Терроризмэм ыкIи неонацизмэм алъэныкъокIэ гъэсэныгъэ организациехэм ыкIи ныбжьыкIэхэм азыфагу къащырагъэкIокIырэ къэбар нэпцIхэм апэшIуекIогъэным, ахэм щынагъоу къатырэм ащыухъумэгъэнхэм фэгъэхьыгъагъ шъолъыр конференциеу тыгъуасэ Адыгэ къэралыгъо университетым щызэхащэгъагъэр.

Iофтхьабзэм ипшъэрылъ шъхьаIэр Урысые Федерациер гумэкIыгъо лъэ­хъан зыщыхэтым лъэпкъ щынэгъончъагъэр гъэпытэгъэнымкIэ стратегическэ лъэныкъохэм атегущыIэгъэныр, екIолIакIэхэр къыхэхыгъэнхэр ары.
Зэхэсыгъом хэлэжьагъэх тарихъ шIэныгъэхэмкIэ докторэу, профессорэу, АР-м шIэныгъэхэмкIэ изаслуженнэ Iофы­шIэу Елена Малышевар, АР-м терроризмэм пэуцужьыгъэнымкIэ икомиссие и Аппарат ипащэу ЛIый Азэмат, Мые­къопэ къэлэ администрацием терроризмэм пэшIуекIогъэнымкIэ щызэхэщэгъэ комиссием иаппарат ипащэу Александр Ермиловыр, шIэныгъэлэжьхэр, хэбзэухъумэкIо къулыкъухэм, общественнэ ыкIи дин организациехэм ялIыкIохэр, студентхэр.
Адыгэ къэралыгъо университетым ипроректорэу ШъхьакIэмыкъо Рустам шIуфэс гущыIэхэмкIэ Iофтхьабзэм хэла­жьэхэрэм закъыфигъэзагъ. Тикъэралыгъо зыхэт гумэкIыгъо лъэхъаным ныбжьыкIэхэр къэбар нэпцIхэм ащыухъумэгъэнхэмкIэ непэрэ зэIукIэгъум мэхьанэшхо зэриIэр ащ къыIуагъ.
Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр ыцIэкIэ Iоф­тхьабзэм къекIолIагъэхэм шIуфэс къарихыгъ ащ игуадзэу Константин Щерба­ковым. Терроризмэм пэшIуекIогъэ­нымкIэ Адыгеим ихэбзэ къулыкъухэмрэ шъолъы­рым щылэжьэрэ дин ыкIи общественнэ организациехэмрэ шIуагъэ къытэу Iоф зэрэзэдашIэрэм ар къытегущыIагъ. Ащ къызэриIуагъэмкIэ, къэбарлъыгъэIэс щы­нэгъончъагъэ республикэм илъыным Адыгеим лъэшэу гъунэ щылъафы, терроризмэм пэуцужьыгъэнымкIэ, патриотическэ пIуныгъэмкIэ Iофтхьэбзэ гъэнэфагъэхэр щызэрахьэх.
— Хэгъэгум къыщыхъурэ гумэкIыгъо­хэм ялъэхъан зэщыхъокIо кIуачIэхэм ныбжьыкIэхэр амыгъэплъэхъунхэм, дин ыкIи лъэпкъ зэгурымыIоныгъэхэм ахэщагъэ мыхъунхэм япхыгъэ Iофтхьабзэхэр зэпымыоу зэхэтщэнхэм мэхьанэшхо, иI — къыIуагъ К. Щербаковым.
1941 — 1945-рэ илъэсхэм щыIэгъэ Хэгъэгу зэошхом итарихъ фэгъэхьыгъэ къэбар нэпцIхэр къызэрэрагъэкIокIыхэ­рэм фэгъэхьыгъэу къэгущыIагъ Елена Малышевар. Хэгъэгу зэошхом илъэхъан фашистхэм якIочIэ анахь лъэшхэм тидзэ­кIолIхэр зэрапэуцужьыгъагъэхэр, лIы­хъужъ­ныгъэшхо хэлъэу къэралыгъор къызэрагъэгъунагъэр, япшъэрылъ щытхъу хэлъэу зэрагъэцэкIагъэр студентхэм къафиIотагъ. Гъэсэныгъэ IофшIэным нахь зегъэушъомбгъугъэн, хэгъэгум итарихъ, ащ хэхъоныгъэу ышIыгъэхэм афэгъэхьыгъэ шIэныгъэхэр цIыфхэм нахь икъоу алъыгъэIэсыгъэн зэрэфаер къыкIигъэтхъыгъ.
— Терроризмэмрэ неонацизмэмрэ яидеологие зыдырамыгъэхьыхынымкIэ амал тедзэхэр зетхьанхэ фае. Сыди­гъуи фэмыдэу непэкIэ ар зигъо Iофыгъоу щыт. ТицIыфхэм къэбар нэпцIхэр къыхагъэщынхэмкIэ, тэрэзыр къахахынымкIэ IэпыIэгъу тафэхъуным мэхьанэшхо иI. НыбжьыкIэхэм яхэгъэгу шIу алъэгъу­ныр, ятарихъ, тинахьыжъхэм лIыхъужъны­гъэу зэрахьагъэр ашIэныр, къэбар нэпцIэу Интернетым къихьэхэрэр ашIошI мыхъуныр ары пшъэрылъ шъхьаIэу тиIэр. Ахэм къэбар шъыпкъэр ашIэн фае, — къыIуагъ Елена Малышевам.
ЗэщыхъокIо кIуачIэу къыкъокIыхэрэм ныбжьыкIэхэр амыгъэплъэхъунхэм, дин ыкIи лъэпкъ зэгурымыIоныгъэхэм ахэщагъэ мыхъунхэм япхыгъэ Iофтхьабзэхэм къатегущыIагъ АР-м терроризмэм пэуцу­жьыгъэнымкIэ икомиссие и Аппарат ипащэу ЛIый Азэмат. Къэбар нэпцIхэр аIэкIагъахьэхэзэ цIыфхэм психологическэу зэратеIункIэхэрэм пэуцужьыгъэн, шъыпкъагъэр зылъэпсэ къэбархэр цIыф­хэм алъыгъэIэсыгъэнхэмкIэ амал тедзэ­хэр зехьэгъэнхэ зэрэфаем ар къатегущы­Iагъ.
— ХэушъхьафыкIыгъэ дзэ операциер зыщыкIорэ лъэхъаным тикъэралыгъо ыпашъхьэ къиуцорэ щынагъохэр щыгъэзы­егъэнхэмкIэ, геополитическэ пыеу тиIэхэм ныбжьыкIэхэр агъэдэIонхэмкIэ шIыкIэу агъэфедэхэрэр къыхэгъэщыгъэнхэмкIэ амалэу тиIэхэр афэдгъэIорышIэнхэ фае. Джырэ технологиехэр къызфагъэфедэзэ къэбар нэпцIхэр зыгъэIухэрэм ныбжьыкIэхэр ямыдэIунхэу, экстремизмэр, тер­роризмэр зыщыщхэр ядгъэшIэнхэу щыт, — къыIуагъ ЛIый Азэмат.
Iофыгъоу къаIэтыгъэм фэгъэхьыгъэу шIэныгъэлэжьхэр, хэбзэухъумакIохэр, динлэжьхэр конференцием къыщыгущыIагъэх, кIэух зэфэхьысыжьхэр ашIыгъэх.
КIАРЭ Фатим.