Адыгеимрэ Беларусьрэ яапшъэрэ еджапIэхэм шIэныгъэ-егъэджэн Iоф­шIэ­нымкIэ язэдэлэжьэныгъэ зырагъэушъомбгъу. Адыгэ Республикэм и ЛIышъхьэу КъумпIыл Мурат пшъэрылъ къызэришIыгъэм тетэу шIэныгъэ-егъэджэн зэ­пхыныгъэхэу Республикэу Беларусь дыряIэхэм ахагъа­хъо. АщкIэ мэхьанэшхо зиIэ уцугъо хъугъэ Мыекъопэ къэ­ралыгъо технологическэ университетымрэ Витебскэ къэралыгъо медицинэ университетымрэ Iоф зэрэзэда­шIэщтымкIэ зэдашIыгъэ зэзэ­гъыныгъэр.
Апшъэрэ еджэпIитIумэ ярек­торхэу Къуижъ Саидэрэ Алексей Чукановымрэ аIапэхэр зыкIадзэжьыгъэ тхы­лъым къегъэпытэжьы АР-м иминистрэхэм я Кабинетрэ Республикэу Беларусь и Пра­вительствэрэ сатыу-экономическэ, шIэныгъэ-техническэ ыкIи социальнэ-культурнэ зэ­дэлэжьэныгъэмкIэ Зэзэ­гъыныгъэу зэдыряIэр пхырыщыгъэнымкIэ IофшIэкIо купэу зэдагъэпсыгъэм иунашъохэр зэрагъэцакIэхэрэр.
Апшъэрэ еджэпIитIум Iоф­шIэнэу зэдагъэпсырэм къыдыхэлъытагъэх академическэ зэхъожьынхэр, гъэсэныгъэ программэхэм язэхэгъэуцон, шIэныгъэ ушэтынхэм, стажировкэхэм ыкIи конференцие­хэм язэхэщэн, джащ фэдэу гъэIорышIэнымкIэ лъэхъаным диштэрэ IофшIагъэхэм ягъэфедэн.
Урысые-белорусскэ зэдэлэ­жьэныгъэр чанэу лъагъэ­кIуа­тэ: 2024-рэ илъэсым игъэ­тхапэ Адыгеим иапэрэ лIыкIо куп Беларусь щыIагъ, мы илъэсым имэкъуогъу мазэ Зэзэгъыныгъэм къыдыхэлъыта­гъэу ЛIышъхьэу КъумпIыл Мурат ткъош къэралыгъом къикIыгъэ лIыкIохэм Мыекъуапэ щаIу­кIагъ. Сатыум, былымхъуным, гъэсэныгъэ ыкIи культурнэ зэ­хъожьынхэм ащ щатегущыIагъэх. Беларусь къикIыгъэхэр джащ фэдэу тишъо­лъыр ихъызмэтшIэпIэ пэрытхэм ащыIагъэх, ащ ишIуагъэ­кIэ Адыгеим къыдэгъэкIыжьынымкIэ иамалхэр алъэгъунхэ алъэкIыгъ.