2025-рэ илъэсым зыкI къэралыгъо ушэтынхэр анахь дэгъоу зытыгъэхэм, предмет зэфэшъхьафхэмкIэ балли 100 къизыхыгъэхэм нэIуасэ шъуафэтэшIы.

Александр Мусиныр
УрысыбзэмкIэ ыкIи физикэмкIэ балли 100 къыхьыгъ. Мыекъопэ лицееу
N 34-р къыухыгъ. Апэрэ мафэм къы­щегъэжьагъэу физикэм фэщагъ, я 9-рэ классым ежь-ежьырэу къыхихи мы предметымкIэ зызеушэтым, 5 къыхьыгъ, апшъэрэ классхэм нахь игъэкIотыгъэу зэригъэшIэнэу ыублагъ, олимпиадэхэм ренэу ахэлэжьагъ, зэрифэшъуашэу за­къыщигъэлъэгъуагъ. Я 11-рэ классым исэу олимпиадэхэу «Физтех», «Росатом», «Инженерная олимпиада школьников» зыфиIохэрэм ахэлэжьагъ ыкIи шIэныгъэ куухэр къызэращигъэлъэгъуагъэм ишIуагъэкIэ апшъэрэ еджэпIэ анахь дэгъухэм ачIэхьанымкIэ фэгъэкIотэнхэр иIэщтых. Александр профильнэ хьисапымкIэ балл 95-рэ къырихыгъ.

Анастасия Гужовар
ХимиемкIэ анахь балл иныр къыхьыгъ. Я 34-рэ Мыекъопэ лицеим ще­джагъ.ЕджапIэм имызакъоу, гъэсэныгъэ гупчэу «Полярис-Адыгеям» ишIэныгъэхэм ащыхигъэхъуагъ, джащ фэдэу химиемкIэ апэрэ гъэмэфэ еджапIэм кIуагъэ, Рес­публикэ естественнэ-хьисап еджапIэми шIэныгъэу щигъотыгъэхэр къыфэфе­дэ­жьыгъэх. ШIушIэ фондэу «Путевка в жизнь» ипрограммэу «Поддержи таланты» зыфиIорэм хэлажьи, ифинал ихьэгъагъ. Ащ ишIуагъэкIэ еджэгъу илъэсым къыкIоцI ыпкIэ хэмылъэу зыкI къэралыгъо ушэтынхэм языфэгъэхьазырынкIэ курсхэм кIон амал иIагъ. Химиер шIу езыгъэлъэгъугъэ кIэлэегъаджэу Елена Юндинам зэрэфэразэр къыхигъэщыгъ. Анастасие нэмыкI предметхэмкIи къэгъэлъэгъон дэгъухэр иIэх: урысыбзэмкIэ — балл 86-рэ, профильнэ хьисапымкIэ — 86-рэ къырихыгъ.

Аскар Шафиковыр
ХимиемкIэ балли 100 къырихыгъ. Тэхъутэмыкъое районымкIэ поселкэу Яблоновскэм дэт гурыт еджапIэу N 5-р къыухыгъ. Химиер къины нахь мышIэми, гъэшIэгъонэу ащ елъытэ. Я 11-рэ классым щеджэфэ мафэ къэс ежь-ежьырэу Iоф зэрэзыдишIэжьыгъэм имызакъоу, тхьамафэм тIо онлайн-репетиторымкIэ ишIэныгъэхэм ахигъэхъуагъ. Предмет зэфэшъхьафхэмкIэ Урысые олимпиадэхэм ямуниципальнэ ыкIи шъолъыр уцугъохэм текIоныгъэ, хагъэунэфыкIырэ чIыпIэхэр къащыдихыгъэх. Телевизионнэ гуманитар олимпиадэу «Умницы и умники» зыцIэм хэлэжьагъ. «Фыщт 2024-м» щыIагъ. НыбжьыкIэхэм апае зэхащэрэ Урысые мэкъумэщ зэ­нэкъокъум ишъолъыр уцугъо хэлэжьагъ. УрысыбзэмкIэ — балл 89-рэ, про­фильнэ хьисапымкIэ — 82-рэ, биологиемкIэ — 95-рэ къыхьыгъ.

ХьакIмэфэ Мэдин
ФизикэмкIэ анахь балл иныр къыри­хыгъ. Адыгэ республикэ гимназием щеджагъ. КIэлэегъаджэхэм къызэраIорэмкIэ, лъэныкъо зэфэшъхьафхэмкIэ шIэныгъэ куу уиIэн зэрэплъэкIыщтымкIэ мы кIалэр щысэтехыпI. Литературэмрэ тарихъымрэ дэгъоу зэришIэхэрэм дакIоу, физикэмкIэ, химиемкIэ, хьисапымкIэ шIэныгъэ ­куухэр иIэх, спортымкIи, музыкэмкIи пэрытхэм ащыщ. ГъэхъэгъэшIухэм анэсынымкIэ гимназием икIэлэегъаджэхэу ыкIи унагъоу къыкъотыгъэхэм зэрафэразэр ащ къеIо. УрысыбзэмкIи, профильнэ хьисапымкIи балл 86-рэ къыхьыгъ.

Татьяна Лысенкэр
УрысыбзэмкIэ балли 100 къыхьыгъ. Тэхъутэмыкъое районымкIэ поселкэу Инэм дэт гурыт еджапIэу N 25-р къыу­хыгъ. Мыщ фэдэ бэрэ къыхэкIырэп, пшъэшъэжъыем я 10-рэ классыр къеухы ныIэп. КIэлэегъаджэхэм Татьянэ гъэхъэ­гъэшIухэр зэриIэр къыхагъэщы. 2022-рэ илъэсым къыщегъэжьагъэу Урысые олимпиадэхэм ямуниципальнэ уцугъохэм къащахагъэщыгъ. Татьянэ урысыбзэмрэ литературэмрэ дэгъоу ешIэти, агъэшIэгъуагъэп пэшIорыгъэшъэу урысыбзэмкIэ зиушэтынэу зэригъэнэфагъэр ыкIи балл анахь иныр къызэрэрихыгъэр.

Полина Пранкевич
ЛитературэмкIэ анахь балл иныр къырихыгъ. Мыекъопэ гурыт еджапIэу N 2-м щеджагъ. ИкIэлэегъаджэу Ангелина Осадчаям ишIуагъэкIэ гуманитар шIэныгъэхэм нахь зафигъэзагъ. Я 11-рэ классым онлайн еджапIэм егъэджэн псынкIэхэр щикIуи, зэригъэшIагъэр охътэ кIэкIым ыгу къыгъэкIыжьыгъ. Полинэ литературэмкIэ Урысые олимпиадэм ишъолъыр уцугъо зэрифэшъуашэу зыкъыщигъэлъэгъуагъ. НэмыкI ушэтынхэри дэгъоу ытыгъэх: урысыбзэмкIэ балл — 83-рэ, базовэ хьисапымкIэ пчъэгъэ анахь иныр къыхьыгъ.

Яна Исущевар
УрысыбзэмкIэ анахь къэгъэлъэгъон иныр иI. Мыекъопэ лицееу N 19-м ще­джагъ. Урысыбзэр сыдигъокIи анахь ыгу рихьырэ предметхэм ащыщыгъ. Пшъэшъэ­жъыем репетитор имыгъусэу ушэтыным зыфигъэхьазырыгъ. Шапхъэхэр зыдэт справочникхэр илъэс зэкIэлъыкIохэм ыгъэхьазырыгъэхэу щытыгъэти, кIэджыкIыжьыныр къин къыщыхъугъэп, шIэныгъэ дэгъу дэдэ зэриIэр къыгъэлъэ­гъуагъ. Джащ фэдэу профильнэ хьисапымкIэ балл 82-рэ, информатикэмкIэ 72-рэ пшъэшъэжъыем къыхьыгъ.

Роман Сафроновыр
ГеографиемкIэ балли 100 къырихыгъ. Мыекъопэ гурыт еджапIэу N 7-р къыу­хыгъ.
КIалэр сыдигъокIи анахь дэгъухэм ясатырэ хэтыгъ. Я 11-рэ классым ще­джэзэ географиемкIэ кIэлэеджакIохэм апае зэхащэрэ Урысые олимпиадэм имуниципальнэ уцугъо текIоныгъэ къыщыдихи, республикэ уцугъом ипризер хъугъагъэ. НэмыкI предметхэмкIи балл дэгъухэр Роман иIэх: урысыбзэмкIэ — 58-рэ, профильнэ хьисапымкIэ — 72-рэ, информатикэмкIэ — 51-рэ къылэжьыгъ.

Зыгъэхьазырыгъэр ДЕЛЭКЪО Анет.