Типшъашъэхэм текIоныгъэр къыдахыгъ
Пневматическэ кIэрахъомкIэ Урысыем изэнэкъокъу Адыгеим ипшъэшъэжъыехэм дэгъоу зыкъыщагъэлъэгъуагъ.
Зэнэкъокъухэр бэдзэогъум и 9-м къыщыублагъэу и 18-м нэс щыкIуагъэх псэупIэу Игнатовэм (Москва хэку) дэт щэрыопIэ комплексэу «Лисья нора» зыфаIорэм. Мы илъэсым а Iофтхьабзэм нэбгырабэ ыугъоигъ — спортсмен 700-м ехъу ахэм ахэлэжьагъ.
ЩэрыонымкIэ республикэ спорт еджапIэм итренерхэу, Урысыем изаслуженнэ тренерхэу Георгий Гуляйченкэмрэ Сергей Алифиренкэмрэ агъэсэхэрэ Анна Андращук, Хьажъджэрые Бэллэ ыкIи Мария Бушуевар команднэ зэнэкъокъухэм ялъэхъан яIэпэIэсэныгъэкIэ апшъэ итыгъэх. Финалым ахэр IукIагъэх «Санкт-Петербург-3» зыфиIорэ командэм. Я 15-рэ, аужырэ зэIукIэгъум нэс текIоныгъэр зыхьыщтыр къэшIэгъоягъ.
Зэнэкъокъум иублэгъум тикомандэ апэ ишъыгъ, ау Петербург испортсменхэм пчъагъэр зэфэдэ ашIын ыкIи тапэ ишъынхэ алъэкIыгъ (8:10), кIэухым благъэу къекIолIагъэхэу Санкт-Петербург икомандэ текIоныгъэр ыхьыщтыгъ, ау типшъашъэхэм яIэпэIэсэныгъэ ишIуагъэкIэ пчъагъэр 16:14-у текIоныгъэр къыдахыгъ. ЯтIонэрэ чIыпIэр Санкт-Петербург икомандэ ыубытыгъ, ящэнэрэ хъугъэ Москва икомандэ.