Мыекъуапэ идзэ комис­сариат пресс-зэIукIэу щыкIуагъэр зэзэгъыныгъэ шIыкIэм тетэу хэушъхьа­фыкIыгъэ дзэ операцием къулыкъур щызыхьыщтхэм якъыхэхын ыкIи гуфэкIо купхэм ягъэпсын афэгъэ­хьыгъагъ. Iофтхьа­бзэр зэрищагъ дзэ комиссарэу Алексей Санташовым.
Зэрэзэфэдэхэр

Пресс-зэIукIэм ипшъэрылъыгъэр гуфакIохэмрэ зэзэгъыныгъэкIэ къулыкъу зыхьыхэрэмрэ зэрэзэтефыгъэхэр цIыф­хэм агурыгъэIогъэныр ары. Пэублэм гуфэкIо купхэм ахэхьанхэ зылъэкIыщтхэм игъэкIотыгъэу военкомыр къатегущыIагъ. ГуфакIор — дзэ операцием щыIэми, граждан цIыфэу къэнэ, ау дзэкъулыкъушIэ мобилизованнэхэм ыкIи зэзэгъыныгъэкIэ къулыкъу зы­хьы­хэрэм ялэжьапкIэ, яфэгъэкIотэнхэм, ясоциальнэ IэпыIэгъухэм афэ­дэхэр къаратых.
— ХэушъхьафыкIыгъэ дзэ операцием гуфакIоу кIон зылъэкIыщтхэр хъулъфыгъэхэу зыныбжь илъэс 18-м къыщегъэ­жьагъэу илъэс 60-м нэсыхэрэр (зэзэгъыныгъэ шIыкIэм тет къулыкъум — илъэс 18 — 65-м) ары. Ащ ыпэкIэ ахэр медицинэ ыкIи психологическэ уплъэ­кIунхэм апхырыкIынхэу щыт. Зипсау­ныгъэ амалхэр пIэлъэ гъэнэфагъэкIэ мыхъухэу ыпэкIэ алъытэгъагъэхэм ащыщхэри джы гуфэкIо отрядхэм ади­штэнхэ ылъэкIыщт. А шIыкIэм тетэу къулыкъур зыхьы зышIоигъохэм дзэ комиссариатым зыкъыфагъэзэн фае. Ащ пае ящыкIэгъэщт документхэр: паспортыр, дзэ билетыр, якъэбар къизыIотыкIырэ тхыгъэр, гъэсэныгъэу яIэр къэзыушыхьатырэ тхылъыр, къызэрэзэрэщагъэхэмкIэ ыкIи сабый зэряIэмкIэ свидетельствэхэр, — къыIуагъ Алексей Санташовым.
Джащ фэдэу дзэ комиссарым къызэрэхигъэщыгъэмкIэ, IофшIэнымкIэ зэзэгъыныгъэм мэзихым къыщегъэжьагъэу илъэс пIалъэм нэс гуфакIор кIэтхэ ыкIи зыщыфаем ар зэпигъэун амал иI. IофшIэпIэ чIыпIэ иIэу щытыгъэмэ, ар къыфэнэ.
ЗэрэзэтекIыхэрэр
ЗэзэгъыныгъэкIэ къулыкъу зыхьыхэрэм ыкIи мобилизованнэхэм хэбзэ шапхъэу апылъыр нэмыкI. Ахэр зыщыфаем къахэкIыжьынхэ алъэкIыщтэп, частичнэ мобилизациер мэкIофэ язэзэгъыныгъэ зэпымыоу лъэкIуатэ. Ащ пае ахэм къаратырэ зэтыгъо ахъщэ тынри зэтекIы: гуфакIом — зэтыгъоу сомэ мини 100, адрэхэм — сомэ миллиони 2–рэ мин 400-рэ. ЛэжьапкIэу мазэ къэс къаратырэр зэфэдэ, сомэ мин 214-рэ, офицерхэм — мин 300-м нэс.
Ащ нэмыкIэу, дзэкъулыкъушIэхэм къатефэрэ фэгъэкIотэныгъэхэр зэкIэри гуфакIохэм яIэх: гъомылапхъэхэр ыкIи шъуашэхэр, медицинэ фэIо-фашIэхэр, ыпкIэ хэмылъэу транспортым рызекIонхэр, зэо зэпэуцужьхэм ахэлэжьагъэхэу ветераныцIэр къафагъэшъошэныр.
— Социальнэ IэпыIэгъухэри зэфэдэу аIукIэщтых. Зэзэгъыныгъэ шIыкIэм тетэу къулыкъу зыхьыхэрэм афэдэу гуфакIохэм яунагъохэми ыпкIэ хэмылъэу кIэлэцIыкIу IыгъыпIэхэм, кружокхэм, секциехэм, еджапIэхэм ащышхэнхэ алъэ­кIыщт. Джащ фэдэу гуфакIохэм, зэрахьэгъэ лIыхъужъныгъэм елъытыгъэу, яфэшъошэ къэралыгъо тынхэри къаратых. ЯкIалэхэр гурыт ыкIи апшъэрэ гъэсэныгъэ зэрагъэгъотыным фэшI зэнэкъо­къум хэмылажьэхэу еджапIэхэм ачIэ­хьанхэ алъэкIыщт, нэмыкIхэри, — къы­хигъэщыгъ дзэ комиссарым.
АныбжьыкIэ къулыкъур зыхьынэу къызтефэхэрэм мымакIэу къахэкIых зэзэгъыныгъэ шIыкIэм тетэу дзэм кIо­хэрэр. Ащ нэмыкIэу, бзэджэшIэгъэ мыин зезыхьагъэу хьапс зытелъыгъэхэми зэзэгъыныгъэ шIыкIэм диштэу къулы­къур ахьын алъэкIыщт.
Алексей Санташовым журналистхэм яупчIэхэм джэуапхэр къаритыжьыгъ.

Iэшъынэ Сусан.