Москва хэкум и Орехово-Зуевскэ район икъалэу Куровскоим спортымкIэ и Ордэунэу «Молодежный» зыфаIоу дэтым щыкIуагъ спорт клубхэм голболымкIэ защызыгъа­сэхэрэм ятурнир.

Хьафизэхэм я Урысые обществэ (ВОС-м) ипрезидент и Кубок къыдэхыгъэным ар фэгъэхьыгъагъ. Дэеу зылъэгъухэрэмкIэ мыр спорт Iофтхьэбзэ къодыягъэп, ящыIакIэкIэ мэхьанэшхо ащ иIагъ. Ащ фэдэ Iофтхьабзэхэм зипсауныгъэ пыч фэхъугъэхэм щыIэныгъэм зыкъыхагъотэнымкIэ, ныбджэгъухэр нахьыбэ хъунхэмкIэ, яцыхьэ зытелъыжьынымкIэ яшIогъэшхо къэкIо.
Зэнэкъокъум нафэ къышIыгъ командэхэм яшъыпкъэу ащ зызэрэфагъэхьазырыгъэр. Ащ къеушыхьаты голболым Урысыем зызэрэщиушъомбгъурэр.
Турнирым команди 9 хэлэжьагъ, ахэр Урысыем ишъолъыр зэфэшъхьафхэм: Адыгэ Республикэм, Москва, Московскэ, Ниже­городскэ, Тульскэ хэкухэм къарыкIыгъэх.
Хъулъфыгъэ командэхэмкIэ анахь лъэшыгъ, текIоныгъэр къыдихыгъ Адыгэ Респуб­ликэм икомандэ. ЯтIонэрэ хъугъэ командэу «Тула», ящэнэрэ чIыпIэр ыубытыгъ «Мос­ковская область 1» зыцIэ командэм.
Адыгэ Республикэм икомандэу а цIэ дэдэр зыхырэм текIоныгъэ къызэрэдихыгъэр къэралыгъо программэу «Физическэ культурэм ыкIи спортым хэхъоныгъэ ягъэшIы­гъэныр» зыфиIорэм шIуагъэу къыхьырэм ишыхьат. Къэралыгъор IэпыIэгъу къафэхъузэ, спортсменхэр зэнэкъокъухэм ахэлэжьэнхэ, Iоф зыдашIэжьын амал агъоты. Мы текIоныгъэм ахэм шIошъхъуныгъэ къахилъхьагъ тапэкIи гъэхъагъэхэр ашIынхэ зэралъэкIыщтымкIэ, а спорт лъэпкъым шъолъырым зыщиушъомбгъун амал зэриIэщтымкIэ. Iоф­тхьабзэм къыушыхьатыгъ зипсауныгъэ пыч фэхъугъэхэми гъэхъэгъэшхохэр ашIынхэ зэ­ралъэкIыщтыр. Сэкъатныгъэ зиIэхэм ягу­мэкIыгъохэм общественностым ынаIэ атыридзэнымкIи амалышIоу щытых ащ фэдэ Iофтхьабзэхэр. Ахэм ахэлэжьэрэ цIыфхэр сэкъатныгъэ зиIэхэм щысэтехыпIэ афэхъух, щыIэныгъэм чIыпIэ щаубытыным фэщэгъэнхэмкIэ кIочIэшIух.