АР-м и Общественнэ палатэ кощын Iофхэм язытет зыщытегущыIэгъэхэ зэхэсыгъо иIагъ. Палатэм ипащэу Устэ Руслъан ащ тхьамэтагъор щызэрихьагъ.

Зэхэсыгъом хэлэжьагъэх хэгъэгу кIоцI IофхэмкIэ Министерствэм кощын IофхэмкIэ и ГъэIорышIапIэу АР-м щыIэм ипащэу Максим Олейниковыр, АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Долэ Долэтбый, гъэсэныгъэмрэ шIэныгъэм­рэкIэ министрэм игуадзэу Артем Журавель, цIыфхэм IофшIэпIэ чIыпIэхэр ягъэгъотыгъэнхэмкIэ АР-м икъэралыгъо къулыкъу ипащэ игуадзэу Гъужъыекъо Рустам, нэмыкIхэри.
Зэхэсыгъом къызэрэщыхагъэщыгъэмкIэ, кощыным ылъэныкъокIэ Адыгеим зыпкъитыныгъэ илъ, бэу къытегъэуагъ пIон плъэкIыщтэп. Мы уахътэм IэкIыб къэралхэм къарыкIыгъэу республикэм исыр нэбгырэ мин 12 мэхъу. Ащ ипроцент 67-р, ар нэбгырэ 6983-рэ, Iоф щишIэнэу охътэ гъэнэфагъэкIэ къихьагъ, 23-р студентых.
IэкIыбым къикIыгъэхэм лъэныкъо зэфэшъхьафыбэхэм Iоф ащашIэ, ау нахьыбэр псэолъэшIыным хэт. Гъэбылъы­гъэкIэ Урысыем къихьагъэу, заримыгъэт­хыгъэу исхэм 2025-рэ илъэсым ищылэ мазэ и 1-м къыщыублагъэу иIоныгъо мазэ нэс ар агъэтэрэзыжьын амал ятыгъэным фэгъэхьыгъэ унашъом УФ-м и Президентэу Владимир Путиныр гъэ­рекIо кIэтхэгъагъ. Адыгеим ащ фэдэу исэу ар ыгъэфедэмэ шIоигъоу нэбгырэ 1668-мэ лъэIу тхылъхэр кощын IофхэмкIэ къулыкъум ратыгъэх.
Тилъэпкъэгъоу IэкIыбым къикIыжьыгъэхэм яIофхэми зэхэсыгъом ягугъу щашIыгъ. IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ Комитетым ипащэу Долэ Долэтбый къызэриIуагъэмкIэ, ахэм ящыкIэгъэ тхылъхэм ягъэхьазырын, щыIэныгъэм хэгъэгъозэгъэнхэр къызэрыкIоп, Iофыгъоу къапыкIырэр бэ.
— Кощын Iофхэм афэгъэзэгъэ къулыкъум зэпхыныгъэ пытэ дытиIэу, ар IэпыIэгъушхо къытфэхъушъ, тызэрэфэразэр къыхэзгъэщымэ сшIоигъу. Тилъэпкъэгъухэр нахьыбэу IэкIыбым къикIыжьынхэу, къытхэхьа­жьынхэу тыфай, арышъ, тапэкIи ащ тетэу къыткъотынэу тыщэгугъы. Кощыныр тищыIэныгъэ нахь пытэу къыхэуцо хъугъэ, тызэдеIэжьмэ ары а лъэныкъом зыпкъитыныгъэ зыхэлъыщтыр, — къыIуагъ ащ.
Нэужым IэкIыбым къикIыгъэхэм урысыбзэ зэрэзэрагъашIэрэм, ащ фэдэ унагъохэм арыс кIэлэцIыкIухэр еджапIэхэм ачIэхьанхэм зэрэфагъэхьазыр­хэрэм, квотэкIэ IофшIэпIэ чIыпIэ зэратыгъэхэм афэгъэхьыгъэу а лъэныкъо­хэм афэгъэзагъэхэр къэгущыIагъэх.
ХЪУТ Нэфсэт.