Сэнэхьатхэм нэIуасэ афэхъущтых
Мыекъопэ къэралыгъо технологическэ университетыр проектэу «Университетские смены» зыфиIорэм хэлажьэ. Урысые Федерацием и Президент иунашъокIэ УФ-м шIэныгъэмрэ апшъэрэ гъэсэныгъэмрэкIэ и Министерствэрэ Урысые общественнэ-къэралыгъо движениеу «Апэрэхэм ядвижение» зыфиIорэмрэ ар зэхащэ.
КIэлэеджакIохэм ящыIэныгъэ зэрапхыщт сэнэхьатым икъыхэхын епхыгъэ гъэсэныгъэ-зекIо программэу «Университетские смены: ингредиенты успеха («Пицца профессии») зыфиIорэр Мыекъопэ къэралыгъо технологическэ университетым зэхигъэуцуагъ. Ащ къыдыхэлъытагъэу IофшIэгъу чэзыуитIу апшъэрэ еджапIэм щызэхащэщт. Мэфи 10-м къыкIоцI ныбжьыкIэхэм гъэсэныгъэ, культурнэ Iофтхьэбзэ зэфэшъхьафхэр афызэхащэщтых. ЯшIэныгъэхэм зэрахагъахъорэм дакIоу загъэпсэфын амал яIэщт ыкIи зекIо кIощтых.
Лагерым иапэрэ IофшIэгъу чэзыу бэдзэогъум и 17-м аублэщт. Илъэс 14-м къыщегъэжьагъэу 17-м нэс зыныбжьыхэр ары ащ хэлэжьэщтхэр, сэнэхьат зэфэшъхьафхэм нэIуасэ афэхъущтых.
ЗэхэщакIохэм зэрагъэнафэрэмкIэ, Урысыем исубъектыкIэхэм, джащ фэдэу Белгородскэ, Курскэ, Брянскэ хэкухэм къарыкIыщт ныбжьыкIэхэр хэлэжьэщтых. ЫпэрапшIэу хэушъхьафыкIыгъэ дзэ операцием щыIэхэм ясабыйхэр ыкIи «Движение первых» зыфиIорэм зэхищэгъэ къыхэхыным пхырыкIыгъэхэр ары къекIолIэщтхэр.
Къыхэгъэщыгъэн фае Херсон хэкум къикIырэ сабыйхэм Адыгеир агу зэрэрихьырэр. КIэлэцIыкIухэм яшIэныгъэхэм зэрахагъахъорэм дакIоу ныбджэгъуныгъэ азыфагу къехьэ.
Мыекъопэ къэралыгъо технологическэ университетым джыри чIэмыхьагъэхэм Iоф адэзышIэрэ гупчэм ипащэу Олег Франк къызэриIуагъэмкIэ, мы IофшIэным къыдыхэлъытагъэу университетым къытырэ сэнэхьатхэм ныбжьыкIэхэр нэIуасэ афэхъущтых. Ягухэлъхэр къадэхъунымкIэ мурадхэр зэрагъэуцун фаехэр къафаIотэщт. Мы апшъэрэ еджапIэм гъэхъагъэхэр щашIынхэмкIэ амалыбэ къызэраритырэр арагъэлъэгъущт.
Мыекъопэ къэралыгъо технологическэ университетым ныбжьыкIэхэм Iоф адэшIэгъэнымкIэ амалышIухэр къыхехых. Ахэм ащыщых лъэпкъ зэфэшъхьафхэр зыхэлэжьэрэ Урысые ныбжьыкIэ форумэу «В согласии и единстве — наша сила» зыфиIорэр, унэгъо сообществэм ифорумэу «Родные — Любимые», шъолъыр форумэу «Адыгеим иныбжьыкIэхэр», шъолъыр студенческэ форумэу «Твой ход» ыкIи нэмыкIыбэ.
Мыекъопэ къэралыгъо технологическэ университетым ипресс-къулыкъу.