Top.Mail.Ru

Аужырэ ушэтынхэр атыгъэх

Image description
Къэралыгъо аттестационнэ къулыкъур

ЗыкI къэралыгъо ушэтынхэр ыкIэм фэкIох. Мэкъуогъум и 10-м ыкIи и 11-м информатикэмрэ IэкIыб къэралыгъуабзэмрэ (жэрыIокIэ) атых. Ушэтынхэр мэфитIо кIощтых.

ЗэкIэмкIи информатикэмкIэ нэбгырэ 295-мэ заушэтыщт, гъэрекIо елъытыгъэ­мэ, фэди 1,3-кIэ ар нахьыб, IэкIыб къэ­ралыгъуабзэр нэбгыри 125-мэ атыщт.
Къэралыгъо аттестационнэ къулыкъум къызэрэщытаIуагъэмкIэ, компьютерхэр аIыгъэу ушэтынхэр кIуагъэх. ИгъэкIотыгъэ зэхъокIыныгъэ зи фэхъугъэп.
ИнформатикэмкIэ ушэтыныр сыхьати 3-рэ такъикъ 55-рэ кIуагъэ. Апшъэрэ еджапIэм чIэхьанхэм пае анахь макIэу балл 44-рэ къырахын фаер. Инджылызыбзэр (жэрыIокIэ) такъикъ 17-рэ кIуагъэ. Анахь балл макIэу агъэнэфагъэр 30. Мы ушэтынхэм язэфэхьысыжьхэр мэкъуогъум и 23-м къэнэфэщтых.
Ушъхьагъу зэфэшъхьафхэр яIэу ушэтынхэм ямыкIолIэшъугъэхэм ахэр аты­жьынхэ амал яIэщт: информатикэр — мэкъуогъум и 19-м ыкIи и 23-м, инджылызыбзэр жэрыIоу — мэкъуогъум и 18-м, тхэнымкIэ — и 19-м ыкIи и 23-м.
Джащ фэдэу къахьыгъэ баллыр зышIомакIэхэм икIэрыкIэу заушэтыжьын алъэ­кIыщт, ау ыпэкIэ къахьыгъэгъэ баллыр кIодыщт.
ЗыкI къэралыгъо ушэтынхэм язэфэхьысыжьхэр къэнэфагъэх. Апэрэ ушэтынхэм балли 100 изыгъэкъугъэр нэбгырищ. ХьисапымкIэ профильнэу нэбгырэ 645-мэ заушэтыгъ, ахэм ащыщэу нэбгыри 10-мэ балл 90-м нахьыбэ къахьыгъ. Базовэр нэбгырэ 1050-мэ атыгъ, ахэм ащыщэу нэбгырэ 60-мэ ар афэукIочIыгъэп. Урызыбзэр зэрифэшъуашэу затыкIэ, хьисапыр мэкъуогъум и 20-м атыжьын амал яIэщт.

ДЕЛЭКЪО Анет.