулыкъухэм зэшIуахынхэ алъэкIыщт. Къулыкъу зэфэшъхьафхэми яIэшъхьэтетхэм, чIыпIэхэм япащэхэм, депутатхэм пшъэрылъ афэ­сэгъэуцу теурыкIуагъэ хэмылъэу цIыфхэм яIофхэм язытет зыщагъэгъозэнэу ыкIи къаIэтырэ Iофыгъохэм кIэух тэрэзхэр афэхъунхэм дэлэжьэнхэу», — къыIуагъ Адыгеим и ЛIышъхьэ.