«Мы вам завещали жить…» зыцIэ Iэнэ хъураеу мы мафэхэм АР-м и Лъэпкъ тхылъеджапIэ щыкIуагъэм кIэщакIо фэхъугъ Урысые общественнэ-къэралыгъо организациеу «Урысыем илъэпкъхэм я Ассамблее» ишъолъыр къутамэу Адыгэ Республикэм щыIэр.

Iофтхьабзэм хэлэжьагъэх а къутамэм хэтхэр, лъэпкъ зэфэшъхьафхэм язэхахьэу республикэм щызэхэщагъэхэм япащэхэр, общественнэ движениеу «Адыгэ Хасэм», шIэныгъэ сообществэм ялIыкIохэр, АР-м ибзылъфыгъэхэм я Союз итхьаматэ, тхылъеджапIэм иIофышIэхэр, Адыгэ къэралыгъо университетым истудентхэр.
Шъолъыр къутамэм ипащэу ЛIымыщэкъо Рэмэзан Iофтхьабзэр зэрищагъ. 1941 — 1945-рэ илъэсхэм нэмыц техакIохэм апэуцужьыгъэным Адыгеим щыпсэухэрэм яIахьышIоу хашIыхьагъэм ар къытегущыIагъ.
— 2025-рэ илъэсыр ТекIоныгъэм и Илъэсэу ыкIи нацизмэм ебэныгъэнымкIэ мамырныгъэм, зыкIыныгъэм я Илъэсэу агъэнэфагъ. Iэнэ хъураер зыфэгъэхьыгъэр Хэгъэгу зэошхом илъэхъан зыкIыныгъэ ахэлъэу лъэпкъ зэфэ­шъхьафхэр пыим зэрэпэуцужьыгъэхэр, мамырныгъэм зэрэфэбэнагъэхэр ары. Тятэжъхэм лIыхъужъныгъэу ыкIи лIыблэнагъэу зэрахьагъэр мы хъугъэ-шIагъэхэм тыгу къагъэкIыжьы, — къыIуагъ ЛIымыщэкъо Рэмэзан.
Мы IофтхьабзэмкIэ зэхэщакIохэм мурадэу яIагъэр я XX-рэ лIэшIэгъум щыIэгъэ хъугъэ-шIэгъэшхохэм ащыщым патриотическэ мэхьанэу иIэр къиIотыкIыгъэныр, ныбжьыкIэхэм яхэгъэгу шIу алъэгъоу пIугъэнхэмкIэ зэIухыгъэ зэдэгущыIэгъу адэшIыгъэныр ары.
Iофтхьабзэм къырагъэблэгъагъ Советскэ Союзым и ЛIыхъужъэу Андыр­хъое Хъусен ипхъорэлъфым ипхъорэлъфыжьэу Хъуажъ Аминэт.
АР-м и Лъэпкъ тхылъеджапIэ иIофышIэу Александр Данильченкэр Хэ­гъэгу зэошхом ыкIи хэушъхьафыкIыгъэ дзэ операцием ялъэхъан Урысыем щыпсэурэ лъэпкъхэм ядзэ зэныбджэгъуныгъэ ыкIи патриотизмэм алъэныкъокIэ яшэн-хабзэхэм къатегущыIагъ.
Лъэпкъ зэфэшъхьафхэм яорганизациехэу республикэм итхэм япащэхэр зыщыщ лъэпкъхэм ТекIоныгъэм икъыдэхын яIахьышIоу хашIыхьагъэм фэгъэ­хьыгъэу къаIотагъ.
Джащ фэдэу Iэнэ хъураем иIофшIэн хэлэжьагъэхэр тарихъ шIэжьым икъэухъу­мэн ыкIи непэрэ ныбжьыкIэхэм ягражданскэ-патриотическэ пIуныгъэ япхыгъэ гумэкIыгъохэм, непэрэ щыIакIэу тызхэтым къыткIэхъухьэхэрэм лIыхъужъныгъэ ыкIи лIыблэнагъэ ахэлъэу пIугъэнхэм афэгъэхьыгъэу къэгущыIагъэх.
КIАРЭ Фатим.