Адыгэ Республикэм и ЛIышъхьэу КъумпIыл Мурат промышленнэ паркэу «Инэм» зыфиIо­рэм ирезидентхэм АР-м и Правительствэ зычIэт унэм IофшIэгъу зэIукIэгъу щадыриIагъ.

Нафэу зэрэщытымкIэ, промышленнэ паркыр респуб­ликэм ипроект шъхьаIэхэм ащыщ, пIэлъэ кIыхьэм къыкIоцI промышленностым хэ­хъоныгъэ ышIыным иамал
ащ къытыщт, республикэм иэкономикэ тапэкIи хэхъо­ныгъэ ышIыным кIочIакIэ къыхилъхьащт.
Мы зэIукIэгъум илъэхъан зытегущыIагъэхэр проектым хэлэжьэнхэмкIэ амалэу щы­Iэхэр, хэбзэ къулыкъухэм IэпыIэгъоу къаратыщтыр,
ре­зидентхэмрэ пэщэныгъэ зезыхьэрэ компаниехэмрэ азы­фагу илъ зэдэлэжьэны­гъэм хэхъоныгъэ зэришIыщтыр ары. Нахь игъэкIоты­гъэу Iофыгъохэм атегущыIэнхэм пае къырагъэблэгъагъэх АР-м иминистрэхэм я Кабинет и Тхьаматэу КIэрэщэ Ан­заур, министрэхэм я Кабинет и Тхьаматэ игуадзэу ЛIыхэсэ Махьмуд, минис­терствэхэм ыкIи предпринимательствэм IэпыIэгъу етыгъэнымкIэ организациехэм япа­щэхэр.
Адыгеим и ЛIышъхьэ къызэрэхигъэщыгъэмкIэ, промышленнэ къыдэгъэкIыным рес­публикэм хэхъоныгъэ щешIы, предприятиехэм IэпыIэгъу ятыгъэнымкIэ амал зэфэ­шъхьафхэр игъэкIотыгъэу агъэфедэх. Урысыем и Правительствэ и Тхьаматэ иапэ­рэ гуадзэу Денис Мантуро-
выр мы илъэсым гъэтхапэм Адыгеим къызэкIом, промышленностым ихэхъоныгъэкIэ республикэм Iофэу щагъэцакIэрэм осэшIу къыфишIыгъ.
«ДжырэкIэ Iоф зышIэрэ предприятиехэм хэхъоныгъэ зэрашIыщтым тынаIэ зэрэтедгъэтырэм дакIоу, инвестиционнэ проектыкIэхэр на­хьыбэу а Iофым къыхэгъэлэжьэгъэнхэми тыдэлажьэ.

ПроизводствакIэхэр тиIэ хъунхэм тынаIэ тетэгъэты. Ащ пае Iоф щашIэнымкIэ фэгъэкIотэныгъэ зыхэлъ амалхэр зыдэщыIэ промышленнэ шъолъырхэм нахь лъэшэу тынаIэ атетэгъэты. АщкIэ бэ зэшIотхыгъэр ыкIи джыри тапэкIэ Iоф­тхьэбзэ инхэр зэшIотхынхэу къызэрэтпыщылъыр тэлъэгъу. Промышленностым ылъэныкъокIэ гугъэпIэ инхэр къэзытырэ инвестиционнэ проектхэр пхырыщыгъэн­хэм пае шъолъыр гъэнэфагъэхэр нахь игъэкIотыгъэу гъэфедэгъэнхэм тынаIэ тетэгъэты. Адыгеир экономикэмкIэ нахь хэхъоныгъэшхо зышIырэ шъолъырхэм ащыщ хъуным тыдэлажьэ», — къыхигъэщыгъ КъумпIыл Мурат.
АР-м и ЛIышъхьэ зэхэсыгъом хэлажьэхэрэм къафиIотагъ Iофэу зэшIуа­хырэм ыкIи джырэкIэ проектым изытет афэгъэхьыгъэу. Промышленнэ шъолъырэу гектар 200 хъурэм хэхьэх пшъэры­лъыбэ зэшIозыхыщт паркымрэ индуст­риальнэ паркэу «Инэм» зыфиIорэмрэ. ТапэкIи а чIыгум джыри нахь зырагъэу­шъомбгъун мурад яI.
Промышленнэ шъолъырым зэрищыкIагъэм тетэу Iофтхьабзэхэр щызэшIохыгъэнхэм пае ищыкIэгъэ транспорт-инженер инфраструктурэу сомэ миллиарди 3,3-рэ зытефагъэр агъэпсыгъ: а чIыпIэм электричествэр, гъэстыныпхъэ шхъуантIэр, псыр, псы гощыпIэр иIэх. Мы лъэхъаным административнэ унэмрэ промышленнэ унэу квадрат метрэ мини 4,6-рэ хъурэмрэ агъэпсыгъахэх. АР-м исоциальнэ-экономикэ хэхъоныгъэкIэ унэе программакIэм тегъэпсыхьагъэу промышленнэ шъолъырым ихэхъоныгъэ лъэкIуатэ. Предпринимательствэ цIыкIум­рэ гурытымрэ апае Iоф зыщашIэщт унэхэр агъэпсыщтых, а Iофым сомэ мил­лион 825-рэ пэIухьащт. Апэрэ резидентхэр япшъэрылъхэм афежьэгъахэх. Хъызмэт 50 пстэумкIи агъэнэфагъ, инвестициеу сомэ миллиард 55-рэ фэдиз Iофхэм апэIухьащт. IофшIэпIэ чIыпIакIэу мини 8-м ехъу зэхащэщт.
Адыгеим и ЛIышъхьэ республикэм иэкономикэ хэхъоныгъэ ышIынымкIэ промышленнэ паркым гугъапIэу рап­хыхэрэм ягугъу къышIыгъ. Хэгъэгум ипа­щэхэм яIэпыIэгъу хэлъэу республикэм Iофтхьэбзэ заулэ щагъэнэфагъ, нахьыбэмкIэ ахэр зыфытегъэпсыхьагъэхэр бизнес цIыкIумрэ гурытымрэ IэпыIэгъу ятыгъэныр ары. Промышленнэ шъо­лъырым, адрэхэм ялъытыгъэмэ, лъэныкъо анахь дэгъухэу IофымкIэ къызфагъэфедэн алъэкIыщтхэр епхыгъэх. ГущыIэм пае, производствэм фытегъэ­псыхьэгъэ унэхэмрэ чIыгу Iахьхэмрэ бэ­джэндэу аштэнхэ зыхъукIэ ахъщэу атыщтымкIэ фэгъэкIотэныгъэ яIэщт, ор­ганизациехэм ямылъку хэбзэIахь тыралъхьащтэп, административнэ Iофы­гъохэри нахь Iэрыфэгъоу зэрэзэшIуахыщтхэм анаIэ тырагъэтыщт, проектхэми IэпыIэгъу афэхъущтых. Промышленнэ шъолъырыр лъэныкъоу зыдэгъэзагъэми шIогъэ гъэнэфагъэхэр пылъых, транспорт-логистикэ инфраструктурэми джырэ уахътэм диштэрэ нэшанэу иIэхэр нэрылъэгъух. Ахэм анэмыкIэу Краснодаррэ Тэхъутэмыкъое районым ипсэу­пIэхэмрэ къызэрэпэблагъэхэм къыхэкIэу IофышIэ кIуачIэхэми ар ащыкIэщтэп.
«ТэркIэ мэхьанэшхо иI инвесторхэм нахьышIум ылъэныкъокIэ гугъапIэхэр зэрэщыIэхэр икъоу зэхашIэным. Iэпы­Iэгъу ахэм афэхъугъэнымкIи амал зэфэшъхьафхэр щыIэх. Анахь гугъэпIэ инхэр зэтпхырэ бизнес-проектхэм анахь лъэшэу тынаIэ атедгъэтыщт», — къыхи­гъэщыгъ КъумпIыл Мурат.
Резидентхэм къызэраIуагъэмкIэ, зэ­дэлэжьэныгъэм фэхьазырых ыкIи промышленнэ шъолъырым производствэр щытIупщыгъэным яфедэ хэлъ. Проектхэу зытегущыIагъэхэм ащыщых производствакIэхэр ыкIи инвесторхэм къахалъхьэгъэ предложениехэр. ГущыIэм пае, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Инженер гупчэу «Апрель» зыфиIоу илъэсыбэ хъугъэу къэлэгъэпсыкIэ зиIэ псэупIэу Инэм Iоф щызышIэрэр газ котелхэр шIыгъэнхэмкIэ хэгъэгум анахь чIыпIэ ин щызыубытыхэрэм ащыщ, Промышленнэ паркым щагъэпсыщт заводыкIэ-
ми ишIуагъэ къэкIощт къыдагъэкIырэр хэпшIыкIэу нахьыбэ шIыгъэнымкIэ. IэшIу-­IушIушI фабрикэм ишIынкIэ, лъэкъопылъхьэхэм якъыдэгъэкIынкIэ, спортсменхэм нахь игъэкIотыгъэу агъэфедэрэ шхын-
хэр, къуаехэмрэ щэхэкIхэмрэ къыдэ­гъэкIыгъэнхэмкIэ, конвейер ыкIи транспортер хъытыухэр, тракторхэм апае Iэмэ-псымэ зэфэшъхьафхэр къыдэгъэ­кIыгъэнхэмкIэ проектэу щыIэхэм ахэп­лъагъэх.
КъызэрэхагъэщыгъэмкIэ, промышленнэ паркым хэхьанхэмкIэ кIэух унашъор зыштэрэр Координационнэ советыр ары. Инвестиционнэ проектхэм япхырыщынкIэ амалэу щыIэхэм атегущыIэхэ зэхъум, Адыгеим и ЛIышъхьэ резидентхэм анаIэ атыраригъэдзагъ мэхьанэшхо зиIэ лъэныкъохэм. Ахэм ащыщых IофшIэпIэ чIыпIэхэр зэхэщэгъэнхэр, инновационнэ технологиехэр гъэфедэгъэнхэр, инвес­тициеу халъхьащтымрэ хэбзэIахьхэмрэ зыфэдизыщтхэр.
КъумпIыл Мурат къызэрэхигъэщыгъэм­кIэ, цыхьэшIэгъу инвесторхэм адэлэжьэным республикэр фэхьазыр. Хэбзэ къулыкъухэм япшъэрылъ шъхьаIэхэм ащыщых республикэм нахь ищыкIэгъэ лъэныкъохэм зарагъэушъомбгъуныр, бизнес-проектхэр пхырыщыгъэнхэр, Iоф­шIэнымкIэ предпринимательхэм амал дэгъухэр ягъэгъотыгъэнхэр.
АР-м и ЛIышъхьэ
ипресс-къулыкъу
къытырэ къэбархэмкIэ
Тхьаркъохъо Сафыет.