Зэнэкъокъоу «Сян, сят, сэры — спорт унагъу» зыфиIорэр республикэм икъэлэ шъхьаIэ щыкIуагъ. Iофтхьабзэм хэлэ­жьагъэх Мые­къо­пэ гарнизоным идзэ­къулыкъушIэхэр, ахэм яунагъохэр. ЗэкIэмкIи командэ 14.

Зы командэм хэтыгъэх ныхэр ыкIи тыхэр, зэшыхэр ыкIи зэшыпхъухэр, ныжъхэр, къорэлъфхэр ыкIи пхъорэлъфхэр. Зэнэкъокъум хэлэжьагъэхэр яшъыпкъэу текIоныгъэм фэбэнагъэх, зыкIыныгъэ ыкIи зэгурыIоныгъэ къызхагъэфагъ. Спорт эстафети 7-мэ язэфэхьысыжьхэмкIэ анахь дэгъухэр къэнэфагъэх.

— Мыщ фэдэ Iофтхьабзэхэр зыкIызэхатщэхэрэр дзэкъулыкъушIэхэм яунагъохэр зэнэкъокъунхэм, нэIуасэ зэфэхъунхэм, зэдэгущыIэнхэм афэшI. Джащ фэдэу ны-тыхэм ясабыйхэм анаIэ атырагъэтыныр мэхьанэшхо зиIэ лъэныкъохэм ащыщ, — къыIуагъ Мыекъопэ гарнизоным илIыкIоу Анатолий Глазовым.
ТекIоныгъэр къыдихыгъ Селезневхэм яунагъо, Безуховхэр ятIонэрэх, ящэнэрэ чIыпIэр Мкртумянхэм афагъэшъошагъ.