Къэралыгъо фондэу «Хэгъэгум иухъумакIохэр» зыфиIорэм иIофшIэн къыдыхэлъытагъэу социальнэ IэпыIэгъу ягъэгъотыгъэнымкIэ зыгъэгъозэхэрэ комиссием изэхэсыгъо республикэм и Правительствэ зычIэт унэм щыкIуагъ. АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловым ар зэрищагъ.

Комиссием иIофшIэн хэлэжьагъэх Къэралыгъо фондэу «Хэгъэгум иухъумакIохэр» зыфиIорэм итхьаматэ игуа­дзэу Сергей Усмановыр, Фондым ишъолъыр­хэм Iоф адэзышIэрэ гъэIорышIапIэм ипащэу Любовь Фроловар, Къэралыгъо Советым — Хасэм и Тхьаматэ игуадзэу Цэй Эдуард, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, министрэхэм я Кабинет хэтхэр, фондэу «Хэгъэгум иухъумакIохэр» зыфиIорэм икъутамэу Адыгеим щыIэм ипащэу ПIатIыкъо Аслъан, программэу «ЛIы­хъужъ­хэм яуахътэ» хэлэжьэрэ Сергей Ковалевыр.
ШIуагъэ къытэу Iоф зэрашIэрэм, хэушъхьафыкIыгъэ дзэ операцием хэла­жьэхэрэм ыкIи ахэм яунагъохэм арыс­хэм ящыкIэгъэ IэпыIэгъу ягъэгъотыгъэным ренэу анаIэ зэрэтырагъэтырэм фэшI Адыгеим и ЛIышъхьэ, республикэм ихэбзэ къулыкъухэм, къутамэм япащэхэм зэрафэразэр фондым итхьаматэ игуа­дзэу Сергей Усмановым къыIуагъ.
«Къэралыгъо фондэу «Хэгъэгум иухъу­макIохэм» икъутамэу Адыгеим щыIэм дэгъоу иIофхэр зэхещэх. Къутамэм иIофышIэ купи, рес­публикэ къулыкъухэ­ми аIэ зэкIэ­дзагъэу, егугъухэзэ Iоф зэрашIэрэр ти­нэрылъэгъу. ХэушъхьафыкIыгъэ дзэ операцием хэлажьэхэрэмрэ иветеранхэмрэ къатефэрэ гарантиехэр ягъэгъотыгъэным респуб­ликэм лъэшэу гъунэ щылъафы», — къыIуагъ Сергей Усмановым.
ЛъэныкъуабэхэмкIэ Адыгеим гъэхъагъэу щыряIэхэр гурытымкIэ урысые шапхъэхэм ашъхьэдэкIых.
Фондым ишъолъырхэм адэлэжьэгъэнымкIэ гъэIорышIапIэм ипащэу Любовь Фроловам хэушъхьафыкIыгъэ дзэ операцием хэлажьэхэрэм якIэлэцIыкIухэм психологическэ IэпыIэгъоу арагъэгъотырэм зыкъегъэIэтыгъэн, еджэпIэ психологхэр ахэм адэгъэлэжьэгъэн зэрэфаем анаIэ тыраригъэдзагъ. ХэушъхьафыкIыгъэ дзэ операцием хэлажьэхэрэм ыпкIэ хэмылъэу апшъэрэ гъэсэныгъэ республикэм щягъэгъотыгъэнымкIэ амалхэр зехьэгъэнхэм мэхьанэ зэриIэр къыIуагъ.
Виктор Орловым хэушъхьафыкIыгъэ дзэ операцием хэлажьэхэрэм, ахэм яунагъохэм арысхэм, ветеранхэм IэпыIэгъу зэфэшъхьафхэр зэрарагъэгъотырэм фэгъэхьыгъэу къыIотагъ. Iэпы-­
Iэгъу лъэпкъ 30-м ехъу ахэм зэра­IукIэрэм игугъу къышIыгъ.
«ЩыIэныгъэм илъэныкъо шъхьа­Iэхэр зэкIэ къызэлъытыубыты тшIоигъу: мы­лъку, социальнэ Iэпы­Iэгъу ягъэгъотыгъэ­ным, медицинэ фэIо-фашIэхэр афэгъэцэкIэгъэнхэм, реабилитацием, психологическэ, юридическэ IэпыIэгъу ягъэгъо­ты­гъэным, республикэм иобщественнэ, икультурнэ щыIэныгъэ къыхэ­гъэлэжьэгъэнхэм, ныбжьыкIэхэм Iоф адашIэным тынаIэ атетэгъэты. Фондэу «Хэгъэгум иухъума­кIохэр» зыфиIорэм икъутам ары мыщ фэдэ IофшIэнымкIэ зэзыпхыхэрэ гупчэу хъурэр, — къыIуагъ Виктор Орловым.
Мэхьанэшхо зиIэ лъэныкъохэм ащыщ дзэкIолIхэм шIушIэ IэпыIэгъоу арагъэгъотырэр. ХэушъхьафыкIыгъэ дзэ операциер зыщыкIорэ чIыпIэм тонн мини 5-м ехъурэ шIушIэ IэпыIэгъу Адыгеим аригъэщагъ. Виктор Орловым къызэриIуагъэмкIэ, хэбзэ къулыкъухэр, гуфакIохэр, ныбжьыкIэ движениехэр, политическэ, общественнэ организациехэр акIуачIэ зэхэлъэу республикэм щызэдэлажьэх. Предпринимательхэри, мылъку зиIэ цIыф къызэрыкIохэри IэпыIэгъу къафэхъух. ПсэупIэхэр ягъэ­гъотыгъэнхэм, ящыIэкIэ-псэукIэ нахьышIу шIыгъэным япхыгъэ Iофыгъохэр зэ­шIуахых, социальнэ гарантиехэр афа­гъэцакIэх, фэгъэкIотэныгъэхэр афашIых, мылъку, медицинэ, реабилитацие IэпыIэгъу араты. Адыгеим и ЛIышъхьэ пшъэ­рылъ зэрафишIыгъэм тетэу хэушъхьафыкIыгъэ дзэ операцием иветеранхэу зищыкIагъэхэр ыпкIэ хэмылъэу IэкIэ агъэIорышIэрэ автомобильхэр зэрафэнэу агъасэх.
ЧъыгхэтэлэжьыпIэхэм арыт унэхэм газыр апышIэгъэным, чIыгу Iахьхэр къафыхэгъэкIыгъэным, сэкъатныгъэ зэряIэм ыпкъ къикIыкIэ мазэ къэс ахъщэу аIукIэрэм хэгъэхъогъэным япхыгъэ Iофыгъохэм джыдэдэм адэлажьэх. Къи­хьащт илъэсым къыщегъэжьагъэу хэу­шъхьафыкIыгъэ дзэ операцием иветеранхэм яшъолъыр Ассоциацие пае субсидиехэм фэдитIукIэ къахэхъощт, сомэ миллиони 4-м ар нэсыщт.
Фондым икъутамэ ипащэу ПIатIыкъо Аслъан зызэхащагъэм къыщегъэ­жьагъэу къутамэм Iофэу ышIагъэм къытегущы­Iагъ. Нэбгырэ 4200-мэ ащ зыкъыфагъэ­загъ. Ащ щыщэу нэбгырэ 384-р хэушъхьафыкIыгъэ дзэ операцием иветеранхэу дзэ къулыкъум къы­хэкIыжьыгъэх. Тхылъ мин 14,5-м ехъу аштагъ, ахэм япроцент 95-мкIэ Iофхэр зэшIохыгъэ хъугъэ. Муниципалитетхэм ащыIэ социальнэ координатор 35-рэ зигугъу къэтшIыгъэ цIыф купмэ адэлажьэ.
ГъэрекIо щегъэжьагъэу Фондым икъу­тамэ УФ-м зыкъэухъумэжьынымкIэ и Министерствэ и Дзэ-социальнэ гупчэ илIыкIо иIофшIапIэ Iоф щишIэу ыублагъ. Мы илъэсым игъэтхапэ щегъэжьагъэу федеральнэ хэбзэгъэуцугъэм фашIыгъэ зэхъокIыныгъэхэм япхыгъэу къутамэм иIофышIэхэм хэушъхьафыкIыгъэ дзэ операцием хэлажьэхэзэ зыдэхъугъэр амышIэу кIодыгъэхэм якъэгъотыжьынкIэ, яIахьылхэм я ДНК-материалхэм яугъоинкIэ, дзэ-следственнэ къулыкъухэм зэдэлэжьэныгъэ адыряIэнымкIэ Iоф гъэнэфагъэ ашIэ. ХэушъхьафыкIыгъэ дзэ операцием иветеранхэу сэкъатныгъэ зиIэхэм япсауныгъэ зэтегъэуцожьыгъэным­кIэ ящыкIагъэхэр арагъэгъоты. Сэкъатныгъэ зиIэ ветеранищ автомобиль зэрафэнэу рагъэджагъ. НэбгыритIумэ IэкIэ агъэIорышIэрэ автомобильхэр ара­ты­гъэх, ящэнэрэм ежэх. Ветерани 7-мэ япсауныгъэ телъытэгъэ щыгъынхэр ара­ты­гъэх.
Фондым икъутамэ ипащэ хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ психологическэ IэпыIэгъоу арагъэгъотырэм, ветеран 17-мэ яунэ дэкIояпIэхэр нэмыкIэу зэрэзэтырагъэпсыхьэрэм, хэушъхьа­фыкIыгъэ дзэ операцием иветеранхэм яреспубликэ ассоциацие, общественнэ, гуфэкIо объединениехэм зэрадэлажьэ­хэрэм афэгъэхьыгъэу къыIотагъ.
Министерствэхэу, къулыкъухэу социальнэ адаптацием фэгъэзагъэхэм, хэ­ушъхьафыкIыгъэ дзэ операцием хэла­жьэ­хэрэмрэ ахэм яунагъохэм арысхэмрэ IэпыIэгъу языгъэгъотыхэрэм япа­щэхэми зэфэхьысыжьхэр зэхэсыгъом къыщашIыгъэх.
АР-м и ЛIышъхьэ ипресс-къулыкъу
къытырэ къэбархэмкIэ ЛIышэ Саныет.