Адыгеир къагъэлъэгъощт

«Президентскэ спорт джэгунхэр» зыфиIорэ Iофтхьабзэм и Урысые едзыгъо Адыгеир къыщызгъэлъэгъощтхэр Джэджэ районым икIэлэеджакIохэр ары.
Мыщ пшъэрылъ шъхьаIэу иIэр физическэ культурэм пыщагъэхэм япчагъэ нахьыбэ шIыгъэныр, кIэлэцIыкIу-ныбжьыкIэ спортым зиушъомбгъуныр ары.
Iофтхьабзэм ишъолъыр уцугъо мы мафэхэм Мыекъуапэ щыкIуагъ. Республикэм имуниципалитет зэфэшъхьафхэм якоманди 5-мэ заушэтыгъ. Ахэр лъэныкъо зэфэшъхьафхэмкIэ зэнэкъокъугъэх: атлетикэ псынкIэмкIэ, теннис цIыкIумкIэ, баскетболымкIэ, футболымкIэ ыкIи волейболымкIэ. Апэрэ чIыпIэр Джэджэ районым икомандэ фагъэшъошагъ. Ащ хэтхэм атлетикэ псынкIэмкIэ, баскетболымкIэ ыкIи футболымкIэ текIоныгъэр къыдахыгъ. Адрэ спорт лъэныкъохэмкIи хагъэунэфыкIырэ чIыпIэхэр къахьыгъэх.
Финал едзыгъор Iоныгъом хы ШIуцIэ Iушъом щызэхащэщт.
