«Адыгеим и ЛIыхъужъхэр»
Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм и Общественнэ-лъыплъэкIо совет ятIонэрэ зэхэсыгъо тыгъуасэ иIагъ.
ХэушъхьафыкIыгъэ дзэ операцием хэлэжьагъэхэр нэужкIэ къэралыгъо ыкIи муниципальнэ хэбзэ къулыкъухэм, къэралыгъо компаниехэм Iоф ащашIэным фэгъэхьазырыгъэнхэм тегъэпсыхьэгъэ программэм зыщызыушэтыгъэхэм яхэшыпыкIын едзыгъо икIэуххэм ар афэгъэхьыгъагъ.
Зэхэсыгъом хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, Къэралыгъо Советым — Хасэм и Тхьаматэ игуадзэу, Урысыем и ЛIыхъужъэу Цэй Эдуард, программэм ипхырыщын хэлэжьэрэ къулыкъухэм ыкIи гъэсэныгъэм иучреждениехэм ялIыкIохэр.
— УФ-м и Президентэу Владимир Путиным къахилъхьэгъэ федеральнэ программэу «ЛIыхъужъхэм яуахът» зыфиIорэр гъэрекIо щегъэжьагъэу агъэцакIэ. Ащ имэхьанэ зыкъызэриIэтырэм епхыгъэу къэралыгъом ипащэ пшъэрылъ къыгъэуцугъ шъолъырхэри ащ фэдэ проектым игъэцэкIэн фежьэнхэу. Ащ къыдыхэлъытагъэу, АР-м и ЛIышъхьэу КъумпIыл Мурат иунашъокIэ шъолъыр программэу «Адыгеим и ЛIыхъужъхэр» зыфиIорэм ипхырыщын тыублагъ ыкIи ар зэрящыкIагъэр нэбгырабэ зэрэхэлэжьагъэм къыгъэнэфагъ, — хигъэунэфыкIыгъ Владимир Свеженец.
Адыгеим чIыпIэ зыгъэIорышIэжьынымкIэ къулыкъухэм адэлэжьэгъэнымкIэ Комитетым итхьаматэу КIэдыкIое Руслъан программэм игъэцэкIэн зэрэрекIокIыгъэм игъэкIотыгъэу къытегущыIагъ, лъэныкъо зэфэшъхьафхэмкIэ шIэныгъэ куухэр къызэрагъэлъэгъуагъэр къыхигъэщыгъ.
— Къэралыгъо гъэIорышIэным ыкIи общественнэ IофшIэным ылъэныкъокIэ хэхъоныгъэ зышIы зышIоигъо ветеран ыкIи дзэкъулыкъушIэ нэбгыри 149-мэ проектым хэлэжьэнхэмкIэ лъэIу тхылъ къатыгъ. Программэм иапэрэ едзыгъо анкетированиер ыкIи эссе тхыныр, ятIонэрэм — яшэн-гъэпсыкIэ ыкIи гъэIорышIэным ылъэныкъокIэ зытегъэпсыхьагъэхэр аушэтыгъэх. Аужырэ едзыгъоу къыкIэлъыкIуагъэр — очнэ ыкIи пэIудзыгъэ шIыкIэм тетэу зэдэгущыIэгъухэр, ащ дзэкъулыкъушIэ ыкIи ветеран 70-рэ хэлэжьагъ. Анахь шIэныгъэ дэгъу къэзыгъэлъэгъуагъэу къыхахыгъэр нэбгырэ 38-рэ. 18-мэ еджэныр очнэу рагъэжьэщт, 20-р — резервым хэтыщтых. ТекIоныгъэ къыдэзыхыгъэхэр еджэным ыуж къэралыгъо ыкIи муниципальнэ хэбзэ къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф зэращашIэщтым тицыхьэ телъ, — хигъэунэфыкIыгъ КIэдыкIое Руслъан.
Мыекъопэ къэралыгъо технологическэ университетым иректорэу Къуижъ Саидэ лъэгэпIэшIухэм адиштэу лIыхъужъхэр зэрэрагъэджэщтхэм зэрэфэхьазырхэр къыхигъэщыгъ.