Я ХХVIII-рэ дунэе эко­номическэ форумэу Санкт-Петербург къыщызэIуахыгъэм Урысые Федерацием и Президентэу Владимир ­Путиныр хэлажьэ. Ха­бзэ зэрэхъугъэу, Адыгеим илIыкIо купэу АР-м и ЛIышъхьэу КъумпIыл Мурат зипащэри ащ ­хэлажьэ.

ЗэдэгущыIэгъухэр яIэнхэу, зэзэгъыныгъэхэр зэдашIынхэу, пленарнэ зэхэсыгъом, нэмыкI Iофтхьабзэхэм ахэлэжьэнхэу рахъухьэ.
Дунэе экономическэ форумым хэлажьэхэрэм шIуфэс арихи, къэралыгъом ипащэ къыхигъэщыгъ джырэ дунаим пэрытныгъэ щаIыгъынымкIэ мэхьанэшхо зиIэ технологиехэм, цифрэ трансформацием, цIыфхэм щыIэкIэ-псэукIэ дэгъу ягъэгъотыгъэным ятемэ чIыпIэшхо мыщ зэрэщиубытыщтыр. Джащ фэдэу демографием, IофшIэным, наукэм, гъэсэныгъэм, псауныгъэм икъэухъумэн ыкIи социальнэ ухъумэным япхыгъэ Iофыгъо­хэм еплъыкIэу фыряIэхэмкIэ мыщ щызэхъожьыщтых.
«Урысыем сувереннэ хэ­хъоныгъэм дырегъаштэ, хэгъэгухэмрэ цIыф лъэпкъхэмрэ якультурэ, яшэн-хабзэхэм лъытэныгъэ афешIы. БРИКС-м изэкъогъэуцонкIэ гухэлъэу тиIэр дунэе зэдэпсэуныгъэу лъэпкъ зэхэдзрэ джэгъогъуныгъэрэ зыщырямыIэщтым игъэ­псынкIэ Iофэу тшIэрэр лъыд­гъэкIотэнэу ары», — къыIуагъ Владимир Путиным.
ШIуагъэ къытэу зэдэгущыIэгъухэр зэрэкIощтхэм, уахътэм цIыфлъэпкъым ыпашъхьэ къыригъэуцорэ Iофыгъохэр зэрэзэшIуахыщтхэ шIыкIэм икъэгъотын ахэр зэрэфэIорышIэщтхэм ицыхьэ зэрэтелъыр УФ-м и Президент къыхигъэщыгъ.

Адыгеим илIыкIо куп форумым щызэхащэщт Iофтхьэбзэ зэфэшъхьафхэм ахэлэжьэн, зэзэгъыныгъэ заулэмэ адыкIэтхэн имурад. Шъолъыр зэдэлэжьэныгъэм изегъэушъомбгъун лъэшэу анаIэ тырагъэтыщт.
Республикэм инвестициехэр нахьыбэу къыхалъхьанхэмкIэ, АР-м зыпкъ итэу хэхъоныгъэ егъэшIыгъэнымкIэ форумым иIофшIэн мэхьанэшхо зэриIэр Адыгеим и ЛIышъхьэ къыхи­гъэщыгъ.
«Дунэе экономическэ фору­мэу Петербург щыкIорэм амалэу къытитыхэрэр икъоу къыз­фэдгъэфедэнхэм, мыщ тызы­щыкIэтхэрэ зэзэгъыныгъэхэм арытхэр дгъэцэкIэнхэм тишъып­къэу тыпылъ. Зэзэгъыныгъэхэм ащыщыбэр гъэхъагъэ хэлъэу дгъэцэкIэгъах, пэрыт IофшIакIэр къызфэтэгъэфедэ. Лъэныкъо зэфэшъхьафхэмкIэ зэдэлэжьэныгъэ адытиIэным фэгъэхьыгъэ зэзэгъыныгъэу адэтшIыгъэхэм адиштэу Iоф тэшIэ. ИщыкIэгъэ амалхэр бизнесым фызэхэтэщэх, административнэ пэрыо­хъухэм къакIетэгъэчы, инвес­тиционнэ площадкэ хьазырхэр ятэты, инфраструктурэм зетэгъэушъомбгъу. Адыгеим иэконо­микэ нахь зыкъызэриIэтырэр, хэгъэгум ибизнес хэхъоныгъэ ышIы зэрэшIоигъор непэ тинэ­рылъэгъу. Кавказ инвестицион­нэ форумэу бэмышIэу щыIагъэм ар къыгъэлъэгъуагъ. Сомэ миллиард 20 зытефэрэ зэзэ­гъы­ныгъэхэр мыщ щадэтшIыгъэх. ПстэумкIи сомэ миллиард 93,8-м ехъу зыосэ проектхэм рес­публикэм непэ Iоф щадашIэ. Инвестициехэр къазэрахалъхьагъэхэмкIэ Лъэпкъ рейтингым ди­­штэу Адыгеир шъолъыр анахь дэгъу 15-мэ ясатыр гъэрекIо хэу­цуагъ. Дунэе экономическэ форумэу Петербург щыкIорэм республикэм федэ къызэрэфихьыщтым сицыхьэ телъ. Рес­публикэм хэхъоныгъэ зэришIыщт федеральнэ стратегием тыдэмыхынымкIэ экспертхэм ярекомендациехэм яшIуагъэ къэкIощт», — къыIуагъ АР-м и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.