«Марафон зеленых дел» зыфиIорэ экологическэ Iофтхьабзэм хэтэу гъэгъозэн десэхэр технопаркэу «Кванториумым» щызэхищагъэх хэушъхьафыкIыгъэу къагъэгъунэрэ чIыопс паркэу «Псыхъоу Цацэ ипсышъхьэ». Тыкъэзыуцухьэрэ дунаим икъэухъумэнкIэ ыкIи чIыопсым икъэкIуапIэхэмкIэ АР-м и ГъэIорышIапIэрэ чIыопс паркэу «ТхьачIышхомрэ» яIофышIэхэр ащ хэлэжьагъэх.

Я 6 — 11-рэ классхэм якIэлэеджа­кIохэу «Движение первых» зыфиIорэм хэтхэр Iофтхьабзэм чанэу хэлэжьагъэх. Джащ фэдэу Адыгеим и Тхылъ Плъыжь дэт псэушъхьэхэм ыкIи къэкIырэ лъэпкъхэм къекIолIагъэхэр нэIуасэ афашIыгъэх.
Хэхыгъэу къагъэгъунэрэ чIыопс чIыпIэхэм зарыхьэхэкIэ шапхъэу зэрыгъо­зэнхэ, машIо къащымыхъунымкIэ агъэцэкIэн фаехэм ахэр ащагъэгъозагъэх. Ащ фэдэ паркэу республикэм итыр зыфэдизыр ыкIи ахэм ямэхьанэ Iоф­тхьабзэм хэлэжьагъэхэм къафаIотагъ. Экологэу Матвей Жилиным ипроектыкIэу дэеу зылъэгъурэ кIэлэцIыкIухэм атегъэ­псыхьагъэм къызэрэщыдэлъытагъэу, экологическэ гъэгъозэн десэхэр зэрэзэхищэхэрэм щигъэгъозагъэх. КIэлэ­цIыкIу технопаркэу «Кванториумым» хахьэхэрэм якуп игъусэу 3D шапхъэм итэу Адыгеим изекIо чIыпIэхэм ацIэхэмрэ ахэр зыдэщыт чIыпIэхэмрэ арытхагъэу къэгъэлъэ­гъуапIэхэр зэхагъэуцуагъэх. Ащ ишIуагъэкIэ зипсауныгъэкIэ щыкIагъэхэр зиIэ кIэлэцIыкIухэм республикэм ичIыопс чIыпIэхэм нэIуасэ зафашIышъугъ.
— КIэлэцIыкIухэр ыкIи ныбжьыкIэхэр зыхэхьэхэрэ организациеу «Движение первых» зыфиIорэм ичIыпIэ къутамэ итхьаматэу Аванес Шекерьянц Iофтхьабзэм изэхэщэн кIэщакIо зэрэфэхъу­гъэмкIэ тыфэраз, — хигъэунэфыкIыгъ чIыопс паркэу «Псы­хъоу Цацэ ипсышъхь» зыфиIо­рэм ипащэ иIэнатIэ зыгъэцэкIэ­рэ Бзэджэжъыкъо Азэмат.