Урысыем и Почтэ и Маф

1994-рэ илъэсым къыщегъэжьагъэу бэдзэогъум иятIонэрэ тхьаумафэ почтэ зэпхыныгъэм иIофышIэхэм ямэфэкI хагъэунэфыкIы. Почтэм тыди Iоф щишIэн фае — къэлэшхохэм къащегъэжьагъэу анахь пэIудзыгъэ псэупIэхэм анэсыжьэу. Социальнэ фэIо-фашIэу ыгъэцакIэрэри макIэп. ЯмэфэкI ехъулIэу Урысыем и Почтэ Адыгэ РеспубликэмкIэ и ГъэIорышIапIэ ипащэу Наталья Алифиренкэм «Адыгэ макъэр» IукIагъ, къулыкъум инепэ, къэкIощт уахътэмкIэ еплъыкIэхэм защигъэгъозагъ.

— Наталья, Адыгеим и Почтэ игугъу къэтшIымэ, непэ сыда ащ изытет?
— Почтэм иIофышIэхэмкIэ мы мэфэкIым мэхьанэ иI. Хэти илъэсым ышIэ­гъэ IофшIэныр зэфехьысыжьы, тапэкIэ гухэлъышIухэр зыфегъэнафэх. Шъхьадж ышIагъэм елъытыгъэу нэбгырэ пэпчъ къыхэдгъэщыным тыпылъ. Урысыем и Почтэ ишъолъыр ГъэIорышIапIэ отделении 130-м ехъу къыхеубытэ, янахьыбэр къоджэ псэупIэхэм ащыIэх. Ахэм непэрэ мафэм ехъулIэу нэбгырэ 708-мэ Iоф ащашIэ, ащ щыщэу 352-р — почтальоных. ИкIыгъэ илъэсым къызэрыкIо ыкIи «заказной» зыфаIорэм фэдэ корреспонденцие миллиони 5,7-м ехъумэ посылкэ ыкIи бандероль мин 400-м ехъумэ Iоф адашIагъ. Урысые почтэм и Мафэ ехъу­лIэу щытхъу ыкIи рэзэныгъэ зыхэлъ тхылъхэмкIэ тиIофышIэ 41-мэ тафэгу­шIуагъ. Мыхэм янахьыбэм яIофшIэпIэ чIыпIэхэм мэфэкIыр ащахагъэунэфы­кIыщт, сыда пIомэ зэхэшыпыкIыныр ыкIи логистикэр зы мафэкIи къызэтеуцохэрэп. Почтэм иIофышIэхэм пенсиехэр, социальнэ ахъщэ тынхэр, корреспонденциер цIыфхэм афахьы.
Почтэм инеущ игугъу къэтшIымэ, пшъэрылъэу тиIагъэхэр къэнагъэх — цIыфхэм яфэIо-фашIэхэр зэрэдгъэцэкIэщтым тыпылъ, цифрэ технологиехэмрэ логистикэмрэ зягъэушъомбгъугъэныр, проектыкIэхэр чанэу пхырыщыгъэнхэр.
— Аужырэ илъэсыр тштэмэ, сыда шъуиIофшIэн зэхъокIыныгъэу фэхъугъэр?
— ИкIыгъэ илъэсым QR-идентификациекIэ посылкэхэр къаIытхынхэ ыкIи дгъэхьынхэ амал тиIэ хъугъэ. ТтIупщырэ пстэуми ятхын епхыгъэ IофшIэныр фэдищкIэ нахь псынкIэ ащ къышIыгъ. 2025-рэ илъэсым ибэдзэогъу мазэ къы­щегъэжьагъэу Мыекъуапэ дэт гупчэ къутамэм (385000) чэщи мафи посылкэхэр ыштэнхэу ригъэжьагъ. Ащ пае цIыфхэр зычIэхьэрэ залым хэушъхьафыкIыгъэ шъхьаныгъупчъэ къыщызэIутхыгъ. Мы проектым имурадыр къы­тэолIэрэ цIыфхэм ежьхэмкIэ нахь Iэ­рыфэгъу уахътэр къыхахыныр ары. Мыр афэIэрыфэгъу къэлэдэсхэу пчыхьэ кIахэ нэс лажьэхэрэм ыкIи пчэдыжьым жьэу IофышIэ кIохэрэм. Урысыем и Почтэ маркетплейсхэм зэдэлэжьэныгъэ адыриI, къутамэхэм, зэкI пIоми хъунэу, къагъэ­хьырэ товархэр зыщызэрагъэпшэщт чIыпIэхэр ахагъэуцуагъэх.
— Наталья, шъуимэфэкI ипэгъокIэу тызэIукIагъэми, Iофыгъоу къэуцухэрэми такъыкIэмыупчIэнэу хъурэп. Рес­публикэм ит къутамэхэм ащыщхэр зэфашIыжьэу зэхэтхыгъ. Сыдым еп­хыгъа ар?
— Почтэ къутамэхэр зэфэтшIыхэрэп, ау охътэ гъэнэфагъэкIэ фэIо-фашIэу агъэцакIэхэрэм яшIыкIэ зэблэтхъун фаеу мэхъу. IофышIэ тедзэхэр зищыкIагъэ хъурэ къутамэхэм кощырэ купэу гъэIорышIапIэм иIэр тэгъакIо. Арэущтэу зыхъурэр зыгъэпсэфыгъо уахътэм кIо­хэмэ, къэсымаджэхэмэ, операторэу е почтальонэу Iоф зышIэн щымыIэмэ ары. Ау, сыдэу хъугъэми, пенсиехэр ыкIи социальнэ ахъщэ тынхэр типочтальонхэм игъом ахьы. ГумэкIыгъоу къэуцухэрэм тащыгъуаз, талъэплъэ, зэхэтэфых.
УпчIэу къэптыгъэм лъыпыдзагъэу къасIомэ сшIоигъу почтэ къутамэхэр нахь зэрэдгъэкIэжьыщтым тызэрэпы­лъыр. Сыда пIомэ, къоджэдэсхэмкIэ мыр Iэрыфэгъу дэд. Нэжъ-Iужъхэр зэресагъэ­хэу мыщ къэкIох ыкIи а зы чIыпIэм псэупIэ-коммунальнэ фэIо-фашIэхэм апкIэ атын, пенсиер къычIахын, зыфэе товархэр, псауныгъэм фэгъэхьыгъэ журналхэр, хэутыгъэхэр щащэфынхэ, ягупсэхэм ахъщэ афатIупщын алъэкIы.
2024-рэ илъэсым почтэм икъутэмищ дгъэкIэжьыгъэ: поселкэхэу Каменномостскэм, Табачнэм ыкIи къуаджэу Блащэпсынэ. Джащ фэдэу технологиякIэхэм адиштэрэ псынкIэу зэтырагъэ­псыхьэрэ шIыкIэм тетэу офисиплI тшIыгъэ. УФ-м и Президентэу Владимир Путиным иунашъокIэ ыкIи партиеу «Единэ Россием» иIэпыIэгъукIэ къоджэ почтэ къутамэхэм ягъэкIэжьын 2022-рэ илъэсым къыщегъэжьагъэу компанием ригъэжьагъ.
— КIэтхэгъу Iофым игугъу къэтшIымэ, шъолъыр ыкIи федеральнэ гъэзетхэм ащыщэу тара нахьыбэу къыратхыкIырэр? КIатхэхэрэм япчъа­гъэ зэхъокIыгъа?
— СыдигъокIи гъэзетхэр, журналхэр зикIасэхэр щыIэх ыкIи якIэтхэгъу благъэкIырэп. Анахьэу къыратхыкIыхэрэм ащыщ чъыгхатэхэм ялэжьын, пщэрыхьаным афэгъэхьыгъэхэр, кIэлэцIыкIу литературэр. Шъолъыр ыкIи федеральнэ гъэзетхэр зэфэдэу къыратхыкIых къысшIошIы. КъитхыкIын Iофым тылъэплъэ, зэпымыоу илъэс пчъагъэхэм кIэтхакIоу тиIэхэм ащыщ къыримытхыкIыгъэу зыхъу­рэм, тыкIэупчIэ. КIэтхэгъу уахътэм игъо имыфагъэхэу, мазэ тешIэмэ, къыкIэлъы­кIорэм къыратхыкIыжьэуи мэхъу.
— Мыщ Iоф щызышIыхэрэм ныбжьыкIэхэр ара, хьауми ныбжь зиIэхэр ара нахьыбэр?
— Тэрэзэу къэпIон зыхъукIэ, почтэм «бзылъфыгъэ нэгу» иIэр. Мыщ Iоф щызышIэрэм инахьыбэр бзылъфыгъэх. Аныбжь игугъу къэтшIымэ, ныбжьыкIэхэр макIэх, нахьыбэм ныбжь яI. Ахэм Iоф­шIэнымкIэ IэпэIэсэныгъэу аIэкIэлъыр къыIухьэгъакIэхэм зэралъагъэIэсыщтым ыуж итых.
— ШъуимэфэкI епхыгъэу уиIофшIэгъухэм сыда япIомэ пшIоигъор?
— ТиIофшIэн мэхьанэ иI ыкIи зыми ебгъэпшэшъущтэп. ЩыIэныгъэм тыготэу тыкIозэ, тишэн-хэбзэшIухэр къызэтетэгъанэх, технологиякIэхэр лъытэгъэкIуа­тэх. СиIофшIэгъухэм псауныгъэ пытэ яIэу, гъэхъагъэхэр ашIыхэу, шIоу щыIэр къа­дэхъоу, мамыр огур ашъхьагъэу щыIэнхэу сафэлъаIо!