Мыекъопэ районымкIэ псэупIэу Каменномостскэм къэзэкъ культурэм ия 34-рэ шъолъыр фестива­лэу щыкIуагъэм икIэуххэр зэфахьысыжьыгъэх.

Хэгъэгу зэошхом ТекIоныгъэр къызыщыдахыгъэм ия 80-рэ ­илъэс ар фэгъэхьыгъагъ.
Хэгъэгум ишъолъыр зэфэшъхьафхэм къарыкIыгъэ творческэ куп 50-м ехъу, лъэпкъ Iэпэщы­-
сэхэр зышIырэ IэпэIэси 100-м нахьыбэ фестивалым хэлэжьагъ. Къэзэкъхэм яфольклор купхэм мыщ зыкъыщагъэлъэгъуагъ, дзэ-­патриот орэдхэм язэнэкъокъу, лъэпкъ IэшIагъэхэм яермэлыкъ, мастер-классхэр щызэхащагъэх. Артистхэм дипломхэр афагъэ­шъошагъ, зэнэкъокъухэм щате­кIуагъэхэу а 1 — 3-рэ чIыпIэхэр къэзыхьыгъэхэм шIухьафтынхэр аратыгъ.
«КIэлэцIыкIу фольклор ансамбль» зыфиIорэ лъэныкъомкIэ апэрэ чIыпIэр аубытыгъ псэупIэу Тимирязевым культурэмкIэ и Унэ лъэпкъ орэдымкIэ иансамблэу «Кубаночка» зыфиIорэм хэтхэм. Лъэныкъоу «Зыныбжь икъугъэхэр зыхэт фольклор ансамблэм» текIоныгъэр къыдэзыхыгъэр Краснодар краимкIэ Апшеронскэ районым инароднэ фольклор-этно­графическэ купэу «Родники». «КIэлэцIыкIу народнэ-сценическэ ансамбль» зыфиIорэмкIэ апэрэ чIы­пIэр къыдихыгъ къалэу Краснодар искусствэхэмкIэ икIэлэ­цIыкIу еджапIэу N 1-м иансамблэу «Родники Кубани». Лъэныкъоу «Зыныбжь икъугъэхэр зыхэт народнэ-сценическэ ансамбль» зы­фиIорэмкIэ атекIуагъэр къалэу Анапэ инароднэ ансамблэу «Зарницэр» ары. «КIэлэцIыкIу хорымкIэ» апэрэ чIыпIэр ыубытыгъ къа­лэу Мыекъуапэ иорэдыIо-къэшъокIо ансамблэу «Казачата» зыцIэм. Лъэныкъоу «Зыныбжь икъугъэхэм яхор» зыфиIорэмкIэ апэрэ чIыпIэр къыдэзыхыгъэр станицэу Елизаветинскэм ина­роднэ самодеятельнэ купэу «Елизаветинцы».
Фестивалым изэхэщэнкIэ ­Адыгэ Республикэм ихэбзэ къулыкъухэм­рэ Пшызэ шъолъыр икъэзэкъы­дзэрэ IэпыIэгъу къафэхъугъэх.