«Адыгеяавтодорым» къызэритыгъэмкIэ, «Щы­Iэ­ныгъэм пае инфраструктурэр» зыфи­Iорэ лъэпкъ проектым къыдыхэлъытагъэу Мыекъуапэ икIэу къа­лэу Къэрэщае кIорэ гъогум иIахьэу Шэуджэн районыр зэпызычырэм щыщэу чIыпIи 4 агъэцэ­кIэжьыгъ.

Ащ Адыгеир гъунэгъу шъо­лъырхэу Краснодар краимрэ Къэрэщэе-Щэрджэс Респуб­ли­кэмрэ арепхы.
Шэуджэн районым игъогушI организациеу IофшIэнхэр щызэшIозыхыгъэхэм асфальт-­мыжъо зэхэлъэу те­лъыр зэбли­хъугъ, гъогу гъу­нэ­хэр зэригъэ­фагъэх, зыщищыкIагъэм тамыгъэхэр щигъэтхъыгъэх. IахьиплIыр зэпстэумкIи километри 4,1-рэ мэхъу. Сомэ миллион 92-рэ пэIухьагъ.
Гъогур бэрэ зыгъэфедэрэ водительхэр ар шапхъэхэм адиштэу зэрагъэкIэжьыгъэм ыгъэгушIуагъэх.
— Бэрэ мы гъогум сырэ­чъэ. Шъыпкъэ, а чIыпIэхэм гъэцэкIэжьынхэр ящыкIэгъагъэх. ГъогушIхэм «тхьашъуегъэпсэу» ясэIо, — къыIуагъ автомобилистэу Роман Ос­каревым.