Яблоновскэм игуфэкIо купэу «Ошъо къаргъу» зыфиIорэм, общественнэ организациеу «Адыгэ Хасэм» ахэтэу, депутатэу Хьаджый Адам илъэсищ хъугъэу хэушъхьафыкIыгъэ дзэ операцием хэла­жьэ-­
хэрэм IэпыIэгъу афэхъу. Гум къикIырэ IэпыIэгъоу тидзэкIолIхэм аригъэгъотырэм осэшIу къыфашIэу ащ медалэу «За содействие СВО» зыфиIорэр къы­фа­гъэшъошагъ. «Адыгэ макъэр» шIушIакIом IукIагъ, яIофшIэн фэгъэхьыгъэу гу­щыIэгъу фэхъугъ.

ГуфэкIо IэпыIэгъур тызхэт щыIэны­гъэм хэпчын умылъэкIынэу изы Iахь хъугъэ. ХэушъхьафыкIыгъэ дзэ операциер зыщыкIорэм къыщегъэжьагъэу гуфэкIо мин пчъагъэхэр зэкъохьагъэхэу, къэралы-­
гъом афишIэрэм емыплъыхэу, ащ хэлажьэхэрэм ящыкIагъэр арагъэгъоты. Ары пакIошъ, гущыIэ фабэу алъагъэ­Iэсыхэрэм дзэкIолIхэм осэшIу фашIы.
— Дзэ операцием хэлажьэхэрэм зэрэ Хэгъэгоу адэIэпыIэ. Адыгеир ахэм ахэт, тонн пчъагъэ шIушIэ IэпыIэгъоу афитIупщыгъ, нэмыкIэу афишIэрэр хэмытэу. Къыхэзгъэщымэ сшIоигъу лIыбланэу заохэу, тын лъапIэхэр къызфагъэшъошагъэхэу тиадыгэ кIэлабэ ащ зэрэщы-
Iэр. Ахэм тызэракъотыр, тызэрафэгумэкIырэр зэхашIэнэу тыфай. Ары тызп­ы­лъыри, зыуж титыри. Къэралыгъор чIыпIэ зэжъу зеуцом, ащ щыпсэухэрэр зэкъохьагъэх, узэдеIэжьын фае. ТкIуачIэ зэхэлъымэ — тылъэш! — хигъэунэфыкIыгъ Хьаджый Адам.

ГуфэкIо купэу «Ошъо къаргъу» зыфиIорэм Адам нэмыкIэу Дмитрий Винокуровыр ыкIи Екатерина Луговскаяр хэтых. Мыхэм яунэе мылъкукIэ аугъоирэ IэпыIэгъухэм къахэлажьэхэрэм ащыщых Яблоновскэ къэлэ псэупIэм ипащэу Атэжьэхьэ Заурдин, депутатэу Чэсэбый Алый. ДзэкIолIхэм зэпхыныгъэ адыряIэу ящыкIагъэхэм ащагъэгъуазэх, ащ тетэу IэпыIэгъур аугъои. Ежь нэбгырищэу гуфэкIо купым хэтхэм ямашинэхэр аушъэхэшъ, чIыпIэ гъэнэфагъэхэм афащэ. ТидзэкIолIхэр зыдэщыIэ лъэныкъо пстэуми ахэр анэсых: Херсон ыкIи Запорожскэ хэкухэм, Луганскэ ыкIи Донецкэ республикэхэм.
— Дронхэр ташъхьагъ итхэу тыу­гъоирэ IэпыIэгъур зэкIэ тэр-тэрэу афэтэщэ. Зыкъытфэзыгъэзагъэхэм аIукIэнымкIэ а шIыкIэр нахь дэгъоу къыхэтхыгъ. Анахь ящыкIагъэу къызкIэлъэIу­хэрэр техникэр ары. Ащ имызакъоу, бэ идгъэгъусэжьырэр. Илъэс зэкIэлъыкIохэм афэтщагъэр зэкIэ къэсIошъунэп, ау анахь шъхьаIэхэр къыхэзгъэщын: автомобилэу «УАЗ», квадроцикл, генераторхэр, квадрокоптерхэр, зэрыгыкIэхэрэ машинкэр, щыгъын ыкIи гъомылэпхъэ зэфэшъхьафхэр, Iэзэгъу уцхэр, зыухъу­мэхэрэ хъытыухэр, нэмыкIхэри, — къы­Iуагъ Хьаджый Адам.
«ЗэкIэ ТекIоныгъэм пай, зэкIэ ти­дзэкIолIхэм апай зыфатшIэрэр» аIозэ, гуфэкIо купым хэтхэм япшъэрылъ агъэ­цакIэ. Агу къикIэу IэпыIэгъоу афашIэрэм шIукIэ къафигъэзэжьынэу афэтэIо.

Iэшъынэ Сусан.