ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Шэуджэн ДРСУ-м» иIофышIэхэм автомобиль гъогоу «Хьакуры­нэхьабл — Пщыжъ­хьабл» зыфиIорэм щыщ ­метрэ 800 зикIыхьэгъэ гъогу Iахьым епхыгъэ ­IофшIэнхэр аухых.

Лъэпкъ проектэу «ЩыIэны­гъэм пае инфраструктурэр» зыфиIорэм къыдыхэлъытагъэу а IофшIэнхэр макIох, шъолъырым щыпсэурэ цIыфхэм ягъогу­хэм язытет нахьышIу шIыгъэным ыкIи цIыфхэм ящыIакIэ зыкъегъэIэтыгъэным ар фэлажьэ. Автомобиль гъогум изы Iа­хьэу агъэцэкIэжьырэм социальнэ мэхьанэ зэриIэр хэгъэунэфыкIыгъэн фае, сыда пIомэ къуаджэу Хьакурынэхьаблэ иурамэу Шэуджэным ыцIэкIэ щытымкIэ Шэуджэн районым игупчэ сымэджэщ цIыфхэр нэсынхэ алъэкIы.
Автомобиль гъогухэмкIэ Гъэ­IорышIапIэу «Адыгеяавтодорым» къызэрэщаIуагъэмкIэ, гъогушI­хэм транспортыр зэрыкIорэ гъогум жъы хъугъэ асфальтыр тырахыжьы, кIэу тыралъхьэ ыкIи гъогубгъухэр агъэпытэх. Ащ нэ­ужым подряднэ организацием иIофышIэхэм агъэкIэжьыгъэ гъогур агъэтхъыщт.
IофшIэнхэм апэIухьанэу сомэ миллион 18,3-рэ къыхагъэ­кIыгъ.
Шъугу къэтэгъэкIыжьы: ­лъэпкъ проектэу «ЩыIэныгъэм пае инфраструктурэр» зыфи­Iорэм къыдыхэлъытагъэу мы илъэсым Шэуджэн районым автомобиль гъогоу «Мыекъуапэ — Джаджэр — Псыбай — Зеленчукскэр — Карачаевскэр» зыфиIорэм иIахьи 4-у кило­метри 4,1-рэ фэдиз зикIыхьагъэр щагъэцэкIэжьыгъ.