ФутболымкIэ Адыгеим ипервенствэ иапэрэ къекIокIыгъо ыкIэм фэкIуагъ. Мыщ ныбжьыкIэ командэхэр ары хэлажьэхэрэр. Ау къэIо-гъэн фае ешIэгъухэм ащыщэу 5-р зэрэзэкIахьагъэхэр. Ахэм ащыщэу щым Мыекъопэ районым икомандэ ахэлэжьэнэу щыт.

БлэкIыгъэ зыгъэпсэфыгъо мафэхэм зэIукIэгъуитIу щыIагъ. Къуаджэу Пэнэжьыкъуае щызэIукIагъэх «Чэчэнаимрэ» «Кощхьаблэмрэ». Командэхэм очко бгъурыбгъу яIагъ. Мы ешIэгъур кощхьаблэхэм ахьыгъ, пчъагъэр – 3:1. ХьакIэхэм яфутболистэу Артем Шоринымрэ (тIогъогогъо), Пыщтыкъ Сэлимрэ къэ­лапчъэм Iэгуаор дадзагъ. Бысымхэм къа­хэщыгъэр ГъукIэлI Алый.
Тэхъутэмыкъое районым илIыкIохэм ешIэкIэ дахэ къагъэлъэгъуагъ, Джэджэ районым икомандэ текIуагъэх. Тэхъутэмыкъуаехэм къэлапчъэм Iэгоуи 10 дадзагъ, къафыдадзагъэр — 3. Iэгоо плIырыплI къэлапчъэм дадзагъ Ягъумэ Асфаррэ Дмитрий Копаневымрэ. Д. Копаневыр ешIэгъуи 5-мэ ахэлэжьагъ, къэлапчъэм Iэгоо 16 дидзагъ. Джащ фэдэу Алан Шахановымрэ Алексей Курдюковымрэ Iэгоо зырыз къэлапчъэм дадзагъ. Джэджэ районым икомандэ щешIэхэрэ Самад Ясиным, Геннадий Петикарь ыкIи Лев Уваровскэм Iэгоо зырыз къэлапчъэм дагъэфагъ.
Тэхъутэмыкъое районым икомандэ зэнэкъо­къум апэрэ чIыпIэр щиIыгъ. Ащ зэIукIэгъуи 5 иIагъ, зэкIэми текIоныгъэр къащыдихыгъ. Апэрэ къекIокIыгъом къыдыхэлъытагъэу зэкIахьэгъэ зы ешIэгъу ащ джыри иIэщт, командэу «Урожаим» IукIэщт. ЯтIонэрэ чIыпIэм «Кощхьаблэр» щыт, «Чэчэнаир» ящэнэр. Ау я 4-рэ чIыпIэр зыIыгъ «Мыекъуапэм» зэIукIэгъоу иIагъэр тIукIэ нахь макI. Мэкъуогъум и 12-м «Кощхьаблэм», мэкъуогъум и 14-м «Чэчэнаим» ар адешIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Тэхъутэмыкъуай» — 15 (5).
2. «Кощхьабл» — 12. (5).
3. «Чэчэнай» — 9 (5).
4. «Мыекъуапэ» — 6 (3).
5. «ДЮСШ» (Джэджэ район) – 2 (6).
6. «Урожай» — 1 (3).
7. «Адыгэкъал» — 1 (5).