«Илъэсым иврач анахь дэгъу» зыфиIорэ республикэ зэнэкъокъум текIоныгъэ къыщыдэзыхыгъэ врач-анестезиолог-реаниматологэу Ольга Соленых «Адыгэ макъэм» зэдэгущыIэгъу дишIыгъ.

Ольгэ Мыекъопэ къэлэ сымэ­джэщым реанимациемкIэ ыкIи къэхъугъакIэхэм гъэлъэшыгъэу яIэзэнымкIэ иотделение ипащ. Неонатологием ылъэныкъокIэ Iоф зишIэрэр илъэс 15.
— Ольга Владимир ыпхъур, медицинэ сэнэхьатым сыдэущтэу зыфэбгъэзэнэу хъугъа? Шъуи­унагъокIэ врачхэр шъуиIэха?
— ЩысэтехыпIэ сиIагъэу щытэп, сэ сыдигъокIи врач сэнэхьатым сыфеджэнэу сыфэягъ. ТиунагъокIэ сэры апэрэу врач хъугъэр. Краснодар медицинэ академиер къызысэухым Шытхьэлэ район гупчэ сымэджэщым иполиклиникэ педиатрэу илъэситфырэ Iоф щысшIагъ. Ау сэ сызы­фэе IофшIэнэу ар зэрэщымытыр къызгурыIуагъ. ЗипIалъэкIэ нахь пасэу къэ­хъугъэ сабыйхэу макIэу къэзыщэчыхэрэм сяIэзэныр нахь сшIоигъуагъ. Ащ пае икIэрыкIэу ординатурэм сыщеджэжьыгъ. Нэужми тIэкIу сызэрэфаеу къычIэкIыгъэп, сыгукIэ икъоу ар слъытагъэп. ЕтIани врач-реаниматологэу седжэжьи IофшIэным зыпысэдзэжьым, ар лъэшэу сыгу зэрэрихьырэр, сичIыпIэ сызэритыр сшъхьэкIэ хэзгъэунэфыкIыгъ. Медицинэм илъэс 19-м ехъоу сызыхэтым щыщэу илъэс 15-р ащ фэдэ сабыйхэр зыпкъ игъэуцожьыгъэнхэм фэзгъэхьыгъ, джыри тапэкIэ сикъарыу къехьыфэ ащ сыпылъыщт.
— Шъыпкъэ, угу рихьырэ сэнэхьатым Iоф рыпшIэныр дэгъу. Ау ащ фэдэ сабый хьылъэ­хэм уяIэзэныр IэшIэхэп ыкIи бэп ащ еуцуалIэрэр. Сыд фэдэ екIолIакIа мыщ ищыкIагъэр?
— Реанимацием къифэрэ сабыйхэр ипIалъэм къэмыхъугъэхэу, къащэчырэр мэкIэ къодыеу щытхэп. Мыхэм уз гъэ­нэфагъэхэр яIэх. Ащ фэдэ сабыйхэм узэрадэзекIощтым, зыпкъ зэрибгъэуцощтхэм уфеджэгъэ къодыекIэ икъурэп, IэпэIэсэныгъэ ищыкIагъ. Мыхэм зэхэубытэгъэ екIолIакIэ афыуиIэн фае. Сэ сшъхьэкIэ илъэситфырэ реанимацием Iоф зыщысэшIэр ары сицыхьэ зытелъы­жьэу сызэрадэзекIощтыр сIэ къызихьагъэр. Ащ дакIоу зэпымыоу сишIэныгъэ­хэм ахэсэгъахъо, конференциехэм са­хэлажьэ. УкъызэрэсэупчIыгъэр тэрэз – бэп мыщ Iоф щызышIэнэу къакIорэр. Зэрэкъиным фэшI фаехэп, ныбжь зиIэ­хэм яIэзэнхэр нахь къыхахы, сыда пIомэ мыхэм яузхэр нахь гъэтIылъыгъэх. Са­быйхэм къарыкIощтыр, япсауныгъэ зызэрихъокIыщтыр къэшIэгъуае мэхъу. Тиотделение пстэумкIи врачищ ныIэп Iутыр, зыр зыгъэпсэфыгъом зыкIокIэ, чэщ-зымафэ тешIэ къэс Iоф тшIэн фае мэхъу.

— Республикэм инеонатологие къулыкъу игугъу къэтшIымэ, сыд фэдэ уаса фэпшIырэр? Сыдэущтэу зэтегъэпсыхьагъа?
— IэзэпIэ амалэу щыIэхэм ахэ­хъуагъ, зипIалъэ къэмысэу къэхъугъэкIэ сабыйхэу макIэу къэзыщэчыхэрэм узэряIэзэщт технологие пэрытхэм зэрэ Урысыеу зыщаушъомбгъугъ. Гъэнэфэгъэ шапхъэу сабыим ионтэгъугъэ грамм 500-м нахь мымакIэр реанимацием къаштэ ыкIи зыпкъ рагъэуцожьы. Тиотде­ление ищыкIэгъэ оборудованиекIэ зэтегъэпсыхьагъ, лъэхъаным диштэрэ «кувейз» зыфаIохэрэр тиIэх. Ахэм яшIуагъэкIэ сабыир ным ыныбэ илъым фэдэу тIыгъын тэлъэкIы. ИВЛ-аппаратэу тиIэхэр шъабэх, ахэм сабыим ипсауныгъэ изытет — ыгу къызэрэтеорэр, жьы къызэрищэрэр, нэмыкIхэри къагъэлъагъо. Узэу яIэхэм ялъытыгъэу къэлэшхохэм ащыIэ гупчэхэм яврачхэри упчIэжьэгъу тэшIых.
— Ольга, илъэсым сабый тхьапша мыщ къычIафэрэр?
— ГущыIэм пае, икIыгъэ илъэсым сабыи 137-рэ тиIагъ, ащ щыщэу мэкIэ дэдэ къэзыщэчыхэрэр 14 хъущтыгъ, нэбгыри 6-мэ ядунай ахъожьыгъ. Мы илъэсыр къызихьагъэм къыщегъэжьа­гъэу нэбгырэ 50-м ехъу зыпкъ идгъэуцо­жьыгъ, мы уахътэм сабыи 4 тиотделение чIэлъ.
— Илъэс пчъагъэу Iоф зыщыпшIэрэм къыкIоцI къыщэчырэмкIэ анахь макIэу пIыгъыгъэр къэошIэжьа?
— ЫпшъэкIэ къызэрэсIуагъэу, Урысыем щыгъэнэфэгъэ шапхъэр, грамм 500 нахь мымакIэу къэзыщэчыхэрэр ары зыпкъ идгъэуцожьыхэрэр. Ау грамм 480-рэ зионтэгъугъэхэри тштэхэу къы­хэкIы, грамм 470-рэ сIыгъыгъэуи къэсэшIэжьы.
— Ныхэр реанимацием къы­чIэхьанхэ фитыха? Сыдэущтэу сабыйхэр жъугъашхэхэра?
— Сымэджэщым джыри чIамытхыкIыжьыгъэ ныхэр мафэм тIо ясабый дэжь къэкIонхэ фитых. Быдзыщэ зиIэм къехьышъ, зондым идхъахъозэ етэгъа­шъох. Ар зимыIэм хэушъхьафыкIыгъэ зэхэгъэкIухьагъэ раты хабзэ. Сымэджэщым чIатхыкIыжьыгъэ ныхэр мафэм сыхьатыр 3-м къэкIонхэ алъэкIы. ЗэрэзекIощтхэр зэкIэ къафэтэIуатэ, агурытэгъаIо. Ащ Iофыгъо къыпыкIырэп.
— Ольга, тизэдэгущыIэгъу икIэухым тын лъапIэу къыпфагъэшъошагъэм игугъу къэтшIынэу сыфай. Мы илъэсым иврач анахь дэгъоу укъыхагъэщыгъ. ОркIэ а щытхъуцIэм сыд мэхьана иIэр?
— Сымэджэщым ипащэхэм зэнэкъо­къум сыхэлэжьэн фаеу къызысаIом, сеуцолIагъ. ТекIоныгъэ къыдэсхыным сицыхьэшхо телъыгъэп, ау макIэу сыщыгугъыгъ, мыхъурэ щыIэп. Сэ зэрэслъы­тэрэмкIэ, мы щытхъуцIэр зисэнэхьаткIэ зифэшъошэ врачыбэ джыри тиI. Ау тын лъапIэу къысфагъэшъошагъэм лъэшэу сыщыгушIукIыгъ, ар шъуашэу сэлъытэ. Дэгъоу уалъытэныр пшъэдэкIыжьэу щыт, щытхъуцIэр къызэрэзгъэшъыпкъэжьыщтым джы сыпылъыщт.
Iэшъынэ Сусан.