Медицинэ IофышIэм и Мафэ къызыщыблагъэрэм ехъулIэу мэфэкI зэIукIэ республикэ филармонием щыкIуагъ. Адыгеим и ЛIышъхьэу КъумпIыл Мурат ыцIэкIэ псауныгъэм икъэухъумэн фэгъэзэгъэ IофышIэхэм ясэнэхьат епхыгъэ мэфэкIымкIэ къафэгушIуагъ АР-м иминистрэхэм я Кабинет и Тхьаматэ игуадзэу Виктор Орловыр.

Джащ фэдэу Iофтхьабзэм хэлэжьа­гъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м псауныгъэр къэухъумэгъэнымкIэ иминистрэу Мэрэтыкъо Рустем, АР-м иминистрэхэм я Кабинет хэтхэр, республикэ парламентым идепутатхэр, псауныгъэм икъэухъумэнкIэ учреждениехэм япащэхэр, яIофышIэхэр, апшъэрэ, гурыт гъэсэныгъэ языгъэгъотырэ еджапIэхэм ялIыкIохэр, ястудентхэр, гуфэкIо медикхэр, общественнэ IофышIэхэр.
Виктор Орловым ипсалъэ къызэрэщыхигъэщыгъэмкIэ, медицинэ IофышIэм и Мафэ мэхьанэшхо зиIэ сэнэхьатым зищыIэныгъэ фэзыгъэIорышIэрэ пстэуми лъытэныгъэшхо зэрафашIырэм ишыхьат.
«Врачхэр, медсестрахэр, санитархэр, фельдшерхэр, терапевтхэр, лаборантхэр, провизорхэр, IэпыIэгъу псынкIэ языгъэ­гъотыхэу ыкIи нэмыкI специалистхэу мафэ къэс цIыфхэм ящыIэныгъэ къэзы­гъэнэжьыхэрэр, нахьышIум игугъапIэ къязытыхэрэр непэ тэгъашIох. Медици­нэр IофшIэн къодыеп, гукIэгъурэ лIыгъэ­рэ ащ ищыкIагъ. Чэщи, мафи сыд фэдэрэ уахъти, мэфэкI мафэхэми, IофшIэгъу мафэхэми цIыфхэм япсауныгъэ къэшъо­ухъумэ. IэпэIэсэныгъэшхо зэрэшъухэлъым ыкIи шъугу етыгъэу шъуиIоф зэрэжъугъэцакIэрэм апае сымэджэ нэбгырэ мин пчъагъэ алъэ теуцожьы. Мэхьанэшхо зиIэ IофшIэн мыпсынкIэр дэгъоу зэрэжъугъэцакIэрэм фэшI сыгу къыздеIэу тхьашъуегъэпсэу шъосэIо», — къыIуагъ АР-м иминистрэхэм я Кабинет и Тхаматэ игуадзэ.
Псауныгъэм икъэухъумэнкIэ хэбзэшIухэр лъызыгъэкIотэгъэ, IофшIэкIэшIоу аIэкIэлъхэр специалист ныбжьыкIэхэм аIэкIэзыгъэхьэгъэ ветеранхэм лъэшэу зэрафэразэр ащ къыIуагъ.
Виктор Орловым зэрэхигъэунэфыкIыгъэмкIэ, тиврачхэу шефствэ зыдытиIэ чIыпIэхэм ащыпсэухэрэм непэ IэпыIэгъу афэхъухэрэм гуфэкIо движением хэлэ­жьэнхэмкIэ, гукIэгъу ахэлъынымкIэ, яIоф фэшъыпкъэнхэмкIэ хэбзэшIухэр лъагъэ­кIуатэх: Адыгеим икIырэ медицинэ IофышIэхэм чэзыу-чэзыоу Херсон хэкум Iоф щашIэ. Ахэм яшIуагъэкIэ чIыпIэ­рысхэм ящыкIэгъэ Iэзэгъур агъоты.
Джащ фэдэу мыгъэ медицинэ IэпыIэгъу ткъош Абхъазым щязыгъэгъотыгъэ медицинэ IофышIэхэми тхьашъуегъэпсэу вице-премьерым ариIуагъ. Ахэм яконсультациехэмрэ шIушIэн Iофтхьабзэхэмрэ цIыфхэм япсауныгъэ имызакъоу, лъэпкъ­хэм азыфагу илъ къош зэпхыныгъэхэр нахь зэрагъэпытэрэри ащ хигъэунэфыкIыгъ.

«Волонтер-медикхэм, колл-гупчэм идиспетчерхэм, врач, медсестра сэнэхьатхэм афэзгъэхьазырхэрэ кIэ­лэегъаджэхэм непэ ящытхъу тэIо. Медицинэм щылажьэрэ пэпчъ псауныгъэм икъэухъумэн иIахьышхо хешIыхьэ. Медицинэ зэтегъэпсы­хьагъэ щыIэмэ, социальнэ зыпкъ­итыныгъи щыIэщт, хэгъэгум ис нэбгырэ пэпчъ щыIэкIэшIуи иIэщт. Зэрэхэгъэгоу зэрэщыщытым фэдэу, медицинэ IэпыIэгъу дэгъу Адыгеим щарагъэгъотыным мэхьанэшхо иI. Къэралыгъом лъэшэу ынаIэ зытыригъэтырэ пшъэрылъхэм ар зэу ащыщ», — къыIуагъ Виктор Орловым.
Хэгъэгум и Правительствэ иIэпыIэгъу ишIуагъэкIэ псауныгъэм икъэухъумэн зэхъокIыныгъэшхохэр фэхъух: медицинэ учреждениехэр джырэ уахътэм диштэу зэтырагъэпсыхьэх, оборудованиякIэхэр къащэфых, цифрэ технологиехэр къызфагъэфедэх, Адыгеим имедицинэ учреждениехэм диагностикэмкIэ ыкIи Iэзэ­нымкIэ анахь шIыкIэ пэрытхэр, джырэ къэбар технологиехэр къащызфагъэфедэнхэмкIэ ищыкIэгъэ амалхэр зэрахьэх.

Мэхьанэшхо зэратырэ лъэныкъохэм ащыщ кIэлэцIыкIу медицинэр нахьышIоу зэтегъэпсыхьэгъэныр, зыныбжь хэкIотагъэхэм афэгумэкIыгъэныр, хэушъхьафыкIыгъэ дзэ операцием хэлажьэхэрэм ыкIи ащ иветеранхэм медицинэ IэпыIэгъу ягъэгъотыгъэныр, япсауныгъэ зыпкъ игъэуцожьыгъэныр.
«Ежь медицинэ IофышIэхэр емыгугъухэмэ, тисымэджэщхэм, поликлиникэхэм, фельдшер-мамыку IэзапIэхэм ящыкIагъэм фэдиз специалистхэр ямыIэхэмэ а пстэуми шIогъэшхо къатыщтэп. Джащ пае IэпэIэсэныгъэшхо зыхэлъ IофышIэхэм ягъэхьазырын чанэу тыдэлажьэ, республикэм ахэр нахьыбэу ще­гъэджэгъэнхэм тынаIэ тетэгъэты, хэгъэгум иапшъэрэ еджапIэхэм зэдэлэжьэныгъэу адытиIэм зетэ­гъэушъомбгъу, медицинэ Iофы­шIэхэм IэпыIэгъоу арагъэгъотырэм, ахэр яIофшIэн кIэгъэгушIу­гъэнхэм гъунэ лъытэфы, социальнэ гарантиехэр афызэхэтэщэх. Мыщ фэдэ пшъэрылъхэм ягъэцэкIэн илъэс къэс мылъкушхо республикэм щыпэIуагъахьэ — гъэрекIо сомэ миллиард 11,6-м ехъу къызфагъэфедагъ. Мыгъэ сомэ миллиард 12-м ехъу пэIудгъэхьащт. Медицинэ Iоф­хэр нахьышIоу Адыгеим щызэхэщэгъэнхэмкIэ, джырэ шапхъэхэм ар адиштэнымкIэ ткIуачIэ къыхьырэр тапэкIи тшIэщт», — къыIуагъ АР-м иминистрэхэм я Кабинет и Тхьаматэ игуадзэ.
Нэужым республикэм имедицинэ учреждениехэм яIофышIэ пэрытхэм къафагъэшъошэгъэ тынхэр къаратыжьыгъэх. Псауныгъэм икъэухъумэнкIэ гъэ­хъагъэхэр зэряIэхэм фэшI щытхъуцIэу «Адыгэ Рес­публикэм изаслуженнэ врач» зыфиIорэр афагъэшъошагъ Адыгэ рес­публикэ кIэлэцIыкIу клиникэ сымэджэщым иврач-ане­стезиолог-реаниматологэу Григорий Макаровым; Адыгэ республикэ клиникэ онкодиспансерэу М. Хь. Iэшъхьэ­мафэм ыцIэ зыхьырэм иврач-анестезиолог-реани­матологэу Наталья Поповам; Адыгэ рес­публикэ клиникэ сымэджэщым иврач- офтальмологэу Хъодэ Джэнэт; медицинэ гупчэу «Мой докторым» Iэзэн IофымкIэ иврач шъхьаIэ игуадзэу Цэй Зарэ.
ЩытхъуцIэу «Адыгэ Республикэм псауныгъэр къэухъумэгъэнымкIэ изаслуженнэ IофышI» зыфиIорэр къыфагъэ­шъошагъ Адыгэ республикэ наркологическэ диспансерым имедсестрау Надеж­да Титовам.
Республикэ зэнэкъокъоу «Илъэсым иврач анахь дэгъу» зыфиIорэм илауреатхэм дипломхэр мыщ къащаратыжьыгъэх. Ахэр — медицинэ IэпыIэгъу псын­кIэмкIэ ыкIи тхьамыкIагъо хафэхэрэм IэпыIэгъу ягъэгъотыгъэнымкIэ Адыгэ республикэ гупчэм и Шэуджэн подстанцие ибригадэ иврачэу Бар Асиет; Адыгэ республикэ клиникэ психоневрологическэ диспансерым ипсихотерапевтическэ отделение ипащэу, иврач-психотерапевтэу Екатерина Гурскаяр; Адыгэ республикэ клиникэ сымэджэщым иуро­логическэ отделение ипащэу, врач- урологэу Даур Мурат; Адыгэ республикэ клиникэ сымэджэщым функциональнэ диагностикэмкIэ иотделение ипащэу, иврачэу ЛэупэкIэ ФатIимэт; Мыекъопэ къэлэ клиникэ сымэджэщым реанимациемкIэ ыкIи къэхъугъакIэхэр интенсивнэ терапие шIыгъэнхэмкIэ иотделение ипащэу, врач-анестезиолог-реаниматологэу Ольга Соленых; Джэджэ район гупчэ сымэджэщым иучастковэ врач-педиатрэу Разиет Соломатинар.
Мыгъэ апэрэу зэнэкъокъур зэхэзыщэгъэ комиссием зэнэкъокъоу «Адыгеим илъэсымкIэ иврач анахь дэгъу» зыфиIорэмкIэ нэбгыритIумэ текIоныгъэр къыдахыгъэу ыгъэнэфагъ. Даур Муратрэ Ольга Соленыхрэ ары ащ щатекIуагъэ­хэр. Ахэм Сэтэнае икъэгъагъэ итеплъэ зиIэ статуэткэу Еутых Асе ышIыгъэр, дипломхэр, сомэ мин 250-рэ хъурэ сертификатхэр аратыжьыгъэх. Лауреатхэм нэпэеплъ тамыгъэхэмрэ сомэ мини 100 хъурэ сертификатхэмрэ къараты­гъэх.
Медицинэ IофышIэхэмрэ ветеранхэмрэ ямэфэкIкIэ джащ фэдэу къафэгушIуа­гъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м псауныгъэр къэухъумэгъэнымкIэ иминистрэу Мэрэтыкъо Рустем, Урысыем псауныгъэр къэухъумэгъэнымкIэ иIофышIэхэм япрофсоюз иреспубликэ организацие итхьаматэу Любовь Усачевар.
МэфэкI зэIукIэм медицинэ IофышIэ пэрытхэм джащ фэдэу АР-м и Къэралыгъо Совет – Хасэм ирэзэныгъэ тхылъ­хэр, бгъэхалъхьэхэу «Отличник здравоохранения» зыфиIохэрэр, республикэ зэнэкъокъоу «Гурыт медицинэ гъэсэныгъэ зиIэ специалист анахь дэгъу» зыфи­Iорэм илауреатхэм тынхэр къащыфа­гъэшъошагъэх. МэфэкI концерткIэ Iоф­тхьабзэр аухыгъ.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.