Урысыем спортымкIэ имастерэу Кобл Мэдинэ ыгъэсэрэ командэу «ШэхэкIэир» футболымкIэ Шъачэ ичемпион хъугъэ. ПсышIопэ районым иклуб мыщ ыпэкIэ къалэм игъэмэфэ ыкIи икIымэфэ кубокхэр къыдихыгъэх.

«ШэхэкIэим» иIэгъэ ешIэгъухэр псэупIэу Шэхапэ истадион щыкIуагъэх. Къушъхьэ къоджэ цIыкIур къэзыгъэлъэгъорэ командэм зэнэкъокъум зэIукIэгъу 17 щыриIагъ, ахэм ащыщэу шIуахьыгъэр зы ныIэп. КъытекIуагъэр Адлер икомандэу «Медикыр» ары. Дышъэ медальхэм якъыдэхын фэгъэхьыгъэ зэIукIэгъум мы командитIур щызэIукIэжьыгъэх. «ШэхэкIэим» 2:1-у текIоныгъэр къы­дихыгъ ыкIи апэрэ чIыпIэр ыубытыгъ. Зэнэкъокъур мэкIофэ мыщ ифутболистхэм къэлапчъэм Iэгоо 88-рэ дадзагъ, къафыдадзагъэр 11 ныIэп.
Чемпион хъугъэх: Кобл Адам, Кобл Руслъан, Хьэх Байзэт, ТIэшъу Заур, Александр Титовыр, Нэпсэу Саид, Кобл Саид, Александр Пархоменкэр, Къэбж Заур, Дмитрий Костенкэр, Владимир Хачарян, Нэпсэу Хъалид, Артем Пархоменкэр, Даниил Ломоносовыр, Владислав Страховыр, Эльдар Халатян, Матвей Тарануха, Никита Пархоменкэр, Роман Тахмазян, Владимир Нарыжнэр, Рустам Папинян, Егор Пархоменкэр, Давид Хачарян, Александр Маринушкиныр, Игорь Морозовыр.
— Мы текIоныгъэм илъэсыбэрэ тыкъыфэкIуагъ. ЕшIэкIэ дахэ къэзыгъэлъэгъогъэ футболистхэм, зишIуагъэ къытэзыгъэкIыгъэхэм, IэпыIэгъу къытфэхъугъэхэм зэкIэми сафэраз. ЗыкIыныгъэр ары мыщ фэдэ гъэхъэгъэшIу тэзыгъэшIыгъэр, — къыIуагъ Кобл Мэдинэ.

Ныбэ Анзор.