Top.Mail.Ru

МашIом щиухъумагъэх

Image description
Iэшъынэ А.

Адыгеим ис сабыибэ зэрыс унагъохэм IэпыIэгъу ягъэгъотыгъэным къыдыхэлъытагъэу, унэ кIоцIым машIом зыкъызыщиштэкIэ макъэ къэзыгъэIурэ пкъыгъохэр афырагъэуцуагъэх.

Ахэм ащыщэу кIэлэцIыкIуи 4 зыпIурэ ХьацIэцIэ Мурат дэжь «Адыгэ макъэр» еблэгъагъ.
Къэралыгъо программэу «ЦIыфхэм социальнэ IэпыIэгъу ягъэгъотыгъэныр» зыфиIорэм щыIэныгъэм чIыпIэ къин ригъэу­цогъэ сабыибэ зэрыс унагъохэм а фэIо-фашIэр афагъэцэкIэным фэшI 2025-рэ илъэсымкIэ сомэ миллиони 5,8-рэ къыдыхалъы­тагъ. АР-м финансхэмкIэ и Министерствэ къызэритыгъэмкIэ, мэкъуогъум и 1-м ехъулIэу ащ сомэ миллион 1,3-рэ пэIуагъэхьагъ.
Унэ кIоцIым машIом зыкъызыщиштэкIэ макъэ къэзыгъэIурэ пкъыгъохэм ягъэуцун епхыгъэ IофшIэныр зэшIозыхырэр цIыф­хэм ясоциальнэ фэIо-фашIэхэр зыгъэцэкIэрэ Зэхэубытэгъэ гупчэхэр (КЦСОН) ары. Арышъ, мыщ фэдэ пкъыгъо зиунэ изыгъэуцо зышIоигъо сабыибэ зэ­рыс унагъохэм зыщыпсэухэрэ чIыпIэм щыIэ гупчэм зыфагъэзэн алъэкIыщт.
МашIом зыкъызиштэкIэ макъэ къэзыгъэIурэ пкъыгъор унэ кIо­цIым итыным мэхьанэшхо иI. Iугъуамэ къызэрэугъэм тетэу мэкъэ инкIэ ар къызэхэнэ ыкIи анахь пытэу чъыерэ цIыфыр къыгъэущын елъэкIы. Непэрэ мафэмкIэ цIыфхэр машIом хэмыкIодэнхэмкIэ мы пкъыгъом нахь зишIуагъэ къакIо щыIэп. Къыхэщыгъэн фае унагъом са­быибэ ис зыхъукIэ къыщы­хъун ылъэкIыщт тхьамыкIагъор къызэрэшIэгъуаер. Тызэблэгъэгъэ ХьацIацIэхэм яунагъо ышъхьэу Мурат изакъоу кIэлэцIыкIуи 4 епIу. Мы пкъыгъор къызэрэ­шъхьэпагъэр ащ къыхегъэщы.
МашIом зыкъызиштэкIэ макъэ къэзыгъэIурэ пкъыгъуитф тиунэ къытфырагъэуцуагъ. Апэ ащ мэхьанэшхо еттыгъэп. Ау нычэпэ кIуагъэм электрическэ счетчикым машIо къыкIани, а пкъыгъор къызэрэзэхэнагъэм ишIуагъэкIэ игъом сыкъэущыгъ ыкIи ар згъэкIосагъэ. Нэужым электрикхэм сыкъяджи, мы пкъыгъор зэблахъугъ. Арышъ, машIом зыкъызиштэкIэ макъэ къэзыгъэIурэ пкъыгъор хабзэм къызэрэтфыригъэуцуагъэм тырыраз, ишIуагъэ зэхэтшIагъ, кIэлэцIыкIухэр машIом щиухъумагъэх, хигъэунэфыкIыгъ ХьацIэцIэ Мурат.
Iэшъынэ Сусан.