ХимиемкIэ, тарихъымкIэ ыкIи литературэмкIэ атыгъэ зыкI къэралыгъо ушэтынхэм язэфэхьысыжьхэр мы мафэхэм къэнэфагъэх. Гурыт еджапIэр къэзыухырэ нэбгырищымэ балли 100 къызэрахьыгъэмкIэ АР-м и ЛIышъхьэу КъумпIыл Мурат къафэгушIуагъ.

Поселкэу Яблоновскэм дэт гурыт еджапIэу N 5-р къэзыухырэ Аскар Шафиковымрэ Мыекъопэ лицееу N 34-м икIэлэеджакIоу Анастасия Гужовамрэ химиемкIэ балли 100 къахьыгъ. ЛитературэмкIэ анахь балл иныр къылэжьыгъ Мыекъопэ гурыт еджапIэу N 2-р къэзыухырэ Полина Пранкевич.
— Джащ фэдэу тарихъымкIэ къэгъэлъэгъон дэгъухэр Адыгеим иныбжьыкIэхэм яI. Ушэтынхэр мыпсынкIагъэхэми, шIэныгъэ куухэр еджапIэр къэзыухыхэрэм къагъэ­лъэгъуагъ. Илъэс пчъагъэхэм ежь кIэлэеджакIохэм, ахэм якIэлэегъаджэхэм, ны-тыхэм Iофэу ашIа­гъэм ар изэфэхьысыжь хъугъэ. ТиныбжьыкIэхэм тафэгушIо, нэмыкI ушэтынхэм язэфэхьысыжьхэм тяжэ, — къащитхыгъ исоциальнэ нэкIубгъохэм АР-м и ЛIышъхьэ.